ޔާމީނުގެ އިގްތިސާދީ ސިޔާސަތަށް ފާޑުކިޔޭނެ ކެންޑިޑޭޓެއް ނެތް –ތަރުޖަމާން

ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީން އަބްދުލް ގައްޔޫމުގެ އިގްތިސާދީ ސިޔާސަތަށް ފާޑުކިޔޭނެ ރިޔާސީ ކެންޑިޑޭޓެއްވެސް އަދި ރަނިންމޭޓެއްވެސް މިފަހަރުގެ ރިޔާސީ އިންތިޚާބުގައި ވާދަކުރައްވާ ބޭފުޅުންގެ ތެރޭގައި ނެތްކަމަށް ޔާމީންގެ ތަރުޖަމާން އިބްރާހީމް މުއާޒު (މުއާ) ވިދާޅުވެއްޖެއެވެ.

ޖުމްހޫރީކޯލިޝަންގެ ރަނިންމޭޓް ޑރ. ހަސަން ސައީދު ޔާމީނަށް ފާޑުވިދާޅުވެ އިއްޔެ ވާހަކަ ދައްކަވާފައިވާތީ އެއަށް ރައްދު ދެއްވަމުން މުއާ ވިދާޅުވީ ޕީޕީއެމްގެ ރިޔާސީ ކެންޑިޑޭޓުގެ އިގްތިސާދީ ސިޔާސަތު ހާމަކުރެއްވިތާ 24 ގަޑިއިރު ނުވަނީސް ޑރ. ހަސަން ޔާމީނުގެ ޒާތަށް ފާޑު ވިދާޅުވުމުގެ ބަދަލުގައި ސިޔާސަތަށް ފާޑުވިދާޅުވިނަމަ ވަރަށް އުފާވީސް ކަމަށެވެ. "މިހާރު އެއުޅެނީ ފެންނުލިބިގެން މަރަށްތެޅޭ މަހެއްހެން. ޔާމީނަށް ފާޑުވިދާޅުވުމުގެ ބަދަލުގައި ސިޔާސަތަށް ފާޑުވިދާޅުވާ އަޑު އަހަން ބޭނުން. އެކަމަކު ޔާމީނަށް ފާޑުވިދާޅުވުމުން ދޭހަވަނީ ޔާމީންގެ އިގްތިސާދީ ސިޔާސަތުގެ ވަރުގަދަ ކަމުން އެކަން ހަޖަމް ނުވެގެން އުޅޭކަން،" މުއާ ވިދާޅުވިއެވެ.

އޭނާ ވިދާޅުވީ އެންމެ ފަހަރަކުވެސް ޔާމިނަކީ އިގްތިސާދީ މާހިރެއް ކަމަށް ޔާމީން އަމިއްލައަށް ވިދާޅުވެފައި ނުވާނެ ކަމަށެވެ. ޔާމީނަކީ އިގްތިސާދީ މާހިރެއް ކަމަށް ގަބޫލުކޮށް އެވާހަކަ ދައްކަނީ އެހެން މީހުންކަމަށެވެ. "ރައްޔިތުންގެ މަޖިލީހުގައި އިގްތިސާދީ ކަންކަމަށް ބަހުސް ކުރާއިރުވެސް އިދިކޮޅު މެންބަރުންވެސް ޔާމީން ވިދާޅުވާ ވާހަކަތައް ގަބޫލުކުރޭ. ޔާމީނަކީ އިގްތިސާދީ މާހިރެއް ކަމަށް ގަބޫލު ކުރައްވާ މީހުންގެ ތެރޭގައި ޑރ. ހަސަނަށްވެސް ހިމެނިވަޑައި ގަންނަވާ،" އޭނާ ވިދާޅުވިއެވެ.

މުއާޒު ވިދާޅުވީ ޔާމީނަށް އިގްތިސާދީ ލަގަބު ދިނީ ދިވެހިރައްޔިތުން ކަމަށެވެ. ނަމަވެސް މާހިރެއްގެ ލަގަބު ޑރ. ހަސަނަށް ރައްޔިތުން ނުދިނުމުން "ޑރ. ހަސަން ކުރައްވާ ހިތާމައިގާ އަޅުގަނޑުވެސް ބައިވެރިވަން،" އޭނާ ވިދާޅުވިއެވެ. އޭނާ ވިދާޅުވީ ޑރ.ހަސަން ޔާމީންގެ ޒާތަށް ނިސްބަތް ކުރައްވައި އެވާހަކަ އެދެއްކެވީ "ޔާމީންގެ އިގްތިސާދީ ސިޔާސަތު ހަޖަމް ނުކުރެވިގެން،" ކަމަށެވެ.

މުއާޒު ވިދާޅުވީ އެސްޓީއޯ، ސްޓެލްކޯ، އައިލެންޑް އޭވިޝަން ފަދަ ތަންތަނަކީ "ނެތުމުގެ ތެރެއިން އައިސްފައިވާ ތަންތަން،" ކަމަށެވެ. އެތަންތަން ކުރިއަރުވައި ހިންގަން ފެށީ ޔާމީން ކަމަށެވެ. އައިލެންޑް އޭވިއޭޝަން އުފައްދައިގެން ކުރީގެ އެއާމޯލްޑިވްސް އިން ދެ މަތިންދާ ބޯޓު ކުއްޔަށް ހިފައިގެން އެތަން ކޮޅަށް ނެންގެވީވެސް ޔާމީން ކަމަށް އޭނާ ވިދާޅުވިއެވެ. އޭރު ގާސިމް އިބްރާހީމް ހުންނެވީ ފިނޭންސް މިނިސްޓްރުގެ މަގާމުގައިތޯ އޭނާ ސުވާލު ކުރެއްވިއެވެ. އޭނާ މިސުވާލު ކުރެއްވީ އައިލެންޑް އޭވިއޭޝަނަށް ދެ ބޯޓު ގެނެސްގެން އެތަން ތަރައްގީ ކުރެއްވީ ގާސިމްގެ ފިނޭންސް މިނިސްޓަރު ކަމުގައި ކަމަށް ޑރ. ހަސަން ވިދާޅުވެފައިވާތީއެވެ.

