ސޫދާނުގެ ނާއިބުރައީސް އިސްތިއުފާދީފި

ސޫދާނުގެ އެންމެ ފުރަތަމަ ނާއިބު ރައީސް ޢަލީ ތާހާ އިސްތިޢުފާ ދެއްވައިކަމަށް އެގައުމުގެ ރައީސް ޢުމަރް އަލްބަޝީރު އިޢުލާން ކުރައްވާފައިވާކަމަށް ޚަބަރުފަތުރާ ވަސީލަތްތަކުން ހާމަކޮށްފިއެވެ.

ނާއިބު ރައީސް ތާހާ އަކީ އެޤައުމުގެ ދެވަނައަށް އެންމެ އިސް ވެރިޔާއެވެ. އަދި އޭނާއަކީ ސޫދާނުގެ ދާޚިލީ ހަނގުރާމައަށް ނިމުމެއް ގެނައި 2005 އަހަރުގެ ސުލްހައިގެ އެއްބަސްވުމުގެ އެންމެ އިސް ވިލަވެރެސް ވެރިޔާއެވެ.

"އެމަނިކުފާނު އިސްތިއުފާދެއްވީ ޒުވާނުންނަށް ފުރުސަތުދެއްވުމަށް. އަޅުގަނޑާއި އެމަނިކުފާނާއި ދެމެދު އެއްވެސް ދެބަސްވުމެއް ނެތް،" ރައީސް ބަޝީރު ވިދާޅުވެފައިވާކަމަށް އެޤައުމުގެ ނޫސްތަކުން ބުނެއެވެ.

ރައީސް ބަޝީރުވަނީ އެޤާއުމުގެ ކެބިނެޓަށް ބަދަލު ގެންނެވުމަށްޓަކައި ވެރިކަން ކުރާ ޕާޓީ ނެޝަނަލް ކޮންގްރެސް ޕާޓީގެ އިސްވެރިންނާއި އެކު ބައްދަލުވުމެއް ބާއްވައި މުޅިން އައު، ޒުވާން 5 މިނިސްޓަރުން އައްޔަނު ކުރައްވާފައެވެ.

ދެވަނަ ނައިބު ރައީސެއްގެ ގޮތުން އާދީއްތަ ދުވަހުގެ ރޭ 1 ޖެހި އިރު ހަސްބޯ މުޙައްމަދު ޢަބްދުއްރަޙްމާން ވަނީ ހަމަޖައްސަވާފައެވެ. އަދި ޕާލިމެންޓުގެ އިސްވެރިޔަކަށް އައްޔަނު ކުރައްވާފައިވަނީ އަލްފާތިޙް ޢިއްޒުއްދީނެވެ.

ތެލުގެ ސަބްސިޑީސްތައް ކަނޑާލުމުގެ ސަބަބުން ރައީސް ބަޝީރުގެ ސަރުކާރަށް ސޫދާނުގެ ގިނަ ރައްޔިންގެ ނުރުހުންތެރިކަންވަނީ އަމާޒުވެފައެވެ. އަދި މީގެ ސަބަބުން ހިނގި ހަމަނުޖެހުންތަކުގައި 200 އަށް ވުރެ ގިނަ ރައްޔިތުން މަރުވެފައިވެއެވެ. އަދި ސަރުކާރާއި ދެކޮޅަށް ބޭއްވުނު މުޒާހަރާތަކުގައި 700 އަށް ވުރެ ގިނަ މީހުންވަނީ ހައްޔަރުކޮށްފައެވެ.