ފިލިޕިންސަށް އައި ބިން ހެލުމުގައި އެތަކެއް ބަޔަކު މަރުވެއްޖެ

ޕިލިޕިންސްގެ ބޯހޮލް އަދި ސިބޫ އަށް މިރޭއައި 7.2 ގެ ބިން ހެލުމުގައި 90 އަށް ވުރެ ގިނަ މީހުން މަރުވެ 100 އަށް ވުރެ ގިނަ މީހުންނަށް އެކިވަރުގެ ޒަހަމްތަކެއް ލިބިއްޖެއެވެ.

ފިލިޕިންސްގެ މޫސުމާ ބެހޭ އިދާރާއިން ހާމަކޮށްފައިވާ ގޮތުގައި މިބިންހެލުމުގެ ސަބަބުން 413 ލޮޅުންތައް އެޤައުމުގެ އެކި ސަރަޙައްދުތަކަށް އައިސްފައިވެއެވެ.

މިނުރައްކާތެރި ބިން ހެލުމުގެ ސަބަބުން ބޯހޮލް އަދި ސިބޫގައި ވަނީ އިމަރޖެންސީ ޙާލަތު އިއުލާން ކޮށްފައެވެ. ބޮހޮލްގެ ފުލުހުންގެ ވެރިޔާ ޑެނިސް އޮގަސްޓިން ހާމަކުރިގޮތުގައި މިބިންހެލުމުގައި އެންމެ ބޮޑު ގެއްލުމެއް ލިބިފައިވަނީ ބޮހޮލް ޕްރޮވިންސަށެވެ.

އޭނާ އިތުރަށް ހާމަކުރިގޮތުގައި މިޙާދިސާ ހިނގާފައިވަނީ ސްކޫލް ބަންދުދުވަހަކަށް ވުމުން ބިން ހެލުމުގެ ބޮޑުމިނާ އަޅާކިޔާއިރު މީހުން މަރުވެފައިވަނީ މަދުންނެވެ.

އަލްޖަޒީރާ ނޫހުން މަޢުލޫމާތު ދީފައިވާގޮތުގައި މިބިން ހެލުމުގައި ބޯހޮލްގެ ސްކޫލްތަކުގެ އިމާރާތްތައްވަނީ ބިމާހަމަވެފައެވެ.ބޯހޮލްގެ ނޫހެއްގެ އެޑިޓަރަކާ ހަވާލާދީ އަލްޖަޒީރާއިން ހާމަކޮށްފައިވާގޮތުގައި ބިން ހެލުމުގެ ސަބަބުން އަދިވެސް އެޤައުމުގެ އެކި ސަރަޙައްދުތަކަށް ދަނީ ލޮޅުންތައް އަންނަމުންނެވެ.

ޕިލިޕިންސްގެ ބޯހޮލްއަކީ 1.2 މިލިއަން މީހުންގެ އާބާދީއެއް ދިރިއުޅެމުން އަންނަ ޕްރޮވިންސެކެވެ. އެއީ ޕިލިޕިންސްއަށް ޒިޔާރަތްކުރާ ފަތުރުވެރިންގެ އެންމެ މަޤްބޫލް އެއް މަންޒިލެވެ. މިޕްރޮވިންސް މަޝްހޫރުވެފައިވަނީ "ޗޮކްލެޓް ހިލްސް" ގެ ސަބަބުންނެވެ.