ފަރެސްމާތޮޑާ ގެއަކުން ތިޖޫރީއެއް ވަގަށްނެތި މައްސަލާގައި ހަތް މީހުން ހައްޔަރުކޮށްފި

ހުވަދުއަތޮޅު ދެކުނުބުރީ ފަރެސްމާތޮޑާގެ މާތޮޑާ އަވަށުން ވަގަށް ނަގާފައިވާ ތިޖޫރިއަކާއި އޭގައި ހުރި ބައެއް ފައިސާ ފުލުހުން ހޯދައިފިއެވެ.

ފުލުހުން ބުނެފައިވަނީ އެތިޖޫރީގައި ހުރި އެއްލަކައަށްވުރެ ގިނަ ރުފިޔާގެ ތެރެއިން 66000(ފަސްދޮޅަސް ހަހާސް) އަށްވުރެ ގިނަ ރުފިޔާ ހޯދާފައިވާ ކަމަށެވެ.

ފުލުހުން ބުނެފައިވަނީ އެ ތިޖޫރީ ގެއްލިގެން ފުލުހުންނަށް ހުށަހަޅާފައިވަނީ މިމަހުގެ 25 ވަނަ ދުވަހުގެ ރޭ 23:26 އެހާއިރު ކަމަށެވެ.

ފުލުހުންނަށް އެތިޖޫރީ ފެނިފައިވަނީ ހަލާކުކޮށްލުމަށްފަހު އެރަށު ފަޅު ގޯއްޗެއްގެ ތެރެއަށް އެއްލާލާފައި ވަނިކޮށް އިއްޔެ މެންދުރުގެ ވަގުތެއްގައެވެ. އަދި ތިޖޫރީގައި ހުރި ފައިސާ ފެނިފައިވަނީ ގަސްތަކެއްގެ ތެރޭގައި ވަޅުލާފައި ހުއްޓައި ކަމަށްވެސް ފުލުހުންވަނީ ހާމަކުރައްވާފައެވެ.

މައުލޫމާތު ލިބިފައިވާ ގޮތުގައި މިތިޖޫރިއަކީ އެރަށު މެޖިސްޓްރޭޓް ޖައުފަރު ރަޝީދު ހުސައިން ގެ ގެއިން ވަގަށް ނަގާފައިވާ ތިޖޫރިއެކެވެ.

މިމައްސަލާގައި ތުހުމަތުކުރެވޭ 7 މީހަކު ވަނީ ފުލުހުންގެ ބެލުމުގެ ދަށަށް ގެނެސްފައި ކަމަށްވެސް ފުލުހުން ހާމަކުރައްވާފައިވެއެވެ.

މިމައްސަލަ ފުލުހުން ގެންދަނީ ތަހުގީގު ކުރަމުންނެވެ.