ޖަޕާނުގެ ޓޯކިޔޯއަށް އެރި 'ވިފާ' ތޫފާނުގައި މަދުވެގެން 14 މީހުން މަރުވެއްޖެ
16 އޮކްޓޯބަރ 2013 19:45
ޖަޕާނުގެ ވެރިރަށް ޓޯކިޔޯއަށް އެރި ވަރުގަދަ "ވިފާ" ތޫފާނުގައި މަދުވެގެން 14 މީހުން މަރުވެފައިވާ ކަމަށް ބޭރުގެ ޚަބަރު ފަތުރާ ވަސީލަތްތަކުން މަޢުލޫމާތު ދީފިއެވެ.
"ވިފާ" ތޫފާން އެރުމުގެ ސަބަބުން 100 އަށް ވުރެ ގިނަ ފްލައިޓްވަނީ ކެންސަލްކޮށްފައެވެ. ޓޮކިޔޯގެ ދެކުނުގައި 120 ކިލޯމީޓަރު ދުރުގައި އޮންނަ ކުޑަ ރަށެއް ކަމުގައިވާ އޮޝީމާގައި ހުންނަ ޖަޕާން ސަރުކާރުގެ އިސް އޮފިޝަލަކު ހާމަކޮށްފައިވާ ގޮތުގައި ތޫފާނުގެ ސަބަބުން ފެންބޮޑުވެ ބިންގަނޑު ކަނޑައިގެން ގޮސް ޓޯކިޔޯގެ މަގުތައް ބަންދުވެ ވަރަށްގިނަ އިމާރާތްތަކާއި ގެތައް ވަނީ ބިމާއި ހަމަވެފައެވެ.
ބިންގަނޑު ކަނޑައިގެން ދިއުމުގެ ސަބަބުން އެތަނުގައި ތާށިވެފައި ތިބި މީހުންނާ ހަމަޔަށް ދިއުމަށް ގިނަ ދަތިތަކެއް ހުރިކަމުގައި ފުލުހުންނާއި ސިފައިން މަޢުލޫމާތުދެއެވެ.
ޓޯކިޔޯގެ ނަރީޓާ އަދި ހަނެޑާ އެއަރޕޯޓް ހުއްޓުމަކަށް އައިސް 500 އަށް ވުރެ ޑޮމެސްޓިކް އަދި އިންޓަރނޭޝަނަލް ފްލައިޓްތައް ވަނީ ކެންސަލް ކޮށްފައެވެ. މީގެ އިތުރަށް ޓޯކިޔޯއިން ޖަޕާނުގެ އުތުރަށާއި އެހެނިހެން ސަރަޙައްދުތަކަށް ދަތުރުކުރާ ރޭލުގެ ޚިދުމަތްވެސް ވަނީ ތޫފާނުގެ ސަބަބުން މެދުކެނޑިފައެވެ.
ޖަޕާނުގެ މޫސުމާބެހޭ އިދާރާއިން ހާމަކުރާގޮތުގައި ތޫފާން މިހާރު މިސްރާބު ޖަހާދައިވަނީ ޖަޕާނުގެ އުތުރަށެވެ. އެހެންކަމުން މިރޭގެ ދަންވަގުތެއްގައި ހޮކައިޑޯއަށް ތޫފާން އަރާނެ ކަމަށް ބެލެވޭކަމަށާއި ރައްކާވެތިބުމަށް އެފަރާތުން ގޮވާލިއެވެ.
ކިޔުންތެރިންގެ ހިޔާލު