އީސީގެ އިދާރީކަންކަން ހިނގަނީ އުއްތަމަ ފަނޑިޔާރުގެ ލަފާގެ މަތިން ނޫން

އިލެކްޝަންސް ކޮމިޝަން (އީސީ)ގެ އިދާރީ މަސައްކަތްތައް ކުރަމުންދަނީ ދިވެހިރާއްޖޭގެ އުއްތަމަ ފަނޑިޔާރު އަހުމަދު ފާއިޒު ހުސައިންގެ ލަފާގެ މަތިންކަމަށް އިލެކްޝަންސް ކޮމިޝަނާ ހަވާލާދީ މީޑިއާގައި ފަތުރާފައިވާ ޚަބަރު އުއްތަމަ ފަނޑިޔާރު ދޮގު ކުރައްވައިފިއެވެ.

މިރޭ އުއްތަމަ ފަނޑިޔާރު ނެރުއްވާފައިވާ ބަޔާނެއްގައި ވިދާޅުވެފައިވަނީ އެޚަބަރަކީ ހަގީގަތާ ޚިލާފަށް ފަތުރާފައިވާ ޚަބަރެއް ކަމަށެވެ.

އެބަޔާނުގައި އުއްތަމަ ފަނޑިޔާރު ވިދާޅުވެފައިވަނީ މިއަދު ހެނދުނު 8:45 ގައި އިލެކްޝަންސް ކޮމިޝަނަރު ފުވާދު ތައުފީގު އެމަނުކުފާނަށް ގުޅުއްވި ކަމަށެވެ. އަދި ސުޕްރީމް ކޯޓުގެ މި އަހަރުގެ 42 ނަމްބަރު ގަޒިއްޔާގައިވާ ގޮތުގެ މަތީން ވޯޓާސް ލިސްޓު ފައިނަލް ކުރަން ކެންޑިޑޭޓުންނާއި ކެންޑިޑޭޓުންގެ މަންދޫބުންނަށް ނުގުޅިގެން އެކަމުގެ ކަން ބޮޑުވުން ފާޅު ކުރެއްވި ކަމަށެވެ.

އުއްތަމަ ފަނޑިޔާރު ވިދާޅުވެފައިވަނީ ސުޕްރީމް ކޯޓުގެ ގައިޑްލައިނާ އެއްގޮތަށް އަމަލު ކުރުމުގެ މައުލޫމާތު ކެންޑިޑޭޓުންނަށް ފޯރުކޮށް ދިނުމަކީ އިލެކްޝަންސް ކޮމިޝަންގެ މަސްއޫލިއްޔަތެއް ކަމަށް ކޮމިޝަންގެ ރައީސް ފުވާދަށް ވިދާޅުވި ކަމަށްވެސް އެބަޔާނުގައި ވެއެވެ.

އިލެކްޝަންސް ކޮމިޝަނާއި އެހެނިހެން މުސްތަގިއްލު ކޮމިޝަންތަކަކީ ގާނޫނީ ގޮތުން މުސްތަގިއްލު ކޮމިޝަންތައް ކަމަށްވެސް ވިދާޅުވެފައިވެއެވެ. އަދި އިލެކްޝަންސް ކޮމިޝަނަކީ ވެސް ގާނޫނީ ބާރު ލިބިގެން މުސްތަގިއްލު ކަމާއެކު ހިނގަމުން އަންނަ ތަނެއް ކަމަށް އުއްތަމަ ފަނޑިޔާރު ވިދާޅުވެފައިވެއެވެ.