ފަލަސްތީނުން ފުރަތަމަ ފަހަރަށް އދ. ގައި ވޯޓުލައިފި
19 ނޮވެމްބަރ 2013 22:47
އދ.ގެ އާންމު ބައްދަލުވުމެއްގައި ފުރަތަމަ ފަހަރަށް ފަލަސްތީނުން ވޯޓެއްލައިފިއެވެ.
ފަލަސްތީނުން ފުރަތަމަ ފަހަރަށް ވޯޓުދީފައިވަނީ ކުރީގެ ޔޫގޮސްލާވިޔާގެ ބައިނަލްއަޤްވާމީ ޓްރައިބިއުނަލްގެ ފަނޑިޔާރަކު ހޮވުމަށް އދ. ގެ އާންމު މަޖިލީހުގައި ނެގިވޯޓުގައެވެ. ހޯމަދުވަހު ނެގި މިވޯޓުގައި 193 ޤައުމަކުން ބައިވެރިވެފައިވެއެވެ. ފަލަސްތީނުގެ ފަރާތުން ތާރީޚީ މިވޯޓު ލާފައިވަނީ ފަލަސްތީނުން އދ. ކަނޑައަޅާފައިވާ އިސް އޮބްޒާވަރ ރިޔާޒް މަންސޫރެވެ.
"މިއީ އދ. ގެ ފުރިހަމަ މެމްބަރަކަށް ވުމަށް ފަލަސްތީން ކުރަމުން އަންނަ ދަތުރުގައި މަންޒިލާ ގާތަށް އެޅުނު ފިޔަވަޅެއް. ކޮންމެއަކަސް، މިއީ ވަރަށްވެސް ތާރީޚީ ދުވަހެއް،" މަންސޫރު ހާމަކުރެއްވިއެވެ.
"އެންޓިޓީ" ދަރަޖައިން "ނަން-މެމްބަރ ސްޓޭޓް" ދަރަޖައަށް އދ. އިން ފަލަސްތީން މިދިޔަ ނޮވެމްބަރު މަހު އެރުވި ފަހުން މިއީ ފަލަސްތީނަށް އދ. ގައި ވޯޓުލާން ލިބުނު ފުރަތަމަ ފަހަރެވެ. އަދި މިއީ ފަލަސްތީންގެ މިނިވަން ދައުލަތް ބަލައިގަތުމަށް އެޅުނު ވަރަށްވެސް ރަނގަޅު ފިޔަވަޅެއްކަމުގައި ގިނަ ބަޔަކު ޤަބޫލުކުރެއެވެ.
"މިއީ ތެދެއް ކުރިއަށް އެޅުނު ރަމްޒީ ފިޔަވަޅެއް. ނަމަވެސް ވަރަށްވެސް މުހިއްމު ފިޔަވަޅެއް. އެހެނީ މީގެން ދައްކުވައިދިނީ، ބައިނަލްއަޤްވާމީ މުޖްތަމަޢުން އަދި ވަކިން ޚާއްޞަކޮށް އދ. ފަލަސްތީނުގެ މިނިވަން ދައުލަތް ބަލައިގަތުމަށް ފެންބޮވާގަނެފައިވާ މިންވަރު،" މަންސޫރު ވިދާޅުވިއެވެ.
އެމެރިކާއިން އެކަމާ ކިތަންމެ ދެކޮޅު ހެދިކަމުގައި ވީނަމަވެސް އދ. އިން ކައިރި މުސްތަޤްބަލުގައި ފަލަސްތީނުގެ މިނިވަން ދައުލަތް ބަލައިގަންނާނެ ކަމަށް އުއްމީދު ކުރައްވާކަމަށް މަންސޫރު ހާމަކުރެއްވިއެވެ.
ފަލަސްތީނުގެ ފަރާތުން މިވޯޓުލުމަށްފަހު މަންސޫރުވަނީ އަތްތިލަބަޑި ޖަހައިފައެެވެ. އޭނާއާ ބައިވެރިވުމުގެ ގޮތުން އެހެން ބޭފުޅުންވެސްވަނީ އަތްތިލަބަޑި ޖަހައިފައެވެ. ނަަމަވެސް ފަލަސްތީނާ އެންމެ ދެކޮޅު އިޒުރޭލުން މިކަން މާބޮޑު ކަމަކަށް ހަދާފައެއް ނުވެއެވެ. އިޒުރޭލުން ބުނެފައިވަނީ އދ. އާންމު މަޖިލީހުގައި އެގޮތަށް އުފާކުރުމަކީ ކޮށްގެންވާނެ ކަމެއް ނޫންކަމަށެވެ. އެކަން ކުރަންޏާ އެތަނުން ބޭރުގައި އުފާކުރުމަށްވެސް އިޒުރޭލުން ވަނީ ބުނެފައެވެ.
ކިޔުންތެރިންގެ ހިޔާލު