އިންޑިއާގައި ހިނގި ނުރައްކާތެރި ބަސް އެކްސިޑެންޓެއްގައި 44 މީހުން މަރުވެއްޖެ

ދެކުނު އިންޑިއާގައި ހިނގި ނުރައްކާތެރި ބަސް އެކްސިޑެންޓެއްގައި އޭގައި ދަތުރުކުރި 44 ފަސިންޖަރުން މަރުވެފައިވާކަމަށް އެސަރަޙައްދުގެ ފުލުހުން ހާމަކޮށްފިއެވެ.

ފުލުހުންގެ ތަރުޖަމާނު، ވެންކަޓޭޝްވަރުލޫ މަޢުލޫމާތު ދީފައިވާގޮތުގައި ބެންގަލޫރާއި ހައިދަރުއާބާދާއި ދެމެދު އޮންނަ ހައިވޭއެއްގައި ބަސް ދުއްވަމުން ދަނިކޮށް ބަސް ކޮންޓްރޯލުން ނެއްޓި އެތަނުގައި ހުރި އިމާރާތެއްގައި ޖެހި ބަހުގެ ޓޭންކް ވަނީ ގޮވާފައެވެ. އަދި މިހާދިސާ ހިނގާފައިވަނީ ބުދަދުވަހު ފަތިހު 5 ޖެހިއިރު ކަމަށް އޭނާ ހާމަކުރިއެވެ.

"މަރުވި 44 މީހުންގެ ތެރޭގައި ކުޑަކުދިންވެސް ހިމެނޭ،" ވެންކަޓޭޝްވަރުލޫ އޭއެފްޕީ ނޫސް އެޖެންސީއަށް މަޢުލޫމާތު ދީފައިވެއެވެ.

އަންދަރު ޕްރަދޭޝް ސްޓޭޓްގެ މެހަބޫބްނަގަރުގެ ފުލުސް އޮފިސަރެއް ކަމުގައިވާ ޕްރަދީޕް ހާމަކޮށްފައިވާ ގޮތުގައި މިހާދިސާގައި ބަސްދުއްވަން ހުރި މީހާއާއި އިތުރު ފަސް މީހަކު ވަނީ ސަލާމަތްވެފައެވެ.

ޚަބަރުތައް ބުނާގޮތުގައި ބަސް ކޮންޓްރޯލުން ނެއްޓި މިއެކްސިޑެންޓް ހިނގަން މެދުވެރިވީ އެމަގުގައި ދަތުރު ކުރަމުން ދިޔަ އެހެން އުޅަނދެއް އޯވަރޓޭކް ކުރަން އުޅުމުންނެވެ.

މެހްބޫބްނަގަރަކީ ނިއުދިއްލީއާއި 1200 ކިލޯމީޓަރު ދުރުގައި އޮންނަ ރަށެކެވެ.ވޯލްޑް ހެލްތު އޯގަނައިޒޭޝަނުން ހާމަކުރާގޮތުގައި އިންޑިއާއަކީ ދުނިޔޭގައި އެންމެ ގިނައިން އެކްސިޑެންޓުވެގެން މީހުން މަރުވާ ޤައުމެވެ.

އިންޑިއާގެ ފުލުހުން ހާމަކުރާގޮތުގައި އެކްސިޑެންޓުވެގެން ކޮންމެ އަހަރަކު 110000 އަށްވުރެ ގިނަ މީހުން މަރުވާކަމަށެވެ. އަދި ގިނަ ފަހަރު އެކްސިޑެންޓްވާން މެދުވެރިވަނީ ދުއްވާ މީހާ މާބާރަށް ދުއްވުމުގެ ސަބަބުންނާއި އަދި ދުވަސްވެފައިވާ އުޅަނދުފަހަރު ދުއްވުމުގެ ސަބަބުންނެވެ.