ނޭޕާލުގެ ޤާނޫނުހަދާ މަޖިލީހުން އެޤައުމުގެ ބޮޑުވަޒީރު އިންތިޚާބުކޮށްފި

ނޭޕާލުގެ ޤާނޫނުހަދާ މަޖިލީހުން އެޤައުމުގެ ބޮޑުވަޒީރަކަށް އެޤައުމުގެ އެންމެ ގިނަދުވަސްވީ އަދި އެންމެ މެމްބަރުން ގިނަ ޕާޓީގެ ލީޑަރު ސުޝިލް ކޮއިރަލާ އިންތިޚާބުކޮށްފިއެވެ.

601 މެމްބަރުންގެ މެދުގައި ނެގިވޯޓުގެ ތިންބައިކުޅަ ދެބައި ވޯޓު 76 އަހަރުގެ ކޮއިރަލާވަނީ ކާމިޔާބުކޮށްފައެވެ. އެޤައުމުގެ ދެވަނައަށް އެންމެ މެމްބަރުންގިނަ ޕާޓީކަމުގައިވާ ކޮމިއުނިސްޓް ޕާޓީންނާއި އަދި އެނޫންވެސް ބައެއް ކުދި ޕާޓީތަކުންވަނީ ކޮއިރަލާއަށް މަޖިލިސްތެރޭގެ މިއިންތިޚާބުގައި އެއްބާރުލުންދީފައެވެ.

ބޮޑުވަޒީރަކަށް ކޮއިރަލާ ހޮވުމުން އޭނާއަށް ތާއީދުކުރާ މީހުންވަނީ ޤާނޫނުހަދާ މަޖިލީހުގެ އިމާރާތުގެ ކައިރިއަށް އެއްވެ އުފާފާޅުކޮށްފައެވެ.

ނޭޕާލުގެ ރަސްގެފާނާ ދެކޮޅަށް އަޑުއުފުލުމުން ކޮއިރަލާވަނީ 6 އަހަރު ޖަލުގައި ހޭދަކޮށްފައެވެ. އަދި މީގެ އިތުރުން އޭނާވަނީ އިންޑިއާގައި 20 އަހަރު ހޭދަކޮށްފައެވެ.

"އަޅުގަނޑުމެންގެ ޕާޓީން އެޕާޓީގެ މަސްއޫލިއްޔަތު، އާދެ، ޑިމޮކްރެޓިކް ޤާނޫނު އަސާސީއެއް އެކުލަވާލުމާއި ސުލްޙަ ޤާއިމްކުރުމުގެ މަސައްކަތް ކުރާނެ. އާޤާނޫނު އަސާސީގެ ޑްރާފްޓް ތައްޔާރު ކުރުމުގެ މަސައްކަތް އަޅުގަނޑުމެން ކުރާނަން،" ކޮއިރަލާ އޭނާގެ ކެމްޕެއިން ޖަލްސާއެއްގައި ހާމަކޮށްފައިވެއެވެ.