އެޓީއެމް މެދުވެރިކޮށް އިތުރު ޚިދުމަތްތަކެއް ބީއެމްއެލްއިން ތަޢާރަފް ކޮށްފި

އޭޓީއެމް މެދުވެރިކޮށް އިތުރު ޚިދުމަތްތަކެއް ބޭންކްއޮފް މޯލްޑިވްސް (ބީއެމްއެލް) އިން މިއަދު ތަޢާރަފްކޮށްފިއެވެ.

މިޚިދުމަތްތަކުގެ ތެރޭގައި ފައިސާ ޖަމާކުރުމާއި، ޓްރާންސްފަރ ކުރުމާއި، ބިލްތަކަށް ފައިސާ ދެއްކުމުގެ ޚިދުމަތް މިއަދު ތަޢާރަފްކޮށްފިއެވެ. މިޚިދުމަތް ތަޢާރަފް ކުރުމުން މާލޭގެ ބްރާންޗުތަކުގައި ކިއޫގައި މަޑުނުކޮށް ޚިދުމަތް ހޯދިދާނެ ކަމަށްވެސް ބީއެމްއެލްއިން ބުނެފައިވެއެވެ.

ނޫސްވެރިންނަށް މަޢޫލޫމާތު ދިނުމަށް މިއަދު އެބޭންކުގައި މައިއޮފީހުގައި ބޭއްވި ބައްދަލުވުމެއްގައި ބޭންކުގެ ސީއީއޯ އަދި މެނޭޖިންޑިރެކްޓަރ އެންޑްރޫ ހީލީ ވިދާޅުވީ އެބޭންކުން މިއަދު ވަނީ ޒަމާނީ ފެންވަރުގެ 22 އޭޓީއެމް މާލޭގެ 5 ތަނެއްގައި ބަހައްޓައި ޚިދުމަތްދޭން ފަށައިފައި ކަމަށެވެ.

މިމެޝުިންތަކުން ކޮންމެ ދުވަހެއްގެ ކޮންމެ ވަގުތެއްގައިވެސް ޚިދުމަތް ލިބެން ހުންނާނެ ކަމަށް އެންޑްރޫ ވިދާޅުވިއެވެ. ނަމަވެސް ވަގުތީ ގޮތުން ޚިދުމަތް މެދުކެނޑުން ފަދަ ކަމެއް ދިމާނުވާނޭ ކަމަށް ބުނަން ނޭނގޭ ކަމަށް ބޭންކުން ބުނެފައިވެއެވެ. ނަމަވެސް އެކަން ހައްލު ކުރުމަށް ވަރަށް ބޮޑަށް މަސައްކަތް ކުރާ ކަމަށްވެސް ބުންޏެވެ.

އަލަށް ބެހެއްޓި ޒަމާނީ މެޝިންތަކުގެ ސަބަބުން ކުދި ވިޔާފާރިކުރާ މީހުންނާއި ފިހާރަ ބަންދުކުރުމަށްފަހު ފަސޭހަ ކަމާއެކު ޗެކާއި ފައިސާ ޖަމާ ކުރުމިގެ ޚިދުމަތް ލިބިގެންދާނެ ކަމަށްވެސް އެންޑްރޫ ވިދާޅުވިއެވެ. އެގޮތަށް ހެދުމުން އެރެއެއްގެ ފައިސާ ވަގުތުން ޖަމާ ކުރެވޭނެ ކަމަށްވެސް ވިދާޅުވިއެވެ. މީގެ އިތުރަށް ލޯނަށް ފައިސާ ދެއްކުމާއި، އަމިއްލަ ފަރާތްތަކުން ބިލްތަކަށް ފައިސާ ދެއްކުމުގެ އިތުރުން ލޯން އަދި ކްރެޑިޓް ކާޑަށްވެސް ފައިސާ ދެއްކޭނެ ކަމަށް އޭނާ ވިދާޅުވިއެވެ.

މީގެ ސަބަބުން ކަސްޓަމަރުން ބްރާންޗަށް ގޮސް ކިއުގައި މަޑުކުރުމެއްނެތި ހަފްތާއަކު 7 ދުވަހު 24 ގަޑިއިރު ޚިދުމަތް ލިބޭނެ ކަމަށް އެންޑްރޫ ވިދާޅުވިއެވެ.

"ބޭންކަށް ގޮސް އެތަކެއް ގަޑިއިރެއް ހޭދަކުރަން އެބަޖެހޭ. އެއީ އަޅުގަނޑުމެން ބަދަލުކުރަން ބޭނުންވާ ކަމެއް. ދުނިޔޭގެ އެހެން ގައުމުތަކުގައި، ހިނގާ މުޢާމަލާތްތަކުގެ %60 ކުރެވެނީ އޭޓީއެމް އަދި އިންޓަރނެޓް ބޭންކިންގ މެދުވެރިކޮށް.އަދި ކަސްޓަމަރުން ބްރާންޗަށް ދާނަމަ 10 ނުވަތަ 15 ވަރަކަށް މިނެޓްތެރޭގައި ޚިދުމަތް ލިބޭ. އަޅުގަނޑުމެން ބޭނުމީ އެ ފެންވަރަށް ޚިދުމަތް ދޭން. މިކަން ހާޞިލްކުރުމަށް ވަގުތު ނަގާނެ، އެކަމަކު އަޅުގަނޑުމެން މިތިބީ މިކަމަށް އަޒުމް ކަނޑައަޅައިގެން." އެންޑްރޫ ވިދާޅުވިއެވެ.

ބޭންކުން މިޚިދުމަތް ތަޢާރަފް ކޮށްފައި މިވަނީ އެތަނުގެ 32 ވަނަ އަހަރީ ދުވަހާ ދިމާކޮށެވެ.