އިންތިޚާބު ކާމިޔާބު ނުވާނެ ކަމަށް ޔާމީން ވިދާޅުވާ އޯޑިއޯއަކީ އަސްލެއްނޫން- މުޢާޒު

މި އަހަރުގެ ރިޔާސީ އިންތިޚާބު ކާމިޔާބު ކުރެވިދާނެ ކަމުގެ ފުރުސަތުނެތް ކަމަށް ޕީޕީއެމްގެ ރިޔާސީ ކެންޑިޑޭޓް ޢަބްދުﷲ ޔާމީން ވިދާޅުވާ އޯޑިއޯއެއް ކަމަށް ބުނެ ލީކޮށްފައިވަނީ "އަސްލެއް ނޫން" ކަމަށް ޔާމީންގެ ތަރުޖަމާނު އިބްރާހީމް މުޢާޒު ޢަލީ (މުޢާ) ވިދާޅުވެއްޖެއެވެ.

އޭނާ ވިދާޅުވީ އެއީ ޔާމީން އެކިދުވަސް މަތިން އެކިތަންތާގައި ދައްކަވާފައިވާ ވާހަކަތައް އެއްކޮށް އެޑިޓްކޮށްގެން ހަދާފައިވާ 18ސިކުންތުގެ އޯޑިއޯއެއް ކަމަށް ވެދާނެ ކަމަށެވެ.

އެއޯޑިއޯއަކީ އަސްލެއްނެތް ވާހަކައެއް ކަމަށްވިދާޅުވަނީ ކީއްވެތޯ ދެންނެވުމުން މުޢާޒު ވިދާޅުވީ "އަސްލެއް ނެތްއެއްޗަކަށްވަނީ އެއީ ދުވަހަކުވެސް ދެއްކެވި ވާހަކަ ފުޅަކަށް ނުވާތީ. މިފަދަ އޯޑިއޯއެއް އެޑިޓް ކޮށްގެން ހެދުމަކީ އެކަށީގެންވާ ކަމެއް،" ކަމަށެވެ.

އޭނާ ވިދާޅުވީ މިފަދަ އޯޑިއޯތަކުގެ ސަބަބުން ޔާމީންގެ ކެންޕޭނަށް ނޭދެވޭ އަސަރެއް ނުުކުރާނެ ކަމަށެވެ. އެއީ އެމަނިކުފާނަށް ތާއީދު ކުރާ މީހުން "އެގޮތުގައި ދެމިތިބީ ޔާމީންގެ ލީޑަރޝިޕް ވަރަށް ރަނގަޅަށް އެނގި ދަސްވެފައިވާތީ" ކަމަށް މުޢާ ވިދާޅުވިއެވެ.

މުޢާ ވިދާޅުވީ ޔާމީނާ ބެހޭ ގޮތުން ނެރޭ މިފަދައޯޑިއޯ ތަކުގެ ސަބަބުން އެމަނިކުފާނުގެ ސަޕޯޓަރުންނަށް ފިލާވަޅުތަކެއް ލިބިގެންދާނެ ކަމަށެވެ. އެއީ އެފަދަ "އެންޓި ކެންޕޭން ގެ ސަބަބުން ސަޕޯޓަރުންގެ އިތުބާރާއި ސަޕޯޓު ބޮޑުވެގެން ދިޔުން،" ކަމަށް ވިދާޅުވިއެވެ.

މިއަހަރުގެ ރިޔާސީ އިންތިޚާބުގައި ވާދަކުރައްވާ 4 ކެންޑިޑޭޓުންގެ ތެރޭގައި ހުންނެވި އެންމެ ގާބިލް އަދި އެންމެ ތަޖުރިބާާކާރު ބޭފުޅަކީވެސް ޔާމީން ކަމަށް މުޢާޒު ވިދާޅުވިއެވެ. އެހެން ކަމުން މިފަދަ އޯޑިއޯތައް ނެރޭ ފަރާތްތަކުން އެކަން ކުރަނީ ޔާމީން ދެކެ ޖެހިލުންވާތީ ކަމަށްވެސް އޭނާވިދާޅުވިއެވެ.

ލީކުވެފައިވާ އޯޑިއޯގައި ޔާމީން ވިދާޅުވެފައިވަނީ"ދެހާސްތޭރައަކީ އެބޭފުޅުންގެ ދަބަހުގެ ތެރޭގައި މިހާރުވެސް އޮތް އެއްޗެއް. އެބޭފުޅުންނަށް ލިބިފައި އޮތް އެއްޗެއް،" ކަމަށެވެ. ނަމަވެސް އެއީކޮން ބޭފުޅުންނެއް ކަމެއް އޭނާ ވިދާޅުވެފައެއް ނުވެއެވެ. މިއޯޑިއޯއަކީ ކޮންއިރެއްގައި ކޮންތާކު ދައްކާފައިވާ ވާހަކަތަކެއް ކަމެއްވެސް އެނގިފައެއް ނުވެއެވެ.

އޯޑިއޯގައި ޔާމީން އިތުރަށް ވިދާޅުވެފައިވަނީ "އެހެންވީމާ އަޅުގަނޑުމެންނަށް ފުރުސަތެއް ނެތްކަން ނޭނގެ ދެހާސްތޭރައިގެ އިންތިޚާބުގައި އެއްވެސް ވަރެއްގެ ކާމިޔާބީއަކާ ހަމައަށް ދެވިދާނެ ކަމަށް. އަޅުގަނޑުމެން ދެހާސް އަށާރައަށް ކަންނޭނގޭ މިހާރުން ފެށިގެން ތައްޔާރު ވާންވީ،" އޯޑިއޯގައި ޔާމީން ވިދާޅު ވެފައިވެއެވެ.