އެސްޓީއޯ މުބާރާތުގައި މިއަދު ހެނދުނު ކުޅުނު މެޗުތައް ގުލްޒާރު، ރިއަލް އައިލެންޑް ކާމިޔާބުކޮށްފި

"އެސްޓީއޯ ހޯމްއިމްޕްރޫވްމަންޓް" ބަށި މުބާރާތުގައި މިއަދު ހެނދުނު ކުޅުނު މެޗްތައް ގުލްޒާރާއި ރިއަލް އައިލެންޑުން ކާމިޔާބު ކޮށްފިއެވެ.

ގުލްޒާރު މެޗް ކާމިޔާބު ކޮށްފައި ވަނީ ފީއަލި ޑިވެލޮޕްމަންޓް ސޮސައިޓީއާއި ވާދަކޮށް 28 ލަނޑު 10 ފޯލި ޖަހައިގެންނެވެ. ފީއަލީ ޑިވެލޮޕްމަންޓް ސޮސައިޓީއަށް ހެދިފައި ވަނީ 28 ލަނޑު އެވެ. އެ މެޗުގައި އެންމެ ގިނަ ފޯލި ސައި ކޮށްފައި ވަނީ 70 ފޯލި ޖަހައިގެން ގުލްޒާރުގެ ސިތުރާ އިދުރީސްއެވެ. އެ މެޗުގައި އެންމެ ގިނަ ފޯލި ހިފާފައިވަނީ ވެސް އެޓީމުގެ ރަޝީދާ އަބްދުއްރަހީމެވެ. އޭނާ ހިފައިފައި ވަނީ 18 ފޯއްޔެވެ.

މިއަދު ހެނދުނު ކުޅުނު ދެވަނަ މެޗުގައި ރިއަލް އައިލެންޑުން ފެއަރީ ކުއީންގެ މައްޗަށް ކުރި ހޯދާފައިވަނީ 37 ލަނޑު 3 ފޯލި ޖަހައިގެންނެވެ. ފެއަރީ ކުއީނަށް ކާމިޔާބު ކުރެވިފައި ވަނީ 17 ލަނޑު 7 ފޯއްޔެވެ. މި މެޗުގައި އެންމެ ގިނަ ފޯލި ސައި ކޮށްފައިވަނީ 97 ފޯލި ޖަހައިގެން ރިއަލް އަލެންޑްގެ އައިޝަތު ޝަފިއްޔާއެވެ. އެންމެ ގިނަ ފޯލި ހިފާފައި ވަނީ ވެސް އެ ޓީމްގެ އައިޝަތު މިންހާއެވެ. އޭނާ ހިފައިފައި ވަނީ 26 ފޯއްޔެވެ.

މިއަދު ހަވީރު ވެސްވަނީ މި މުބާރާތުގެ ދެ މެޗު ކުޅުމަށް ހަމަޖެހިފައެވެ. 15:30 ގައި ބައްދަލު ކުރުމަށް ހަމަޖެހިފައި ވަނީ ނ. މާފަރު ބަށި ޓީމާއި ފީއަލި އެކުވރި ޒުވާނުންގެ ގުޅުމާއެވެ. 16:30 ގައި ކުޅުމަށް ހަމަޖެހިފައި ވަނީ ކޮޅުފުށީ ޒުވާނުންގެ ޖަމިއްޔާ އާއި ހުޅުމާލެ ވިމެންސް ސްޕޯޓްސެވެ.