ޗައިނާ ފުލުހުން އެޤައުމުގެ 8 މުސްލިމަކު ބަޑި ޖަހާ މަރާލައިފި

ޗައިނާގެ ފުލުހުން އެޤައުމުގެ ހުޅަނގުއުތުރު ޒިންޖިއާންގެ މުސްލިމުންގެ 8 މީހަކަށް ބަޑިން ހަމަލާދީ މަރާލައިފިއެވެ.

ޗައިނާގެ ފުލުހުން ހާމަކުރާގޮތުގައި އެމީހުންނަށް މި 8 މުސްލިމުން މަރާލަންޖެހުނީ ޔާކާންޑް ސަރަޙައްދުގެ ފުލުހުންގެ އިދާރާއަކަށް ބަޔަކު މީހުން ހަމަލާދީފައިވާތީ އެކަމުގެ ބަދަލެއްގެގޮތުންނެވެ.

"ކަޝްގަރްގެ ޔާކާންޑުގެ ފުލުހުންގެ އިދާރާއަށް ބަޔަކު މީހުން ވަޅިން ހަމަލާދިނީ. ދެން އެމީހުން ގޮވާއެއްޗެތިވެސް އުކި. އޭގެ ސަބަބުން ފުލުހުންގެ ބައެއް ކާރުތަކުގައި ރޯވި. އަޅުގަނޑުމެން މިކަމާއި ގުޅިގެން ހިންގި އޮޕަރޭޝަނުގައި ތުހުމަތުކުރެވޭ 8 މީހުންނަށް ބަޑިން ހަމަލާދިނީ. އިތުރު މީހަކު ހައްޔަރުކުރިން" ފުލުހުން ނެރުނު ބަޔާނެއްގައި ބުނެފައިވެއެވެ.

މިމަހު ކުރީކޮޅުވެސް ޗައިނާގެ ފުލުހުންވަނީ މިގޮތަށް 14 މުސްލިމުން މަރާލާފައެވެ. އެމީހުން އޭރުވެސް ބުނެފައިވަނީ އެއީ ފުލުހުންގެ ދެއޮފިސަރުންނަށް ބަޔަކު މީހުން ހަމަލާދިނުމުން ކުރިކަމެއްކަމަށެވެ.

މީގެ އިތުރުން މިދިޔަ މަހުވެސް ޗައިނާގެ ފުލުހުންވަނީ މުސްލިމުންގެ 9 މީހަކު ބަޑިޖަހައި މަރާލާފައެވެ.