އިދިކޮޅު ފަރާތްތަކާ ހަނގުރާމަ ކުރަނިކޮށް ސޫރިޔާ ސިފައިންގެ އިސް ޖެނެރަލަކުމަރުވެއްޖެ

ސޫރިޔާ ދީރުއްޒޫރު ޕްރޮވިންސްގައި އެޤައުމުގެ އަސްކަރިއްޔާއި އާއި ސަރުކާރާ އިދިކޮޅު ފަރާތްތަކާ ދެމެދު ހިނގި ވަރުގަދަ ކުރިމަތިލުމެއްގައި އެޕްރޮވިންސްގެ އަސްކަރިއްޔާގެ އިސްވެރިޔާ މޭޖަރ ޖެނެރަލް ޖާމިހް ޖާމިހް މަރުވެއްޖެއެވެ.

"ޓެރަރިސްޓުންގެ ކިބައިން ސޫރިޔާއާއި ސޫރިޔާގެ ރައްޔިތުން ދިފާއު ކުރުމުގެ ޤާނޫނީ މަސްޢޫލިއްޔަތު އަދާކުރައްވަމުން ދަނިކޮށް މޭޖަރ ޖެނެރަލް ޖާމިހް ޖާމިހްވަނީ "ޝަހީދުވެ ވަޑައިގެންފައި،" ސޫރިޔާ ސަރުކާރުގެ ޓީވީއިން އިއްޔެ ބުންޏެވެ.

ސޫރިޔާ ސަރުކާރުގެ ޓީވީއިން މިކަމާ ގުޅޭ އިތުރު އެހެން މަޢޫލޫމާތެއް ހިއްސާކޮށްފައި ނުވެއެވެ. ނަމަވެސް އިދިކޮޅު ފަރާތްތަކުގެ އިންޓަރނެޓް ވެބްސައިޓްތަކުންނާއި ފޯރަމްތަކުން ހާމަކުރާގޮތުގައި ޖާމިހް މަރުވެފައިވަނީ ދީރުއްޒޫރު ސިޓީގައި ހަނގުރާމަވެރިންނާ ދެމެދު ހިނގި ވަރުގަދަ ކުރިމަތިލުމެއްގައެވެ.

ސޫރިޔާގެ އިންސާނީ ހައްޤުތަކަށް މަސައްކަތްކުރާ މަދަނީ ޖަމްޢިއްޔާއެއްކަމަށްވާ ސީރިއަން އޮބްޒަރވޭޓަރީ ފޮރ ހިއުމަން ރައިޓްސްގެ ޑިރެކްޓަރ، ރާމީ ޢަބްދުއްރަޙްމާން ހާމަކުރިގޮތުގައި އެންމެ ފުރަތަމަ ޚަބަރުފެތުރިފައިވަނީ މޭޖަރ ޖެނެރަލް ޖާމިހް މަރުވެފައިވަނީ ދީރުއްޒޫރު ސިޓީގެ ރާޝީދިޔާ އަވަށުގައި ސްނައިޕަރ އެއްދިން ހަމަލާއަކުންނެވެ. އޭނާ ހާމަކުރިގޮތުގައި މިޚަބަރު ކަށަވަރު ކުރެވިފައެއް ނުވެއެވެ.ޖާމިހް އަކީ ލުބުނާނުގެ އިސް ސިޔާސީ ވެރިއެއްކަމުގައިވާ ރަފީޤް ހަރީރީގެ މަރާއި ގުޅިގެން 2005 ގެ ފެބްރުއަރީ މަހު ހައްޔަރުކުރެވި އެމައްސަލަ އޭނާގެ މައްޗަށް ސާބިތުނުވެގެން ދޫކޮށްލެވުނު މީހެކެވެ. އޭނާއަކީ 1976 ފަށައިގެން 2005 އާއި ހަމަޔަށް ލުބުނާނަށް ސޫރިޔާގެ ދިމިޝްޤުން ފޮނުވި ސަލާމަތީ ސިފައިންގެ އިސްވެރިޔަކަށްވެސް މަސައްކަތްކުރި މީހެކެވެ.

2006 ގައި އެމެރިކާއިން ވަނީ ލުބުނާނުގެ ޓެރަރިސްޓުންނަށް އޭނާ އެހީވެދެމުންދާކަމުގައި ބުނެ އޭނާ ބްލެކްލިސްޓް ކޮށްފައެވެ.