ކޮނޑޭގައި ގްރޭޑް އަށެއް އުފެއްދުމުގެ ޕްރޮޕޯސަލެއް މިނިސްޓްރީއަށް ހުށަހަޅައިފި

ހުވަދުއަތޮޅު އުތުރުބުރީ ކޮނޑޭ ސްކޫލުގައި ގްރޭޑް އަށެއް އުފެއްދުމަށްޓަކައި އެރަށު ރައްޔިތުންގެ ފަރާތުން އެޑިޔުކޭޝަން މިނިސްޓަރަށް ޕްރޮޕޯސަލެއް ހުށަހަޅައިފިއެވެ.

ރައްޔިތުންގެ ފަރާތުން މިނިސްޓަރަށް މިޕްރޮޕޯސަލް ހުށަހެޅުއްވީ ރައްޔިތުންގެ މަޖިލީހުގެ ގެމަނަފުށީ ދާއިރާގެ މެންބަރު ޖަމީލް އުސްމާނެވެ. ދުވަސް އަށް މައުލޫމާތު ދެއްވަމުން ޖަމީލް ވިދާޅުވީ ރައްޔިތުން ބޭނުންވަނީ އަންނަ އަހަރު އެރަށުގައި ގްރޭޑް 8 އުފައްދަން ކަމަށެވެ.

މިހާރުވެސް އެރަށުގެ ވަރަށްގިނަ ކުދިން ބޭރުރަށްރަށުގައި ސާނަވީއަށް ކިޔަވަމުންދާ ކަމަށް އޭނާ ވިދާޅުވިއެވެ. އެކަމަކު އެރަށުގައި ގްރޭޑް 8 އުފެދުމުން ބައެއް ކުދިންނަށް ރަށަށް އައިސް މައިން ބަފައިންގެ ގާތުގައި ތިބެގެން ކިޔެވުމުގެ ފުރުސަތު ލިބިގެންދާނެ ކަމަށެވެ. އޭނާ ވިދާޅުވީ ގްރޭޑް 8 އުފެއްދުމުން 9 އަދި 10 އެއް އުފެއްދުމަށް ފުރުސަތު ލިބިގެންދާނެ ކަމަށެވެ.

އާބާދީގައި 568 މީހުން ހިމެނޭ ކޮނޑޭަ ސްކޫލުގައި ގްރޭޑް 8 އުފެއްދުމުގެ ބޭނުމަކީ ރަށުގައި ތިބެގެން ކިޔެވުމުގެ ފުރުސަތު ހޯދައިދިނުމާއި، ސްކޫލުގެ ކިޔެވުމުގެ ފެންވަރު މަތިކުރުމާއި، ދަރިންނަށް ކިޔަވައިދޭން އެހެން ރަށްރަށަށް ދާންޖެހޭ ޖެހުން ހުއްޓުވުން ކަމަށެވެ. އޭގެ އިތުރަށް އެހެން ރަށްރަށަށް ދިޔުމުން ދިމާވާ އިޖުތިމާއީ މައްސަލަތައް ހައްލު ކުރުން ކަމަށްވެސް އޭނާ ވިދާޅުވިއެވެ.

ޖަމީލް ވިދާޅުވީ ކޮނޑޭ ޒުވާނުން ތިބީ ސަރުކާރުން ދެއްވާ ޓީޗަރުންނަށް ބޭނުންވާ ބައެއް ކަންކަން ކޮށްދޭން ތައްޔާރަށް ކަމަށެވެ. ގްރޭޑް އަށެއް އުފައްދައި ސްކޫލް ހިންގުމަށް ކުރަންޖެހޭ ޚަރަދު ހަމައެކަނި ސަރުކާރުން ކުރަން ނުޖެހޭނެ ކަމަށްވެސް އޭނާ ވިދާޅުވިއެވެ. އެ ސްކޫލް މަރާމާތު ކުރުމަށާއި އެފަދަ އެހެން ކަންކަމަށް ބޭނުންވާ ތަކެތި ސަރުކާރުން ދެއްވުމުން އެރަށު ޒުވާނުން ހިލޭ މަސައްކަތް ކުރަން ތައްޔާރަށް ތިބި ކަމަށްވެސް ޖަމީލް ވިދާޅުވިއެވެ.

އޭނާ ވިދާޅުވީ ވަރަށް މަދު ދަރިވަރުން އޯލެވެލްގައި ބައިވެރިކޮށްގެން ބައެއް ރަށްރަށުން ރަނގަޅު ކާމިޔާބު ހޯދައިފައިވާ ކަމަށެވެ. އެހެން ކަމުން ކޮނޑޭއިންވެސް އެފަދަ ކާމިޔާބީއެއް ހޯދާނެ ކަމަށް އުންމީދު ކުރައްވާ ކަމަށެވެ.

ޖަމީލް ވިދާޅުވީ ކޮނޑޭއަށް ނިސްބަތްވާ ވަރަށްގިނަ ޓީޗަރުން އެކި ރަށްރަށުގައި މިހާރުވެސް ވަޒީފާ އަދާކުރަމުންދާ ކަމަށެވެ. ކޮނޑޭގައި ގްރޭޑް 8 އުފެއްދުމުން އެ ޓީޗަރުންނަށް އަމިއްލަ ރަށުން ވަޒީފާ ލިބުމުގެ މަގުވެސް ހުޅުވޭނެ ކަމަށް ވިދާޅުވިއެވެ.

އޭނާ ވިދާޅުވީ އެޑިޔުކޭޝަން މިނިސްޓަރީން ވަނީ އެޕްރޮޕޯސަލަށް ރަނގަޅު ތަރުޙީބެއް ލިބިފައި ކަމަށެވެ.