ސަރުކާރު ބަދަލުކުރަން އިންޑިއާގެ އެހީއަށް ނަޝީދު އެދުނީ އެމްޑީޕީގެ އެކްޓިވިސްޓުން ޗާޖުކޮށްލަން- މެންބަރު ޖަމީލް
30 ޖޫން 2014 16:58
ގެމަނަފުށީ ދާއިރާގެ މެންބަރު ޖަމީލް އުސްމާން މަޖިލީހުގެ ޖަލްސާއެއްގައި
ރައީސް ޔާމީންގެ ސަރުކާރު ބަދަލު ކުރަން އިންޑިއާގެ އެހީއަށް އެމްޑީޕީގެ ވަގުތީ ރައީސް، މުޙައްމަދު ނަޝީދު އެދިވަޑައިގެންނެވީ އެމްޑީޕީގެ އެކްޓިވިސްޓުން "ޗާޖު ކުރުމަށް" ކަމަށް ގެމަނަފުށީ ދާއިރާގެ މެންބަރު ޖަމީލް އުސްމާން ވިދާޅުވެއްޖެއެވެ.
ޖަމީލް ވިދާޅުވީ ރައީސް ނަޝީދަކީ އަބަދުވެސް އެޕާޓީގެ މެންބަރުން "ލޭކައްކުވާ" ޒާތުގެ ވާހަކަ ދައްކަވައިގެން ޕާޓީ ހިންގަވަމުން ގެންދަވާ ބޭފުޅެއް ކަމަށެވެ. ޕާޓީގެ ހަރަކާތްތައް ހަމަހިމޭންކޮށް ދާތީ އެމަނިކުފާނު ބޭނުންފުޅުވަނީ "އެކްޓިވިސްޓުން ޗާޖުކޮށްލައި، ހަރުގެތައް އެކްޓިވް ކޮށްލަން،" ޖަމީލް ވިދާޅުވިއެވެ. އޭނާ ވިދާޅުވީ ރައީސް ނަޝީދު އެދިވަޑައިގެންނެވިޔަސް ގާނޫނީ ސަރުކާރެއް ވައްޓާލަކަށް ނުވަތަ ބަދަލު ކުރުމަށް އިންޑިއާއިން އެހީ ނުވާނެކަން ނަޝީދަށްވެސް އެނގިވަޑައިގަންނަވާނެ ކަމަށެވެ.
"އިންޑިއާ އަކީ ބޮޑު ޑިމޮކްރަސީއެއް. އެފަދަ ސަރުކާރަކުން ރާއްޖޭގެ ގާނޫނީ ސަރުކާރު ވައްޓާލަން އެހީތެރި ނުވާނެކަން އެއީ އެންމެންސް ގަބޫލު ކުރާނެ ކަމެއް،" ޖަމީލް ވިދާޅުވިއެވެ.
މިމަހުގެ 22 ވަނަ ދުވަހުގެ ރޭ އެމްޑީޕީގެ ހަރުގޭގައި ބޭއްވި ޖަލްސާއެއްގައި ވާހަކަ ދައްކަވަމުން ރައީސް ނަޝީދު ވިދާޅުވެފައިވަނީ ޖީއެމްއާރު އެއްބަސްވުން ދިވެހިސަރުކާރުން އުވާލައި އެކުންފުނި ރާއްޖެއިން ފޮނުވާލުމުން ދިވެހި ދައުލަތަށް ލިބޭ ގެއްލުމަށް އިންޑިއާ ސަރުކާރުން ލުޔެއް ދެއްވުމަށެވެ. އެގޮތަށް ދެއްވާ ލުޔެއް ވެގެންދާނީ ރައީސް ޢަބްދުﷲ ޔާމީންގެ ސަރުކާރު ބަދަލު ކުރުމުގައި ރައްޔިތުންނަށް ދެއްވާ އެހީއަކަށް ކަމަށެވެ.
ރައީސް ނަޝީދު ވިދާޅުވެފައިވަނީ މިސަރުކާރަކީ މިހާރު ރައްޔިތުންގެ 25 އިންސައްތައިގެ ކުޑަ ތާއީދުއޮތް ސަރުކާރެއް ކަމަށެވެ. އެހެން ކަމުން ސަރުކާރު ބަދަލު ކުރަން ޖެހޭ ކަމަށެވެ. ސަރުކާރުގެ އަޣުލަބިއްޔަތު ނެތުނީ ޖުމްހޫރީޕާޓީ ކޯލިޝަނުން ވަކިކުރި ހިސާބުން ކަމަށް އެމްޑީޕީންދަނީ ބުނަމުންނެވެ. މިކަމާ ގުޅިގެން ޖަމީލް ވިދާޅުވީ ކޯލިޝަންގެ "އެއްބަސްވުމާ" މެދު ވިސްނާލަން ޖެހޭ ކަމަށެވެ.
ޕީޕީއެމްއިން ޖޭޕީއަށް ފޮނުވީ ހުށަހެޅުމެއް ކަމަށްވެސް އޭނާ ވިދާޅުވިއެވެ. އޭގައި ބުނެފައިވަނީ "ދެހާސްތޭރައިގެ އިންތިޚާބާއި، ދެހާސްތޭރައިގެ ލޯކަލް ކައުންސިލް އިންތިޚާބު އަދި ދެހާސްސާދައިގެ ރައްޔިތުންގެ މަޖިލީހުގެ އިންތިޚާބުގައި، ޕްރޮގްރެސިވް ޕާޓީއާއި، ޖުމްހޫރީ ޕާޓީ އިއްތިހާދުވުމަށް އެދި ހުށަހަޅާ ހުށަހެޅުން" ކަމަށެވެ.
ޖަމީލް ވިދާޅުވީ ރައްޔިތުން ވޯޓުދީފައިވަނީ ރައީސަށާއި، ނާއިބު ރައީސަށް ކަމަށެވެ. އެހެން ކަމުން އެމްޑީޕީން އެދައްކަނީ އެއްވެސް އަސާސެއްނެތް ވާހަކަތަކެއް ކަމަށްވެސް އޭނާ ވިދާޅުވިއެވެ.
ކިޔުންތެރިންގެ ހިޔާލު