ދެއަހަރުތެރޭ ފައިސާ ދައްކާ ގޮތަށް އިންޖީނު ދޫކުރާގޮތަށް ހަމަޖައްސައިފި

ދެއަހަރުތެރޭ ފައިސާ ދައްކައި ޚަލާސް ކުރާ ގޮތަށް އެމްޓީސީސީން އިންސްޓޯލްމެންޓަށް ޔަންމާ އިންޖީނު ދޫކުރާގޮތަށް ހަމަޖައްސައިފިއެވެ.

އެކުންފުނިން މިހާރު ކުރިއަށް ގެންދާ "ކަށަވަރު ޕްރޮމޯ" އާ ބެހޭ މަޢުލޫމާތު ނޫސްވެރިންނަށް ދެއްވަމުން އެކުންފުނީގެ ސީނިއަރ މެނޭޖަރ ސޭލްސް އަޙުމަދު ފާތިޙް ވިދާޅުވީ އިންޖީން ދޫކުރުމުގެ ފުރުސަތު މި އަހަރު ކުރީކޮޅ ހުޅުވާނެ ކަމަށެވެ. އޭނާ ވިދާޅުވީ އިންސްޓޯލްމެންޓަށް އިންޖީން ދޫކުރުމުގެ އިތުރަށް އޭގެ ސްޕެއަރ ރަށްރަށުން ލިބޭނެ އިންތިޒާމްވެސް ހަމަޖައްސަވާނެ ކަމަށެވެ އެކަންވެސް މިއަހަރު ކުރީކޮޅު ހަމަޖެހޭނެ ކަމަށް އޭނާ ވިދާޅުވިއެވެ.

މިމިދިޔަ އަހަރުގެ ޑިސެމްބަރ 6 އިން ފެށިގެން ކުރިއަށް ގެންދާ މި ޕްރޮމޯޝަނުގައި ސުޒުކީ އިންޖީނާއި ސިގްމާ މެރިން ދަވާދާއި، ކާސްޓްރޯލް އަޑީތެލާއި އިންޖީނުގެ ސްޕެއަރ ޕާޓްސްތަކުން ވަރަށް ޚާއްސަ ޑިސްކައުންޓެއް ދެމުން ގެންދެއެވެ.

"ކަށަވަރު ޕްރޮމޯ" ގައި އެއްލައްކަ ރުފިޔާގެ އިނާމެއްވެސް ހުށަހަޅާފައިވެއެވެ. މިމަހުގެ ނިޔަލަށް ކުރިއަށް ގެންދާ މި ޕްރޮމޯޝަނުގައިކުރާ ކޮންމެ 5000 ރުފިޔާއިން މަތީގެ ވިޔފާރިއަކަށް ކޫޕަނެއް ލިބޭނެއެވެ. ގުރުއަތުން ހޮވޭ ނަސީބުވެރި ފަރާތަކަށް 100،000 ރުފިޔާގެ "ކަށަވަރު ގިފްޓް ވައުޗަރ" އެއް ލިބޭނެއެވެ.

މި ޕްރޮމޯޝަނުގައި ސުޒުކީ ބްރޭންޑުގެ އިންޖީނުގެ ތަފާތު މޮޑެލް ތަކުން 1000 ރުފިޔާއިން ފެށިގެން 15،000 ރުފިޔާ ހަމައަށް ޑިސްކައުންޓް ލިބޭނެއެވެ.