ޝީއަޢީ ޓެރަރިސްޓް ޖަމާޢަތަކުން ޔަމަނުގެ މަޝްހޫރު ސުންނީ ވާދީއެއްކަމުގައިވާ ދައްމާޖް ހިޞާރުކޮށްފި

ޔަމަނުގެ ހައްދުފަހަނައަޅާފައިވާ ޝީއަޢީން ނުވަތަ ރާފިޟީންގެ ޓެރަރިސްޓް ޖަމާޢަތެއް ކަމުގައިވާ ޙޫޘީން، 3000 ވަރަކަށް ޢާއިލާތަކުގެ މައްޗަށް ހިމެނޭ 10،000 ދަރިވަރުންގެ ކިޔަވަމުންދާ، "ދާރުލްޙަދީސް" ނަމަކަށްކިޔާ ދީނީ ތަޢުލީމް އުނގަންނައިދޭ ޔަމަނުގެ މަޝްހޫރު ސުންނީ މަރުކަޒް ހުންނަ ދައްމާޖް ވާދީ ހިޞާރުކޮށްފިއެވެ.

ސައުދީޢަރަބިއާގެ ބޯރޑަރާއި އިންވެގެން އޮންނަ ޔަމަނުގެ އުތުރުގެ ޕްރޮވިންސެއްކަމުގައިވާ ސަޢަދާގެ ވަދީއެއްކަމުގައިވާ ދައްމާޖު ޙިޞާރުކޮށްފައިވަނީ ގާތްގަނޑަކަށް މީގެ ދިހަވަރަކަށް ދުވަސް ކުރިންނެވެ.

އީރާނުން ފަންޑް ކުރަމުން އަންނަ ހޫސީ ޓެރަރިސްޓް ޖަމާޢަތުންދަނީ ދައްމާޖަށް ކާބޯތަކެއްޗާއި ބޭސްވެސް އެތެރެކުރުން މަނާކޮށް އެވާދީ ވަށާލާފައެވެ.

ޔަމަނުގެ ޚަބަރުފަތުރާ ވަސީލަތްތަކުންނާއި އަދި ދައްމާޖުގައި ކިޔަވަމުންދާ ދަރިވަރުންގެ ފަރާތުން މަޢުލޫމާތު ލިބިފައިވާގޮތުގައި އަނިޔާވެފައިވާ މީހުންނާއި ބަލިމީހުން ފަރުވާ ހޯދުމަށް ދައްމާޖުގެ ބޭރުގައިވާ ހޮސްޕިޓަލްތަކަށް ދިއުންވެސް ޙޫސީންވަނީ މަނާކޮށް މަގު ބަންދުކޮށްފައެވެ.

ދައްމާޖު ދާރުލްޙަދީސަކީ ހައްދުފަނައަޅާފައިވާ ވައްހާބީންގެ މަރުކަޒެއްކަމަށާއި އަދި ވައްހާބީންނަކީ އެމީހުންގެ އެންމެ ބޮޑު ޢަދުއްވުން ކަމުގައިބުނެ ޙޫސީން މިހާރުދަނީ ދައްމާޖުގެ ރައްޔިތުންނަށާއި އަދި ދާރުލްޙަދީސްގައި ކިޔަވަމުންދާ ދަރިވަރުންނަށް ބަރުހަތިޔާރު ބޭނުންކޮށްގެން ހަމަލާދެމުންނެވެ.

2004 ވަނަ އަހަރުން ފެށިގެން ޙޫސީންވަނީ ޔަމަނުގެ އުތުރު ސަރަޙައްދުގައި އެމީހުންގެ ޝިއަޢީ އަމިއްލަ ދައުލަތެއް ބިނާކުރުމަށް ދާޚީލީ އެތަކެއް ހަނގުރާމަތަކެއް ކޮށްފައެވެ. ޔަމަނުގެ ގިނަ ބަޔަކު ދެކޭގޮތުގައި ޙޫސީންނަށް މާލީ އަދި އަސްކަރީ އެހީތެރިކަން ދެމުންދަނީ ޢީރާނުގެ ޝިއަޢީ ވެރިކަމުންނެވެ. ޔަމަނުގައި ހިނގަމުން އަންނަ ހަމަނުޖެހުންތަކުގެ ނާޖާއިޒް ފައިދާނަގައި ޙޫސީން ދަނީ ޔަމަނުގެ ގިނަ ސަރަޙައްދު ތަކެއްގައި އެޖަމާޢަތުގެ ބާރުގަދަކުރަމުންނެވެ.

ދައްމާޖުގައިވާ ދާރުލްޙަދީޘަކީ މީގެ އަހަރުތަކެއް ކުރީން ދީނީ ޢިލްމު ފެތުރުމަށް ޔަމަނުގެ މަޝްހޫރު ޙަދީސް ޢިލްމްވެރިއެއް ކަމުގައިވާ ޝައިޚް މުޤްބިލް އަލްވާދިޢީ ތައުސީސް ކުރެއްވި ޢިލްމީ މަރުކަޒެކެވެ.

މަދީނާގެ މަޝްހޫރު ޙަދީސް ޢިލްމުވެރިޔާ ޝައިޚް ޢަބްދުލްމުހްސިން އަލްއައްބާދާއި، އަދި އިމާމް އަލްއަލްބާނީގެ އިސްދަރިވަރެއްކަމުގައިވާ ޝައިޚް ސަލީމް އަލްހިލާލީ އަދި އެނޫންވެސް ޢިލްމުވެރިންވަނީ ދައްމާޖުގައިވާ މުސްލިމް އަޚުންނާއި އުޚްތުންނަށް ނަޞްރުދެއްވުމަށް އެދި މާތް ﷲގެ ޙަޟްރަތުގައި ދުޢާކުރެއްވުމަށް މުސްލިމުންނަށް ގޮވާލައްވާފައެވެ.