އޮސްޓްރޭލިއާ ސިފައިން އަފްޣާނިސްތާނުން ފައިބައިފި

އަފްޣާނިސްތާން އިސްތިއުމާރްކުރުމުގައި އެމެރިކާނުންނަށް އެހީތެރިވަމުންދާ އޮސްޓްރޭލިއާގެ ސިފައިން އަފްޣާނިސްތާނުން ފާބައިފިއެވެ.

އެމެރިކާއިން އިސްއިތުމާރުކޮށްފައިވާ އަފްޣާނިސްތާނުގައި ހަރަކާތްތެރި ވަމުންދިޔަ 1000 އަށް ވުރެ ގިނަ އޮސްޓްރޭލިއާ ސިފައިން މިހާރުވަނީ އަފްޣާނުން ފާބައިފައެވެ. އަދި މީގެ ތެރެއިން އެތަކެއް ބަޔަކު ހަނގުރާމާގައި މަރުވެފައިވާއިރު އެތަކެއް ސަތޭކަ މީހުންނަށްވަނީ އެކިވަރުގެ ޒަޚަމްތައް ލިބިފައެވެ.

އޮސްޓްރޭލިއާގެ ބޮޑުވަޒީރު ޓޯނީ އެބޮޓް ހާމަކުރިގޮތުގައި އެޤައުމުގެ ސިފައިންވަނީ 12 އަހަރުގެ މިމިޝަންގައި ބޮޑު އަގެއްދީފައި ކަމަށެވެ.

"މިހަނގުރާމައެއް ނިމެނީ، ނަޞްރާއެކީއެއް ނޫން. ބަލިވުމާއި އެކީއެއްވެސް ނޫން. ނަމަވެސް އުއްމީދަކާއި އެކު. އަފްޣާނިސްތާން ރަނގަޅުތަނަކަށް ވުމުގެ އުއްމީދުގައި،" އޭނާ ބުނެފައިވެއެވެ.އަފްޣާނިސްތާނަށް ޞުލްޙަގެނައުމުގެ ނަމުގައި އެމެރިކާނުންނާއި އެމެރިކާގެ އެކުވެރި ޤައުމުތަކުން މީގެ 12 އަހަރުކުރިން އަފްޣާނިސްތާނަށް އަރައި މުޅި ޤައުމުވަނީ ސުންނާފަތިކޮށްފައެވެ.

ޓެރަރިސްޓުން މެރުމަށްކަމަށް ބުނެ ދުނިޔޭގެ އެކި މުސްލިމު ޤައުމުތަކުގައި އުޅޭ މުސްލިމުންނަށް އަމާޒުކޮށްގެން އެމެރިކާއިންދަނީ ޓެރަރިސްޓް ހަމަލާތަކެއް ދެމުންނެވެ.