ޔާމީން އެސްޓީއޯގެ ޗެއާމަނަކަށް ހުންނެވިއިރު ސަންޓްރެވެލް ޝިޔާމުގެ ދެކުންފުންޏަކަށް ޑޮލަރު ގަތުމަށް ފައިސާ ދެއްވި ވާހަކައަށް ރައްދު ދެއްވަމުން މުއާ ވިދާޅުވީ އެއީ ބޭރުފައިސާގެ ދަތިކަން ފޯރާން ފެށުމުން އަބަދުވެސް އެސްޓީއޯއިން ކުރަމުން އަންނަ ކަމެއް ކަމަށެވެ. ރައީސް ނަޝީދުގެ ވެރިކަމުގައިވެސް އެކަން އެގޮތަށް ކުރެއްވި ކަމަށެވެ. އަދި މިހާރުވެސް ކުރައްވާ ކަމަށެވެ. "މިހާރުވެސް ބޭރުފައިސާގެ ދަތިކަން ކުރިމަތިވުމުން ރަހުނުގެ ގޮތުގައި ދިވެހިފައިސާ ބެހެއްޓުމަށްފަހު އެކަންކުރާނެ. ޝިޔާމް އަތުން ޑޮލަރު ގަތް ފަދައިން ގާސިމް އިބްރާހީމަށްވެސް އަދި ޗަންޕާ އަފީފަށްވެސް އެެެހެން މީހުންނަށްވެސް އެފުރުސަތު އޮންނާނެ،" ކަމަށް މުއާ ވިދާޅުވިއެވެ.

އޭނާ ވިދާޅުވީ ރައީސް މައުމޫނުގެ ވެރިކަމުގެ ފަހުކޮޅު ސްޓެލްކޯ އޮތީ ބަނގުރޫޓުވުމާ ކައިރިވެފައި ކަމަށެވެ. އޭރު އެކުންފުނީގެ ޗެއާމަނަކަށް ހުންނެވީ ޔާމީނެއް ނޫނެވެ. ނަމަވެސް އެތަން ތަރައްގީކޮށް ކުރިއަރަން ފެށީ އެތަނުގެ ޗެއާމަނަކަށް ޔާމީން ވަޑައިގެންނެވުމުގެ ފަހުން ކަމަށް ވެސް މުއާ ވިދާޅުވިއެވެ.

ޔާމީންގެ ޗެއާމަން ކަމުގެ ދަށުގައި ސްޓެލްކޯގައި އިންޖީނިއަރުން އުފައްދަވައި އެތަނުގެ ގޮފިތައް ރަށްރަށުގައި އުފެއްދެވި ކަމަށްވެސް މުއާ ވިދާޅުވިއެވެ. "އެކުންފުންޏަށް ކުރިން މާލީ ދަތިކަން ދިމާވީ ޔާމީން ފަދަ ޗެއާމަނަކު ނެތިގެން،" އޭނާ ވިދާޅުވިއެވެ. ޔާމީން ލޭބަރމިނިސްޓްރީ ހިންގެވިއިރު ރާއްޖޭގައި ބިދޭސީން އިތުރުވެފައިވާ މައްސަލާގައި ޑރ. ހަސަނަށް ރައްދު ދެއްވަމުން މުއާޒު ވިދާޅުވީ ބިދޭސީން އިތުރުވެފައިވަނީ ވަކި މިނިސްޓްރީ އެއްގައި ވަކި މީހަކު ހުރެގެން ނޫންކަމަށެވެ. އަދި އެއީ ވަކި މީހަކު ކުރިކަމަކުން ދިމާވި މައްސަލައެއްވެސް ނޫން ކަމަށެވެ. "ޑރ. ހަސަން ފަދަ ޕީއެޗުޑީ ހައްދަވާފައިވާ އިލްމީ ބޭފުޅުން މިފަދަ ކަންކަމުގައި ރައްޔިތުންނަށް އޮޅޭފަދަ ގޮތަކަށް ވާހަކަ ދެއްކެވުމަކީ ދެރަކަމެއް،" ކަމަށްވެސް މުއާ ވިދާޅުވިއެވެ.

މުއާ ވިދާޅުވީ އައްޑޫސިޓީ ގައުމުގައި ހިންގި ގާމެންޓް ފެކްޓްރީގެ މުވައްޒަފުންގެ މުސާރައަށް 50 ރުފިޔާ އިތުރު ކުރުމަށް އެދުމުން އެކަން ޔާމީން ނުކޮށްދެއްވި ކަމަށް ދެއްކެވި ވާހަކަފުޅަކީ "ކަނޑައެޅިގެން ދޮގެއް" ކަމަށެވެ. ފެކްޓްރީ ހުއްޓާލަން ޖެހުނު ސަބަބު ވަރަށް ރަނގަޅަށް އައްޑޫ ރައްޔިތުންނަށް އެނގޭ ކަމަށްވެސް އޭނާ ވިދާޅުވިއެވެ. "އެވާހަކަ ޔާމީން ވަނީ އައްޑޫ ރައްޔިތުންނަށް ވަރަށް ރަނގަޅަށް ވިދާޅުވެ ދެއްވާފައި،" އޭނާ ވިދާޅުވިއެވެ.