އިންސާފު ލިބެންދެން މަގުމަތީގައި އިހުތިޖާޖު ކުރުމަށް އެމްޑީޕީން ނިންމަފައިފި
24 ސެޕްޓެމްބަރ 2013 0:00
ރިޔާސީ އިންތިޚާބުގެ ދެވަނަބުރުގެ ވޯޓުލުން ފަސްކުރުމަށް އިލެކްޝަންސް ކޮމިޝަންގެ މައްޗަށް ސްޕްރީމް ކޯޓުން ހުކުމް ކުރުމަށް އިންސާފު ލިބެންދެން މަގުމަތީގައި ތިބެ އިހުތިޖާޖު ކުރުމަށް އެމްޑީޕީގެ ގައުމީ މަޖިލިހުން މިރޭ ފާސް ކޮށްފިއެވެ.
މިގޮތަށް ފާސްކުރުމުން އެމްޑީޕީއަށް ތާއިދު ކުރާ މީހުންވަނީ މަގުމައްޗަށް ނުކުމެފައެވެ.
އެމްޑީޕީން ބުނެފައިވަނީ ސްޕްރީމްކޯޓުގެ މިއަމުރަކީ ޑިމޮކްރެޓިކް އުސޫލުތައް މުގުރާލައި ގާނޫނު އަސާސީއާ ހިލާފު ނިންމުމެއް ކަމަށެވެ.
ސްޕްރީމްކޯޓުން މިރޭ ނެރުނު އަމުރާ ގުޅިގެން އެމްޑީޕީގެ ގައުމީ މަޖިލީހުން ބޭއްވި ކުއްލި ޖަލްސާއަކުން މަގުމައްޗަށް ނިކުންނަން ނިންމެވީ މިޖަލްސާއަށް ހާޒިރުވި 56 މެންބަރުންގެ އިއްތިފާގުންނެވެ. މިގަރާރު މަޖިލީހަށް ހުށަހެޅުއްވީ ރައްޔިތުންގެ މަޖިލީހުގެ ހުޅުދޫދާއިރާގެ މެންބަރު އިލްޔާސް ލަބީވެ. ތާއީދު ކުރެއްވީ ރައީސް މުހައްމަދު ނަޝީދެވެ.
މިރޭގެ ޖަލްސާގައި ރައީސް ނަޝީދު ވިދާޅުވީ ރަައްޔިތުންނަށް އެމީހުން ބޭނުންވާ ކަންކަން ހާސިލްކޮށްދިނުމަށް އެމްޑީޕީން ވަނީ ދިގު ދަތުރެއް ކަމަށެވެ. ރާއްޖޭގައި މިހާރު ހިނގަމުންދާ ކަންކަމަކީ ރާއްޖެއަށް އާ ކަންކަން ކަމަށް ނުވާނެ ކަމަށްވެސް ވިދާޅުވިއެވެ.
މިރޭ ސްޕްރީމް ކޯޓުން ނެރުނު އަމުރާ ބެހޭ ގޮތުން ރައީސް ނަޝީދު ވިދާޅުވީ އެކަމަށް އުއްތަމަ ފަނޑިޔާރު ހައްލެއް ހޯއްދަވައިދެއްވަން ޖެހިވަޑައިގަންނަވާނެ ކަމަށެވެ. މިއަމުރު ނެރެފައި ވިޔަސް ރައީސް ނަޝީދު ވިދާޅުވީ ދެވަނަ ބުރު ބޭއްވުމަށް އިލެކްޝަންސް ކޮމިޝަނުން ތައްޔާރު ވުމަށެވެ.
މިރޭގެ ޖަލްސާގައި ވާހަކަ ދެއްކެވި ބޭފުޅުންވަނީ ސްޕްރީމް ކޯޓުގެ އަމުރަށް ވަރަށް ބޮޑަށް ފާޑުވިދާޅުވެފައެވެ. މި ޖަލްސާގައި ބައެއް ބޭފުޅުން ގޮވާލާފައިވަނީ ހުކުމުގައި ސޮއިކުރެއްވި ހަތަރު ފަނޑިޔާރުންގެ އަނބިންނަށާއި ދަރިންނަށް ގޯނާ ކުރުމުގެ އިތުރުން ސުޕްރީމް ކޯޓް އަމުރު ބަލައި ނުގަތުމަށެވެ.
ކިޔުންތެރިންގެ ހިޔާލު