އިންޑިއާގެ ނިއުކްލިއަރ ޕްލާންޓު ކައިރީގައި ބޮމެއް ގޮވައި ހަ މީހަކު މަރުވެއްޖެ
29 ނޮވެމްބަރ 2013 1:21
އިންޑިއާގެ އެންމެބޮޑު ނިއުކްލިއަރ ޕްލާންޓު ކައިރީގައި ބޮމެއް ގޮވުމުގެ ސަބަބުން 6 މީހުން މަރުވެފައިވާ ކަމަށް އެޤައުމުގެ ފުލުހުން ހާމަކޮށްފިއެވެ.
އެކްސިޑެންޓަކުން މިބޮން ގޮވުމުގެ ސަބަބުން މި 6 މީހުން މަރުވުމުގެ އިތުރަށް އެހިސާބުގެ ތިން ގެއެއް ހަލާކުވެ އެތައް ބަޔަކުވަނީ ޒަޚަމްވެފައިވެއެވެ.
"ބޮން ގޮވީ އެކްސިޑެންޓަކުން. ހަމީހުން މަރުވެ ތިން މީހުން ވަނީ ވަރަށް ސީރިއަސް ޙާލަތުގައި،" އެހިސާބުގެ ޕޮލިސް ސްޕްރިންޓެންޑެންޓް ވިޖެޔެންދްރާ ބިދާރީ ވިދާޅުވިއެވެ.
"އެވާދީގައި ދިރިއުޅެމުން ގެންދިޔައީ ނިއުކްލިއަރ ހަކަތައާއި އިދިކޮޅު ބައެއް. ބޮމުގެ ހާދިސާ ހިނގި ގެއަކީ އެމީހުން ބޮން ހަދަން ބޭނުންކުރި ގެއެއް. މިމައްސަލަ މިހާރު އަޅުގަނޑުމެން މިދަނީ ފުރަތަމަ ގިޔަރުގަ ތަޙްޤީޤް ކުރަމުން،" އޭނާ ވިދާޅުވިއެވެ.
މިހާދިސާގައި ރޭޑިއޭޝަން ލީކްވެދާނެތީ ގިނަ ބަޔަކު ވަނީ މުޒާހަރާތަކެއް ކޮށްފައެވެ. މިޕްލާންޓަކީ ރަޝިއާއިން ފަރުމާކޮށް މިދިޔަ އޮކްޓޯބަރު މަހު ގާއިމްކޮށްފައިވާ ޕްލާންޓެކެވެ.
ޑިޕާޓްމެންޓް އޮފް އެޓޮމިކް އެނަރޖީ ގެ އިސް އޮފިޝަލަކު ހާމަކޮށްފައިވާ ގޮތުގައި އެނިއުކްލިއަރ ޕްލާންޓުން އެއްވެސް ރޭޑިއޭޝަނެއް ބޭރެއް ނުވާނެއެވެ. އަދި އެޕްލާންޓުވަނީ އެހުރިހާ ގޮތަކުން ރައްކައުތެރިކުރެވިފައެވެ.
ކިޔުންތެރިންގެ ހިޔާލު