ގަމު ޕެޓްރޯލް ޝެޑުން, ފޭރުމުގެ ތެރޭގައި ޒަހަމްކޮށްލި މުވައްޒަފުވެސް ހައްޔަރުކޮށްފި

ހައްދުންމަތީ ގަމު "ގްރެވިޓީ ޕެޓްރޯލް ޝެޑު" އިން ފައިސާތަކެއް ފޭރިގަތް ހާދިސާގައި ޒަހަމްކޮށްލި އެ ޝެޑުގެ މުވައްޒަފުވެސް ހައްޔަރުކޮށްފިއެވެ.

"ދުވަސް" ނޫހާ ވާހަކަ ދައްކަމުން ގަމު މީހަކު ބުނީ އެ ހާދިސާ ހިނގި ރޭގައި، ޝެޑުގައި ޕެޓްރޯލު އެޅުމުގެ މަސައްކަތް ކުރާ، ނަރުގިސް ހިޔާ ، އަލީ ހަސީބުގެ ބޮލަށް ތޫނު އެއްޗަކުން ހަމަލައިދީފައިވާކަމަށެވެ. އޭނާއަށް ހަމަލާދީފައިވަނީ މޫނު ނިވާކޮށްގެން ތިބި ދެ މީހުންކަމަށް ވެސް އޭނާ ބުންޏެވެ. އަދި އެރޭ ހައްޔަރު ކުރި މީހުންގެ ތެރޭގައި ހަސީބު ވެސް ހިމެނޭކަމަށް އޭނާ ބުންޏެވެ. 

މި މައްސަލައިގައި ހަތަރު މީހަކު ހައްޔަރުކޮށްފައިވާކަމަށް ފުލުހުން ވަނީ ހާމަކުރައްވާފައެވެ.  ފުލުހުން ބުނީ ފުރަތަމަ ދެ މީހުން ހައްޔަރު ކޮށްފައިވަނީ، އެ ހާދިސާ ހިނގިރޭގައި ކަމަށެވެ. އަދި އަނެއް ދެމީހުން ހައްޔަރު ކޮށްފައިވަނީ ޖެހިގެން އައި ހުކުރު ދުވަހު ކަމަށެވެ.

ހައްޔަރުކޮށްފައިވަނީ 19 އަހަރުގެ ފިރިހެނަކާ، 21 އަހަރުގެ ފިރިހެނަކާ، 22 އަހަރުގެ ފިރިހެނަކާއި، 23 އަހަރުގެ ފިރިހެނެކެއް ކަމަށް ފުލުހުން ބުނެއެވެ. ނަމަވެސް އެމީހުންގެ ވަނަވަރެއް ފުލުހުން ހާމައެއް ނުކުރެއެވެ.

ޕެޓްރޯލް ޝެޑުން ފޭރިގަތް ކަމަށް ބެލެވޭ 24 ހާސް އަށްވުރެ ގިނަ ރުފިޔާ ފުލުހުން ވަނީ ހޯދައިފައެވެ. މައުލޫމާތު ލިބިފައިވާ ގޮތުގައި އެ ފައިސާތައް ހޯދާފައިވަނީ ގަމުގައި އަލަށް މީހުން އާބަދުވާ ސަރަހައްދުގައި ހުރި ގެއެއްގެ ދިޔަދޮވި ތެރެއިންނެވެ. 

މި މައްސަލައިގައި ހައްޔަރުކުރި އެކަކުގެ ބަންދުގެ މުއްދަތަށް ކޯޓުން ވަނީ ހަތް ދުވަސް ދީފައިއެވެ. އަނެއް ތިން މީހުންގެ ބަންދުގެ މުއްދަތަށް ދީފައިވަނީ 10 ދުވަސް ކަމަށް ފުލުހުން ހާމަކުރެއެވެ.