ސައުދީ ޢަރަބިއާއިން އދ.ގެ ސަލާމަތީ މަޖިލީހުގެ މެމްބަރުކަން ޤަބޫލުކުރުމަށް ދެކޮޅު ހަދައިފި
20 އޮކްޓޯބަރ 2013 23:28
ސައުދި ޢަރަބިއާއިން އދ. ސަލާމަތީ މަޖިލީހުގެ މެމްބަރުކަން ޤަބޫލުކުރުމަށް ދެކޮޅު ހަދައިފިއެވެ.
ސައުދީ ޢަރަބިއާއިން ހާމަކޮށްފައިވާ ގޮތުގައި އެޤައުމުން އދ. ގެ ސަލާމަތީ މަޖިލީހުގެ މެމްބަރުކަން ޤަބޫލުކުރުމަށް ދެކޮޅު ހެދީ އދ.ގެ އެމަޖިލީހަކީ ދުނިޔޭގައި ހިނގަމުންދާ ބޮޑެތި ހަމަނުޖެހުންތަކާއި ހަނގުރާމަތައް ހުއްޓުވުމަށް އެއްވެސް ޤާބިލިއްޔަތުކަމެއް ނެތް މަޖިލީހަކަށް ވާތީއެވެ.
ސައުދީ ޢަރަބިއާއިން އދ. ގެ ސަލާމަތީ މަޖިލީހުގެ މެމްބަރުކަމަށް ދެކޮޅު ހަދާފައިވަނީ އެމަޖިލީހުގެ ދާއިމީ ނޫން ދިހަ މެމްބަރު ޤައުމުތަކުގެ ލިސްޓަށް އިންތިޚާބުވުމުގެ ދާދި ކުޑައިރުކޮޅެއް ތެރޭއެވެ.
ސައުދީ ޢަރަބިއާގެ ރަސްމީ ޚަބަރުފަތުރާ ވަސީލަތްކަމަށްވާ ސައުދީ ޕްރެސް އޭޖެންސީ އިން ހުކުރު ދުވަހު ހާމަކޮށްފައިވާގޮތުގައި، ސައުދީ ޚަރިޖީ ވުޒާރާއިން ދެކޭގޮތުގައި ސޫރިޔާގެ މައްސަލާގައި އދ. ގެ ސަލާމަތީ މަޖިލީސްވަނީ ފެއިލްވެފައެވެ.
ސައުދީ ޚަރިޖީ ވުޒާރާއިން އިތުރަށް ތުހުމަތުކުރާގޮތުގައި ސޫރިޔާގެ މައްސަލާގައި އދ. ގެ ސަލާމަތީ މަޖިލީސް ފެއިލްވުމުގެ ސަބަބުން ސޫރިޔާގެ ހައްދުފަހަނައަޅާފައިވާ އަނިޔާވެރި ޚުދުމުޚްތާރު ވެރިޔާ ބައްޝާރު އަސަދަށް އެޤައުމުގެ ރައްޔިތުންނާއި ދެކޮޅަށް ހިންގަމުން އަންނަ ލާއިންސާނީ ޢަމަލުތަކާއި ޤަތުލުއާންމު ހިންގުމަށް އިތުރު ހިތްވަރެއް ލިބިގެންދިޔައެވެ. އަދި މިއީ ބައްޝާރަށް ކެމިކަލް ހަތިޔާރު އިތުރަށް ބޭނުންކުރުމަށް ލިބުނު ވަރަށް ބޮޑު ހިތްވަރެއް ކަމުގައިވެސް ސައުދީ ޢަރަބިއާއިން ހާމަކޮށްފައިވެއެވެ.
މީގެއިތުރުން، ސައުދީ ޢަރަބިއާ ގެ ޚާރިޖީވުޒާރާއިންވަނީ ފަލަސްތީނާއި އެޤައުމުގައި ހަންފަތުރަމުން އަންނަ ޓެރަރިސްޓް ޔަހޫދީންގެ މައްސަލަވެސް އދ.ގެ ސަލާމަތީ މަޖިލީހަށް ޙައްލުވެފައި ނުވާތީ އެކަން ވަރަށް ބޮޑަށް ކުށްވެރިކޮށްފައެވެ.
ކިޔުންތެރިންގެ ހިޔާލު