އެމެރިކާ ސަރުކާރު ހުއްޓިފައި އޮތް އޮތުމަށް ކޮންގްރެސްއިން ނިމުން ގެނެސްފި
17 އޮކްޓޯބަރ 2013 21:11
އެމެރިކާގެ މާލިއްޔަތަށް އޮތް ނުރައްކާތެރި ކަމުން އެމެރިކާ ސަލާމަތް ކުރުމަށް އެޤައުމުގެ ކޮންގްރެސްއިން ފިޔަވަޅު އަޅައި ސަރުކާރު އަލުން ހުޅުވުމަށް ނިންމައިފިއެވެ.
ކޮންގްރެސްގެ މިފިޔަވަޅުގެ ސަބަބުން ދުނިޔޭގެ އިޤްތިސާދަށް އައިސްދާނެ ކަމަށް ކަމާބެހޭ ގިނަ ފަރާތްތަކުން ލަފާކޮށްފައިވާ ބޮޑު ކާރިސާއަށް ވަނީ ވަގުތީ ނިމުމެއް ގެނެސްފައި ކަމަށް އިޤްތިސާދީ މާހިރުން ހާމަކުރެއެވެ.
ނަމަވެސް އަލްޖަޒީރާއިން މަޢުލޫމާތުދޭ ގޮތުގައި މި ނިންމުމުން ގެނެސްދޭ ޙައްލަކީ ހަމައެކަނި ވަގުތީ ހައްލެއްކަމަށެވެ. އެމެރިކާގެ ރިޕަބްލިކަނުންނާއި ޑިމޮކްރެޓުންގެ މެދުގައި އޮތް އަސާސީ ހޭދަކުރުމާއި ޑެފިސިޓާ މެދު ދެބަސްވުމަކަށް އެއްވެސް ހައްލެއް ނާންނާނެއެވެ. މިނިންމުމުން ޖެނުއަރީ 15 އާ ހަމައަށް ސަރުކާރު ހިންގުމަށް ފަންޑު ކޮށްދޭނެއެވެ. އަދި ފެބްރުއަރީ 7 އާ ހަމައަށް ދަރަނީގެ ސީލިން އުފުލިގެންދާނެއެވެ.
ކަމާބެހޭ މުޙައްލިލުން ހާމަކުރާ ގޮތުގައި އަންނަ އަހަރުގެ ކުރީކޮޅު އަނެއްކާވެސް އެމެރިކާގެ ސަރުކާރު ހުއްޓުމަކަށް އަންނާނެއެވެ.ކޮންގްރެސްގެ މިނިންމުމަށް ޑިމޮކްރެޓުން ކޮންޓްރޯލްކުރާ ސެނެޓާއި އަދި ރިޕަބްލިކަނުން ކޮންޓްރޯލް ކުރާ ހައުސް އޮފް ރެޕްރެޒެންޓެޓިވްސްއިންވަނީ ތާއީދުކޮށްފައެވެ.
މަޢުލޫމާތު ލިބިފައިވާގޮތުގައި އަންނަ ބުރާފަތީގެ ކުރިން އެމެރިކާގެ ރައީސް ބަރަކް އޮބާމާ މިބިލްގައި ސޮއިކުރައްވާނެއެވެ.
އޮބާމާވަނީ ސެނެޓުން މިބިލަށް ތާއީދު ކޮށްފައިވާތީ ސެނެޓަށް މަރުހަބާ ކިޔުއްވައި މިބިލުގައި ސޮއިކުރެއްވުމަށް ތައްޔާރަށް ހުންނެވިކަމަށް ވިދާޅުވެފައެވެ.
ކިޔުންތެރިންގެ ހިޔާލު