މިމަހު 19 ވަނަ ދުވަހު އިންތިޚާބު ބާއްވާ ގޮތަށް ނިންމައިފި

މިދިޔަ ސެޕްޓެމްބަރުމަހު 7 ވަނަދުވަހު ބޭއްވި ރިޔާސީ އިންތިޚާބުގެ ނަތީޖާ ސުޕްރީމް ކޯޓުން ބާތިލުކޮށް މިމަހުގެ 20 ވަނަ ދުވަހުގެ ކުރިން އަލުން އިންތިޚާބު ބޭއްވުމަށް ހުކުމް ކުރުމުން ހުކުމާއެއްގޮތަށް މި މަހުގެ 19 ވަނަ ދުވަހު އިންތިޚާބު ބާއްވާ ގޮތަށް އިލެކްޝަންސް ކޮމިޝަނުން ރޭ ނިންމައިފިއެވެ.

މިމަހުގެ 19 ވަނަ ދުވަހު އިންތިޚާބު ބާއްވާ ގޮތަށް އިލެކްޝަނުން ނިންމި ކަމަށްވިޔަސް އެއާބެހޭ އިތުރު ތަފްސީލެއް ހާމަކުރައްވާފައެއް ނުވެއެވެ. އިންތިޚާބުގައި ދެވަނަ ބުރަކަށް ދާންޖެހިއްޖެ ކަމަށްވާނަމަ ނޮވެމްބަރުމަހުގެ 3 ވަނަ ދުވަހުގެ ކުރިން ދެވަނަ ބުރު ބޭއްވުމަށްވެސް ސްޕްރީމްކޯޓުންވަނީ އިލެކްޝަންސް ކޮމިޝަންގެ މައްޗަށް އަމުރުކޮށްފައެވެ.

އިންތިޚާބުގެ ފުރަތަމަ ބުރުގެ ވޯޓުލުން ސްޕްރީމްކޯޓުން ބާތިލުކުރެއްވީ ފުރަތަމަ ބުރުގެ ވޯޓުލުމުގައި އޮޅުވާލުންތަކާއި، މަކަރުހަދައިފައިވާ ކަމަށް ބުނެ އެބުރު ބާތިލް ކޮށްދިނުމަށް އެދި ޖުމްހޫރީ ޕާޓީން ސުޕްރީމް ކޯޓަށް ހުށަހެޅި ބެއްލެވުމަށްފަހުގައެވެ. އިންތިޚާބު ބާތިލްކޮށް އަލުން ބޭއްވުމަށް ކުރި ހުކުމުގައި ބުނެފައިވަނީ އިންތިޚާބު ފަސްކުރުމަކުން ދައުލަތް ހިންގުމުގައި ގާނޫނީ ހުސް ކަމެއްނާންނާނެ ކަމަށެވެ.

މިމަހުގެ 19 ވަނަ ދުވަހު އިންތިޚާބު ބާއްވާއިރު އިލެކްޝަންސް ކޮމިޝުން އެދި ވަޑައިގަންނަވާ ހުރިހާކަމެއް ކޮށްދެއްވާނެ ކަމަށް ރައީސުލްޖުމްހޫރިއްޔާވަނީ ވިދާޅުވެފައެވެ. ސަރުކާރުން ބޭނުންވަނީ ގައުމުގެ މަސްލަހަތަށް އިސްކަން ދީގެން އަވަސް އިންތިޚާބެއް ބޭއްވުމަށް ކަމަށްވެސް އެމަނިކުފާނު ވަނީ އިލެކްޝަންސް ކޮމިޝަނުގެ ވެރިންނަށް ދަންނަވާފައެވެ.

އިންތިޚާބު ބާއްވާނެ ތާރީޚެއް އިއުލާން ކުރުމުން އެކަމަށް އުފާކުރައްވާ ކަމަށް އަދި އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދު ވަނީ ވިދާޅުވެފައެވެ. އަދި އެމްޑީޕީން އޮތީ މިހާރުވެސް އިންތިޚާބަށް ތައްޔާރަށް ކަމަށް އެމަނިކުފާނު ވިދާޅުވިއެވެ. ހުރިހާ ކެންޑިޑޭޓުން މިހާރުވަނީ އިންތިޚާބަށް ތައްޔާރުވާން ފަށައިފައެވެ. ނަމަވެސް ރައީސް ޑރ. ވަހީދުގެ ކުރީގެ ރަނިންމޭޓް އަހުމަދު ތަސްމީން އަލީ ވިދާޅުވީ ދެން ޑރ. ވަހީދުގެ ފަހަތްޕުޅަށް ވަޑައި ނުގަންނަވާނެ ކަމަށެވެ.