ލަންކާއަށް ކުރިދަތުރުން ދެޤައުމުގެ ގުޅުން އިތުރަށް ހަރުދަނާވެގެން ހިނގައްޖެ: ރައީސް

ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ސްރީލަންކާއަށް ކުރެއްވި ދަތުރުފުޅަކީ، ވަރަށް ކާމިޔާބު ދަތުރުފުޅެއް ކަމަށް އެމަނިކުފާނު ވިދާޅުވެއްޖެއެވެ.

ދަތުރުފުޅަށްފަހު ރާއްޖެވަޑައިގެން އިބްރާހީމް ނާސިރު އިންޓަރނޭޝަނަލް އެއަރޕޯޓްގައި ނޫސްވެރިންނަށް މައުލުމާތު ދެއްވަމުން އެމަނިކުފާނު މިރޭ ވިދާޅުވީ މިދަތުރުފުޅުގެ ސަބަބުން ދެޤައުމުގެ ގުޅުންވެސް އިތުރަށް ހަރުދަނާވެގެން ހިނގައްޖެ ކަމަށެވެ.

އެމަނިކުފާނު ވިދާޅުވީ ސްރީލަންކާއަކީ ރާއްޖެއާ އެންމެ ގާތް އަވަށްޓެރި ޤައުމުކަމަށެވެ. އެމަނިކުފާނު ވިދާޅުވީ މިހާރު ރާއްޖޭގައި ސާދަވަރަކަށް ހާސް ދިވެހި ރައްޔިތުން އުޅެމުންދާ ކަމަށެވެ. އެމީހުންނަށް ޞިއްޙީ ދާއިރާގަޔާއި، ތަޢުލީމީ ދާއިރާގައި ކުރިމަތިވާ ދަތިތަކާއި އަދި ޑިޕެންޑެންޓް ވިސާ ހޯދުމުގައި ދިމާވާ ދަތިތައް ޙައްލުކުރެއްވުމާ ބެހޭގޮތުން ސްރީލަންކާ ސަރުކާރާ މަޝްވަރާ ކުރެއްވި ކަމުގައިވެސް ރައީސް ވިދާޅުވިއެވެ. އެކަންކަން ޙައްލުކޮށްދެއްވުމަށް މަސައްކަތް ކޮށްދެއްވާނެ ކަމުގެ ޔަޤީންކަން ސްރީލަންކާ ސަރުކާރުން ދެއްވި ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ ލަންކާއަކީ ރާއްޖެއާ އެންމެ ރަހުމަތްތެރި ގައުމުކަމަށް ވީހިދނު މާލޭގައި ހުންނަ ސްރީލަންކާ އެމްބަސީއަށް ބިމެއް ހަމަޖައްސަވައި ދެއްވުމަށް ނިންމަވާފައިވާ ކަމަށެވެ. އެކަން މިއަހަރުގެ ތެރޭގައި ހަމަޖެހިގެންދާނެ ކަމުގައި ވިދާޅުވިއެވެ.

މިދަތުރުފުޅުގައި، ސްރީލަންކާގައި ތިއްބަވާ ޢަރަބި ޤައުމުތަކުގެ ސަފީރުންނާ ބައްދަލުކުރެއްވި ކަމަށްވެސް ރައީސް ވިދާޅުވިއެވެ. އެބޭފުޅުންނާ ބައްދަލު ކުރެއްވުމުގެ ބޭނުންފުޅަކީ ޢަރަބި އިސްލާމީ ދުނިޔެއާއި ރާއްޖެއާ ދެމެދު ގުޅުން ބަދަހިކުރެއްވުން ކަމަށްވެސް ވިދާޅުވިއެވެ. މިގުޅުން އިތުރަށް ބަދަހިކުރައްވައި، ކަމާބެހޭ މަޝްވަރާތައް ކުރެއްވުމަށްޓަކައި ރައީސުލްޖުމްހޫރިއްޔާގެ ނާއިބު ޑޮކްޓަރ މުޙައްމަދު ޖަމީލް އަޙްމަދު، ޤަޠަރަށާއި، ކުވައިތަށާއި، ސަޢޫދީ ޢަރަބިއްޔާއަށް ފުރާވަޑައިގަތުމަށް ހަމަޖެހިފައިވާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ރައީސް ލަންކާއަށް ކުރެއްވި ދަތުރުފުޅުގައި ރައްޔިތުންގެ މަޖިލީހުގެ މެންބަރު، އަދި ޖުމްހޫރީ ޕާޓީގެ ލީޑަރު ޤާސިމް އިބްރާހީމާއި، ރައްޔިތުންގެ މަޖިލީހުގެ މެންބަރު، އަދި މޯލްޑިވްސް ޑިވެލޮޕްމަންޓް އެލަޔަންސްގެ ލީޑަރު އަޙްމަދު ސިޔާމް މުޙަންމަދާއި، މިނިސްޓަރ އޮފް ފޮރިން އެފެއާޒް ދުންޔާ މައުމޫނާއި، އަދިވެސް ބައެއް ވަޒީރުން ބައިވެރިވެ ވަޑައިގެންނެވިއެވެ.