މިސްރުގައި ހިނގި ރޭލު އެކްސިޑެންޓެއްގައި އެތައް ބަޔަކު މަރުވެއްޖެ

މިސްރުގައި ހިނގި ރޭލު އެކްސިޑެންޓެއްގައި މަދުވެގެން 24 މީހުން މަރުވެފައިވާކަމަށް އެޤައުމުގެ ސިއްހަތާ ބެހޭ ވުޒާރާއިން ހާމަކޮށްފިއެވެ.

މިސްރުގެ ވެރިކަން ކުރާ ޤާހިރާގެ އުތުރުން 40 ކިލޯމީޓަރު ދުރުގައި ހޯމަ ދުވަހު ހެނދުނު ހިނގި މިއެކްސިޑެންޓުގައި 24 މީހުން މަރުވެފައިވާއިރު 28 މީހުންނަށްވަނީ އެކިވަރުގެ ޒަޚަމްތައް ލިބިފައެވެ.

އެކްސިޑެންޓްވި ސަރަޙައްދުގެ ފުލުހުންގެ އިދާރާގެ ވެރިޔާ ކަމާލް އައްދާލީ ހާމަކުރިގޮތުގައި މިއެކްސިޑެންޓު ހިނގަން މެދުވެރިވީ ރޭލު ޓްރެކްގެ މަތިން ހުރަސްކުރި މިނީ ބަސް އަކާއި ރޭލު މުޑިއަރައިގެންނެވެ.

އޭނާ މައުލޫމާތު ދިންގޮތުގައި މި މިނީބަހުގައި ތިބީ ކައިވެނިޕާޓީއެއް ނިންމާލާފައި ގެއަށް ދާންވެގެން އެއަށް އަރައިތިބި ބައެކެވެ.

އިމަޖެންސީ ޚިދުމަތުގެ ވެރިޔާ އަހްމަދު އަލްއަންސާރީ ހާމަކުރި ގޮތުގައި މިއެކްސިޑެންޓުގައި ޒަޚަމްވި މީހުންގެ ތެރޭގައި ބައެއް މީހުންގެ ގުނަވަންތައް ވަނީ އެކީ ޗިސްވެ ވަރަށް ސީރިއަސް ޙާލަތަކަށް އައިސްފައެވެ. މިސްރުގެ ރޭލާ ބެހޭ މުވައްސަސާގެ އިސްވެރިޔާ ހުސައިން ޒަކަރިއްޔާ މައުލޫމާތު ދީފައިވާގޮތުގައި މިފަދަ އެކްސިޑެންޓުތައް ހިނގަން މެދުވެރިވަނީ ރޭލު ޓްރެކުން ދުއްވާތަކެތި އެއްވެސް ބެލުމެއްނެތި ހުރަސްކުރަން ދިމާކުރާތީއެވެ.

"މައުލޫމާތު ލިބިފައިވާގޮތުގައި އޭރު ޓްރެކް އޮތީ ބޭރުން ޗޭނުޖަހާ ބަންދުކޮށްފައި. އެހެންނަމަވެސް އެއަށްވެސް ބެލުމެއްނެތި މިނީބަސް ވަދެގަތީ،" އޭނާ ހާމަކުރިއެވެ.