ފާއިތުވީ ތިން އަހަރު ދުވަހުގެ ތެރޭގައި ސިއްހީ ދާއިރާއަށް އިންވެސްޓު ކޮށްފައެއް ނުވޭ: ރައީސް ޔާމިން

ފާއިތުވި ތިން އަހަރެއްހާ ދުވަހުގެ ތެރޭގައި ސިއްހީ ދާއިރާއަށް ސަރުކާރުން އިންވެސްޓުކޮށްފައި ނުވާކަމަށް ރައީސުލްޖުމްހޫރިއްޔާ އަބްދުﷲ ޔާމިން ވިދާޅުވެއްޖެއެވެ.

ރައީސްޔާމިން މިހެން ވިދާޅުވީ، ހިތަދޫގައި ރޭ ޕީޕީއެމްގެ "ހިޔާ ޖަގަހަ" ހުޅުވައި ދެއްވަމުންނެވެ. އެމަނިކުފާނު ވިދާޅުވީ، ސިއްހީ ދާއިރާ މިހާރު ވަނީ ވަރަށް ބޮޑަށް "ވީރާނާ" ވެފައިކަމަށެވެ. މިހެންކަމުން އެ ދާއިރާގެ މަސައްކަތްތައް އެމަނިކުފާނުގެ ބެއްލެވުމުގެ ދަށުން ކުރިއަށް ގެންދިއުމަށް ނިންމާފައިވާ ކަމަށެވެ.

މީގެ ކުރިން ސިއްހީ ދާއިރާ ހިންގަމުން އައީ ނައިބު ރައީސް މުހައްމަދު ޖަމީލް އަހުމަދުގެ ހިންގަވާ ސޯޝަލް ކައުންސިލްގެ ދަށުންނެވެ.

"ސިއްހީ ދާއިރާ ވީރާނާވެގެން ދިޔައީ ތަރައްގީއަށް އިސްކަންނުދީ ކަންކަން ކުރިއަށް ގެންދިއުމުން. ސިއްހީ ދާއިރާއަކީ ރައްޔިތުން ވަރަށް ބޮޑަށް ފެންބޮވައިގަނެފައި އޮތް ދާއިރާއެއް. ކުރިން ރަނގަޅަށް އޮތް ނަމަވެސް މިހާރު އެ ދާއިރާ ވަނީ ވަރަށްބޮޑަށް ވީރާނާވެފައި،" ޔާމިން ވިދާޅުވިއެވެ.

ރޭގެ ޖަލްސާގައި ވާހަކަ ދައްކަވަމުން ރައީސް ޔާމިން ވިދާޅުވީ އައްޑޫ ސިޓީ ހިތަދޫ ރީޖަނަލް ހޮސްޕިޓަލުގައި މައްސަލަތަކެއް އެބަހުރި ކަމަށް ގަބޫލުކުރައްވާ ކަމަށެވެ. އަދި އެ މަސައްކަތްތައް ހައްލު ކޮށްދެއްވުމަށް ވެސް މަސައްކަތް ކުރައްވާނެކަމަށެވެ.