ކިޔުގައި މަޑުނުކޮށް 5000 އަށްވުރެ ގިނަ ކަސްޓަމަރުން ބީއެމްއެލް އިން ޚިދުމަތް ހޯދައިފި

ކިޔުގައި މަޑުނުކޮށް 5000 އަށްވުރެ ގިނަ ކަސްޓަމަރުން ބޭންކްއޮފް މޯލްޑިވްސް (ބީއެމްއެލް) އިން ޚިދުމަތް ހޯދައިފި ކަމަށް އެބޭންކުން މިއަދު ބުނެފިއެވެ.

ކިޔުގައި މަޑުނުކޮށް ކަސްޓަމަރުން ޚިދުމަތް ހޯދާފައިވަނީ މިމަހުގެ 11 ވަނަ ދުވަހު ބޭންކުން ތަޢާރަފްކުރި ޗެކު އަދި ފައިސާ ޖަމާކުރާ އޭޓީއެމްތައް ބޭނުން ކޮށްގެންނެވެ. ބީއެމްއެލްއިން ބުނެފައިވާ ގޮތުގައި ފާއިތުވި 6 ދުވަހަށް އެކަނި ބެއްޔަސް އެޚިދުމަތަށް ކަސްޓަމަރުންގެ ވަރަށް ބޮޑު ތަރުހީބެއް ވަނީ ލިބިފައެވެ.

ބީއެމްއެލްއިން ވަނީ މާލޭގެ 5 ސަރަހައްދެއްގައި މިޚިދުމަތް ލިބޭ އޭޓީއެމްތައް ބަހައްޓާފައެވެ. އެތަންތަނުން ހަފްތާއަކު 7 ދުވަހު 24 ގަޑިއިރު މުޅިން ހިލޭ ޚިދުމަތް ލިބޭނެއެވެ.

މި އޭޓީއެމްތައް ބަހައްޓާފައިވާ ސަރަޙައްދުތަކަކީ މެއިން ބްރާންޗް ތިރީބުރި، މަޖީދީ މަގު ބްރާންޗް، ބީއެމްއެލް ލައިޓް، ވެލާނާގެ، އާޓިފިޝަލް ބީޗާ ދިމާއިން ބޮޑު ތަކުރުފާނު މަގުގައެވެ.

އޭޓީއެމް މެދުވެރިކޮށް ފައިސާ ނެގުމުގެ އިތުރުން، ފައިސާ އަދި ޗެކު ޖަމާކުރުމުގެ ޚިދުމަތާއި ފައިސާ ޓްރާންސްފަރ ކުރުމާއި ލޯނު އަދި ކްރެޑިޓް ކާޑަށް ފައިސާ ދެއްކުމުގެ ޚިދުމަތް މިހާރު ލިބޭނެއެވެ. މި ޚިދުމަތާއި ގުޅިގެން ބޭންކުގެ ރީޓޭލް ބޭންކިންގ ޑައިރެކްޓަރ މުޙައްމަދު ޝަރީފް ވިދާޅުވީ "މި ޚިދުމަތަކީ ކަސްޓަމަރުންނަށް ލުއި ފަސޭހަ ގޮތެއްގައި ލިބޭ ޚިދުމަތަކަށް ވާތީ ކަސްޓަމަރުންގެ ފަރާތުން ވަރަށް ބޮޑު ތަރުހީބެއް އަންނަނީ ލިބެމުން. އޭޓީއެމް މެދުވެރިކޮށް ފައިސާ ޖަމާކުރުމުން ވަގުތުން އެކައުންޓަށް ޖަމާވާނެ. އަދި ހަމަ އެހެންމެ ޖަމާކުރާ ޗެކުތައް ލަސްނުކޮށް މިދަނީ އެކައުންޓަށް ޖަމާކުރެވުމުން. މިހާރު ކަސްޓަމަރުން ބްރާންޗުތަކުން މި ޚިދުމަތް ހޯއްދެވުމަށް ކިއޫގައި މަޑުކުރާކަށް ނުޖެހޭނެ. މިކަމުގެ ސަބަބުން ބްރާންޗުތަކަށްދާ ކަސްޓަމަރުންގެ އަދަދު ކުރިމަގުގައި ވަރަށް ބޮޑަށް މަދުވެގެންދާނެ،" ކަމަށެވެ.

އޭގެ އިތުރަށް އޭނާ ވިދާޅުވީ "އަޅުގަނޑުމެން ފާހަގަ ކޮށްލަން ބޭނުންވޭ މާލެ 5 ސަރަޚައްދަކުން މިޚިދުމަތް ލިބެން ހުރިކަން. މި ޚިދުމަތަށް ކަސްޓަމަރުން އިތުރަށް އަހުލުވެރިކުރުމުގެ ގޮތުން ޚިދުމަތާއި ބެހޭ އިތުރު މަޢުލޫމާތު ދިނުމުގެ ޕްރޮގްރާމްތަކެއްވެސް ކުރިއަށް ގެންދިއުމަށް ވަނީ ހަމަޖެހިފައި. ކަސްޓަމަރުންގެ ފަރާތުން ވަރަށް ރަނގަޅު ފީޑްބެކް ވަނީ ލިބިފައި." ކަމަށެވެ. އެކަމަށްޓަކައި ޝުކުރުވެރިވާ ކަމަށްވެސް ވިދާޅުވިއެވެ.

ބޭންކުން ދަނީ އަތޮޅުތެރޭ ރަށްތަކަށް ދެމުންދާ ޚިދުމަތްތައް އިތުރުކޮށް އަދި ކަސްޓަމަރުންނަށް އާ ޚިދުމަތް ތަޢާރަފްކުރުމަށް ނިންމާފައިވާ ނިންމުމާ އެއްގޮތަށް މަސައްކަތްކުރަމުން ކަމަށްވެސް ބީއެމްއެލް އިން ވަނީ ބުނެފައެވެ.