ޓީޗަރަކު މަރާލި 14 އަހަރުގެ ކުއްޖަކު ކަފާލާތުގެ ދަށުން ދޫނުކުރެވޭ ގޮތަށް ހައްޔަރުކޮށްފި

އެމެރިކާގެ ކޮލަރާޑޯ ސްޓޭޓްގެ ވެރިކަން ކުރާ ޑެންވަރ ސިޓީގެ ޑެންވަރސް ހައިސްކޫލްގެ އުމުރުން 24 އަހަރުގެ ޓީޗަރަކު މަރާލި ކަމުގެ ތުހުމަތުގައި 14 އަހަރުގެ ކުއްޖަކު ކަފާލާތުގެ ދަށުން ދޫނުކުރެވޭގޮތަށް ހައްޔަރުކޮށްފިއެވެ.

އެސެކްސް ޑިސްޓްރިކްޓް އެޓަރނީ ޖޮނަތަން ބްލޮޖެޓްއަށް ހަވާލާދީ ބޮސްޓަން ނޫހުން ހާމަކޮށްފައިވާގޮތުގައި ކޮލީން ރިޓްޒަރ ނަމަކަށް ކިޔާ އުމުރުން 24 އަހަރުގެ ހިސާބު ޓީޗަރުގެ ހަށިގަނޑު ފެނިފައިވަނީ ސްކޫލުގެ ބިތްދޮށުގެ ވަލުންނެވެ.]

އުމުރުން 14 އަހަރުގެ ފިލިޕް ޑީ ޗިޒްމް ހައްޔަރުކުރުމަށް ސާލެމް ޑިސްޓްރިކްޓް ކޯޓުން އަމުރު ނެރެފައިވަނީ ކަފާލާތުގެ ދަށުން ދޫނުކުރެވޭގޮތަށެވެ. ފަނޑިޔާރު މެތިއު ނެސްޓަރ ވަނީ އެކުއްޖާގެ ނަފްސާނީ ޙާލަތު ދެނެގަތުމަށްވެސް އަމުރުކޮށްފައެވެ.

މަޢުލޫމާތު ލިބިފައިވާގޮތުގައި ގަސްތުގައި މީހަކު މަރާލުމުގެ ކުށުގެ މައްސަލަ ޗިޒްމް އާއި ދެކޮޅަށް ކޯޓުގައި ހިނގާނީ ބޮޑުމީހެކޭ އެއްފަދައިންނެވެ. އަދި މިމައްސަލައިގެ ފުރަތަމަ އަޑުއެހުން އަންނަ މަހު 22 ވަނަ ދުވަހު ބޭއްވޭނެކަމަށްވެސް ޚަބަރުތަކުން ބުނެއެވެ.

"އެއީ ވަރަށް ވަރަށް ބޮޑަށް އިޙްތިރާމާއި ލޯބި ލިބިގެންވާ ޓީޗަރެއް. މިއީ ޑެންވަރގެ ރައްޔިތުންނަށް ލިބުނު ވަރަށްވެސް ބޮޑު ދެރައެއް އަދި ހިތާމައެއް،" ބްލޮޖެޓް ހާމަކުރިއެވެ.

ހިސާބު ޓީޗަރު މަރާލިކަމުގެ ތުހުމަތުގައި ހައްޔަރުކޮށްފައިވާ 14 އަހަރުގެ ޗިޒްމްއަކީ 6 ފޫޓު ދިގު ކުއްޖެކެވެ. އަދި ފުޓްބޯޅަކުޅުމަށް ޝައުގުވެރިކަން ހުންނަ ކުއްޖެކެވެ. އޭނާގެ ރަހުމަތްތެރިން ހާމަކުރާގޮތުގައި އޭނާއަކީ ވަރަށްވެސް ހީވާގި މުރާލި އަދި އެންމެންނާވެސް ގުޅޭ ކުއްޖެކެވެ.

މިމައްސަލައިގެ ތަޙްޤީޤްކުރިއަށްދާތީ ޑެންވަރސް ސްކޫލްގެ ކިޔެވުން މިދިވަސްކޮޅުވަނީ ބަންދުކޮށްފައެވެ. އަދި ސްކޫލު މިހާރުވަނީ ކްރައިމް ސީން ޓޭޕުން ބަންދުކޮށްފައެވެ.

"އަޅުގަނޑުމެން މިތިބީ ވަރަށް ބޮޑަށް ބިރުގަނެފައި. ސްކޫލަށް ދެން ކުރީގައި ބެލި ނަޒަރުން ދުވަހަކުވެސް ނުބެލޭނެ،" ސްކޫލްގެ ކުއްޖަކު ނޫހަކަށް ކިޔައިދިނެވެ.