ރާއްޖޭގައި ތިބި ސޯމާލިޔާގެ 40 މީހުން ފުރުވާލައިފި

ހާލުގައި ޖެހިފައިވަނިކޮށް ރާއްޖޭގެ އިގްތިސާދީ ސަރަހައްދުން ފެނިފައިވާ ސޯމާލިއާގެ 40 މީހުން އެގައުމަށް އިއްޔެ ފޮނުވާލައިފިއެވެ.

މިމީހުންނަކީ ތަފާތު 8 ފަހަރެއްގެ މަތިން ބެހިގެން ރާއްޖޭގެ ސަރަޙައްދާ ހަމައަށް އައިސްފައިވާ މީހުންނެވެ. ސޯމާލިޔާއަށް އިއްޔެ ފޮނުވާލާފައި ވަނީ 2009 ޑިސެމްބަރު 1 ވަނަ ދުވަހުން ފެށިގެން ރާއްޖޭގެ އިޤްތިޞާދީ ސަރަޙައްދަށް އާދެވިފައިވާ 40 މީހުންނެވެ.

މިމީހުން އެގައުމަށް ފޮނުވާލުމުގެ ކުރިން އެންމެންވެސްތިބީ ދޫނިދޫގައި، ދިވެހި ފުލުހުންގެ ބެލުމުގެ ދަށުގައި ކަމަށް ފުލުހުން ވަނީ ބުނެފައެވެ.

މިމީހުން އެގައުމަށް ފޮނުވާލާފައިވަނީ ދިވެހި ސަރުކާރާއި ޔޫ.އެން.އޯ.ޑީ.ސީ ގުޅިގެން ކުރި މަސައްކަތުންނެވެ. މިމީހުން ފޮނުވާލުމަށް މޯލްޑިވްސް ޕޮލިސް ސަރވިސްއާއި، މިނިސްޓްރީ އޮފް ފޮރިންއެފެއަރޒާއި، އިމިގްރޭޝަނާއި، އޭވިއޭޝަން ސެކިއުރިޓީން ވަނީ ބުރަ މަސައްކަތްތަކެއް ކޮށްފައި ކަމަށް ފުލުހުންވަނި ބުނެފައެވެ. މިމީހުން ސޯމާލިޔާއަށް ފޮނުވާލާފައި ޗާޓަރ ފްލައިޓެއްގައިވެ. މިމީހުންނާއެކު ސެކިއުރިޓީވެސް ދިޔައެވެ.

ސޯމާލިއާއަށް އިއްޔެ ފޮނުވާފައިވަނީ 2009 ޑިސެމްބަރު 01 ވަނަ ދުވަހު ރާއްޖޭގެ ސަރަހައްދުން ފެނުނު 7 މީހުންނާއި، އެމަހުގެ 27 ވަނަ ދުވަހު ފެނުނު 5 މީހުންނާއި، ޖެހިގެން އައި 2010 ވަނައަހަރުގެ މެއި 26 ވަނަ ދުވަހު ފެނުނު 7 މީހުންނާއި، އެ އަހަރުގެ ޖޫން މަހުގެ 5 ވަނަ ދުވަހު ފެނުނު 6 މީހަކާއި ޖުލައި މަހުގެ 2 ވަނަ ދުވަހު ފެނުނު 2 މީހަކާއި، އެއަހަރުގެ ނޮވެމްބަރު މަހުގެ 28 ވަނަ ދުވަހު ފެނުނު 7 މީހަކާއި އެމަހުގެ 30 ވަނަ ދުވަހު ފެނުނު 3 މީހެކެވެ. މީގެ އިތުރަށް 2011 ވަނަ އަހަރު ޑިސެމްބަރު 30 ވަނަ ދުވަހު ފެނުނު 3 މީހުންވެސް ހިމެނެއެވެ.