ރުހުން ހޯދުމަށް ހަތަރު ވަޒީރެއްގެ ނަން މަޖިލީހަށް ފޮނުވައިފި

ރައީސް ޔާމީންގެ ކެބިނެޓަށް އެމަނިކުފާނު އައްޔަން ކުރައްވާފައިވާ ވަޒީރުގެ ތެރެއިން 4 ވަޒީރަކަށް ރުހުން ހޯދުމަށް ރައްޔިތުންގެ މަޖިލީހަށް މިއަދު ފޮނުވައިފިއެވެ.

މިބޭފުޅުންނަކީ މިމަހުގެ 21 ވަނަ ދުވަހު ވަޒީރުންގެ މަޖިލީހަށް އަޔަން ކުރެއްވި 4 ވަޒީރުންނެވެ. އެއީ މިނިސްޓަރ އޮފް އެޑިޔުކޭޝަން ކަމަށް ޑރ. ޢާއިޝަތު ޝިހާމް، މިނިސްޓަރ އޮފް ހެލްތު އެންޑް ޖެންޑަރ ކަމަށް، ޑރ. މަރިޔަމް ޝަކީލާ، މިނިސްޓަރ އޮފް ޔޫތު އެންޑް ސްޕޯޓްސް ކަމަށް މުހައްމަދު މަލީޙު ޖަމާލް، ބަންޑާރަ ނާއިބު ކަމަށް މުޙައްމަދު އަނިލް އެވެ.

މި 4 ވަޒީރުންގެ ނަންތައް މަޖިލީހަށް ފޮނުވުމުން ވަޒީރުންގެ މަޖިލީހަށް ރައީސް ޔާމީން އައްޔަން ކުރެއްވި ހުރިހާ ބޭފުޅުންގެ ނަންތައް މަޖިލީހަށް ފޮނުއްވައި ނިމުނީ އެވެ. މީގެ ކުރިންވަނީ ދެފަހަރެއްގެ މަތިން 11 ބޭފުޅެއްގެ ނަންތައް ރައްޔިތުންގެ މަޖިލީހަށް ފޮނުވާފައެވެ.

މިމަހުގެ 29 ވަނަ ދުވަހު ބާއްވާ ރައްޔިތުންގެ މަޖިލީހުގެ ޖަލްސާގައި ވަޒީރުންނަށް ރުހުން ދިނުމަށް އެޖެންޑާ ކުރައްވާނެ ކަމަށް ރައްޔިތުންގެ މަޖިލީހުގެ ރައީސް ވަނީ މެންބަރުންނަށް އަންގަވާފައެވެ.