އުމަރު ނަސީރުގެ މައްސަލައެއް ފުލުހުންނަށް އީވާ ހުށަހަޅުއްވައިފި

ހޯމް މިނިސްޓަރު އުމަރު ނަސީރު އިންޒާރު ދެއްވިކަމަށް ވިދާޅުވެ އެ މައްސަލަ ފުލުހުންނަށް ހުށަހަޅާފައިވާކަމަށް ގަލޮޅު ދެކުނު ދާއިރާގެ މެމްބަރު އީވާ އަބްދުﷲ ވިދާޅުވެއްޖެއެވެ.

މިއަދު އީވާ ކުރެއްވި ޓްވީޓެއްގައި އުމަރު ޖަހާފައިވާ ނަންބަރަކުން އޭނާއަށް ކޮށްފައިވާ ދެ އެސްއެމްއެސް އެއް ޝެއާކުރައްވައިފާވެއެވެ.

އެސްއެމްސް ތަކުގައި ވަނީ " ގައިމު ފުލުހުންވެސް ތިބީ މާށާއި އެކު، ކޮއްލާ އެއްމެ އޯޑަރަކުން ތި ކުޑަ ކުޑަ މަޖިލީސް މެންބަރުން ކުދިކުދި ކޮއްލެވިދާނެ ސެޕެޝަލް އޯޕީ ކުދިން ލައްވާ!، ތިގޮތަށް ބިރުދެއްކުމަށް މަޖިލީހަށް ހާޒިރި ކުރިއަސް އަޒުމެން ނުގުޑާނެ! ރައީސް ޔާމިންނާއި މޫނު ކަނޑުވާން މަސެއްކެތް ނުކުރޭ!" މިހެންނެވެ.

މިކަމާ ގުޅިގެން ދުވަސް ނޫހަށް މައުލޫމާތު ދެއްވަމުން އީވާ ވިދާޅުވީ އެ މެސެޖް ފޮނުވާފައިފައި ވަނީ އުމަރުގެ ނަމުންނާ ނަންބަރުން ކަމަށެވެ. އަދި މެސެޖުގެ މައްސަލަ މިހާރު ފުލުހުންނަށް ހުށަހަޅާފައިވާނެކަމަށެވެ.

"އަޅުގަނޑު ވާނީ މައްސަލަ ފުލުހުންނަށް ހުށަހަޅާފައި. މިއީ ހޯމް މިނިސްޓަރުގެ މައްސަލައެއް ނަމަވެސް ފުލުހުން ބަލައިދެއްވާނެކަމަށް އަޅުގަނޑު އުންމީދުކުރަން،" އީވާ ވިދާޅުވިއެވެ.

އީވާ މިހެން ވިދާޅުވި ކަމުގައިވިއަސް ހޯމް މިނިސްޓްރީގެ މީޑިއާ ކޯޑިނޭޓަރު ތަޒްމީލް އަބްދުއްސަމަދު ވިދާޅުވީ މަރުގެ އިންޒާރާއި އެނޫންވެސް އިންޒާރުތައް ދީ މަޖިލިސް މެމްބަރުންނަށް އެސްއެމްއެސް ކުރަމުން އަންނަނީ ރާއްޖޭން ބޭރުގެ ނަންބަރަކުން ކަމަށެވެ. އަދި އެ މައްސަލަ ފުލުހުންނާއި ހަވާލުކޮށްގެން ބަލަމުން އަންނަކަމަށެވެ.

އީވާ، މީދޫ ދާއިރާގެ މެމްބަރު ރޮޒެއިނާ އާދަމާއި، މައްޗަންގޮޅީ އުތުރު ދާއިރާގެ މެމްބަރު މާރިޔާ އަހުމަދު ދީދީ އަށް މި ހަފްތާ ތެރޭގައި މަރުގެ އިންޒާރުދީ އެސްއެމްއެސް ކޮށްފައިވެއެވެ. އެ އެސްއެމްއެސްގައި ބުނެފައި ވަނީ "ފާޑު ފާޑު ކުރަންޏާ މަރާލާނަން" ކަމަށެވެ. އެ މައްސަލަ ވެސް ފުލުހުންނަށް ވަނީ ހުށަހަޅައިފައެވެ.

މި މައްސަލައާއި ގުޅިގެން ފުލުހުން ބުނީ މަޖިލީހުގެ މެމްބަރުންނަށް މަރުގެ އިންޒާރުދީ އެސްއެމްއެސްތަކެއް ކޮށްފައިވާ މައްސަލަ މަޖިލީހުގެ އިދާރާއިން ސިޓީއަކުން ހުށަހަޅާފައިވާކަމަށެވެ. އަދި އެ މަސަލަ ފުލުހުން ބަލަމުން އަންނަކަމަށެވެ.