ސާރިދޯޅެއްގެ ކިބައިން ސަލާމަތްކޮށްދިން ވަފާތެރި ކުއްތާ ކާލައިފި
9 ނޮވެމްބަރ 2013 15:48
ކެނެޑާގެ މީހަކު އޭނާ ސާރިދޯޅައެއްގެ ކިބައިން ސަލާމަތްކޮށްދިން ވަފާތެރި ކުއްތާ ކާލައިފިއެވެ.
އުމުރުން 44 އަހަރުގެ މާރކޯ ލަވޯއި ޏޮޓަވޭ އަށް ސާރިދޯޅެއް ހަމަލާ ދީފައިވަނީ ޖަންގައްޔެއްގައި ކޭމްޕް ޖަހައިގެން އުޅެނިކޮށްނެވެ. މިހަމަލާގައި ސާރިދޯޅު ވަނީ މާރކޯގެ ބޮއްކުރާއާއި، އޭނާގެ ކާބޯތަކެތި ބޭނުން ނުކުރެވޭވަރަށް ހަލާކު ކޮށްލައިފައެވެ.
ސާރިދޯޅުގެ ހަމަލާގެ ވަކިތަނުން މާރކޯ ސަލާމަތްކޮށްދިނީ އޭނާ ގެންގުޅޭ ޖަރމަން ޝެޕާޑް ކުއްތާއެވެ. މިހަމަލާއިން ސަލާމަތް ވުމަށްފަހު ކާނެ އެއްޗެއް ނެތިގެން އެންމެފަހުން އޭނާއަށް ޖެހުނީ ފުރާނަ ސަލާމަތް ކޮށްދިން ހަށިފާރަވެރި، ވަފާތެރި ކުއްތާ ކެއުމަށެވެ.
ބަނޑަށް ޖެހި މަޖުބޫރީ ހާލަތު ދިމާވުމުން އެންމެ ފަހުން ކުއްތާގެ މަސް ކައިގެން ހައިހޫނުކަން ފިލުވައިގެން ހުއްޓާ އޭނާ އެތަނުން ސަލާމަތް ކޮށްދީފައިވަނީ ފުލުހުންނެވެ.
ފުލުހުންނަށް އޭނާ ސަލާމަތްކުރަން އެސަރަހައްދަށް ދާން އެނގުނީ އޭނާ ގެއަށް ނައިސް މަސްދުވަހަށް ވުރެ ގިނަ ދުވަސްވެފައިވާތީ އޭނާގެ އާއިލާއިން އޭނާ ގެއްލިގެން ފުލުހުންނަށް އެންގުމުންނެވެ. އޭނާ ސަލާމަތްކުރިއިރު އޭނާވަނީ 90 ޕައުންޑް ލުއިވެފައެވެ.
ކިޔުންތެރިންގެ ހިޔާލު