މައްކާގެ ގަވަރުނަރަކަށް ސައުދީ ރަސްގެފާނުގެ ދަރިކަލެއް ކަމަށްވާ މިޝާލް ހަމަޖައްސަވައިފި

މައްކާގެ ގަވަރުނަރަކަށް ސައުދީ ރަސްގެފާބުގެ ދަރިކަލެއް ކަމަށްވާ އަމީރު މިޝާލް ހަމަޖައްސަވައިފިއެވެ.

އޭނާ މިގާމަށް ހަމަޖެއްސެވީ ފާއިތުވި 6 އަހަރު މައްކާގެ ގަވަރުނަރުކަން އުމުރުފުޅުން 73 އަހަރުގެ އަމީރު ޚާލިދަށް އެޑިޔުކޭޝަން މިނިސްޓަރުކަން ދެއްވުމަށްފަހުއެވެ. އަމީރު ޚާލިދަށް އެޑިޔުކޭޝަން މިނިސްޓަރކަން ދެއްވީ ކުރިން މަޤާމުގައި ހުންނެވި ރަސްގެފާނުގެ ދަނބިދަރި އެއްކަމުގައިވާ އަމީރު ފައިސަލް މަޤާމުން އިސްތިއުފާ ދެއްވުމަށް އެދިވަޑައިގެންނެވުމުންނެވެ.

ސައުދީ ޕްރެސް އެޖެންސީ އިން އާދީއްތަ ދުވަހު ހާމަކުރައްވާފައިވާ ގޮތުގައި އުމުރުފުޅުން 43 އަހަރުގެ، އަމީރު މިޝާލް އާދީއްތަ ދުވަހު މަގާމާ ހަވާލުވެވަޑައިގަންނަވާނެއެވެ. އަމީރު މިޝާލް ކުރިން ހުންނެވީ ސައުދީގެ ފަރުބަދަމަތީ ސަރަޙައްދެއް ކަމުގައިވާ ޔަމަނާއި ސައުދީގެ ބޯޑަރު ކައިރީގައިވާ އިސްމާޢިލީ ޝީޢައީންގެ އާބާދީއެއް އޮންނަ ނަޖްރާންގެ ގަވަރުނަރަކަށެވެ.

އުމުރުފުޅުން 43 އަހަރުގެ އަމީރު މިޝާލް އަކީ ރަސްގެފާނުގެ 6 ވަނަ ދަރިކަލުންނެވެ. މުސްލިމުން އަޅުކަންކުރުމަށް ދާ މުޤައްދަސުވެގެންވާ ގެފުޅު ހުންނަ މައްކާގެ ގަވަރުނަރަކަށް މިޝާލް ހަމަޖައްސަވާފައިވާއިރު އޭނާގެ ގަވަރުނަރު ކަމުގެ ދަށުގައި، ބޮޑު ރަތްކަނޑުގެ ގެ ސިޓީކަމުގައިވާ ޖިއްދާވެސް ހިމެނެއެވެ.

ރަސްގެފާނުގެ ދަރިދަރިކަލުންގެ ތެރެއިން އަމީރު މުތައިބަކީ ސައުދީ އަރަބިއްޔާގެ ސަލާމަތީ ބާރުގެ އިސްވެރިޔާއެވެ. އަދި އެހެން ދަރިކަލެއް ކަމަށްވާ އަމީރު ޢަބްދުލްއަޒީޒަކީ ފޮރިން މިނިސްޓްރީގެ ނާއިބެވެ. އަދި އަމީރު ތުރުކީ އަކީ ވެރިރަށް ރިޔާޟުގެ ޑެޕިއުޓީ ގަވަރުނަރެވެ.