އެސްޓީއޯގެ ހުރިހާ ފާމަސީތައް ގުޅުވާލުމުގެ އެއްބަސްވުމުގައި ސޮއިކޮށްފި
25 ސެޕްޓެމްބަރ 2014 16:26
ރާއްޖޭގެ އެކިކަންކޮޅުތަކުގައި ގާއިމުކޮށްފައިވާ އަދި ކުރަމުންދާ އެސްޓީއޯގެ ހުރިހާ ފާމަސީތައް އުރީދޫ ނެޓްވޯކުން ގުޅައިލުމުގެ އެއްބަސްވުމުގައި މިއަދު ސޮއިކޮށްފިއެވެ.
މިއެއްބަސްވުމުގެ ދަށުން އުރީދޫގެ އިންޓަނެޓް ކަނެކްޝަން މެދުވެރިކޮށް އެސްޓީއޯގެ ހުރިހާ ފާމަސީތައް ގުޅުވާލެވިގެންދާނެ ކަމަށް އުރީދޫން ނެރެފައިވާ ނޫސްބަޔާނުގައި ބުނެފައިވެއެވެ. މި ޚިދުމަތުގެ ސަބަބުން ފާމަސީތައް އާސަންދަ ސިސްޓަމާއި އެސްޓީއޯގެ ހެޑް އޮފީހާ ގުޅައިލެވޭނެއެވެ. އަދި ރަށްރަށުން މައުލޫމާތު ބަދަލުކުރުމާއި ސިސްޓަމް އަޕްޑޭޓްސް އަދި އާސަންދަ ފަދަ ޚިދުމަތްތައް ހުރިހާ ރަށްތަކުން ރައްޔިތުންނަށް ދިނުމަށް ފަސޭހަވާނެއެވެ.
"އަޅުގަނޑުމެންގެ ބާރަކީ އަޅުގަނޑުމެންގެ ނެޓްވޯކް. އަދި އަޅުގަނޑުމެން އަބަދުވެސް މަސައްކަތް ކުރަނީ އެންމެ ކުރިއަރާފައިވާ ޓެކްނޮލޮޖީގެ އެހީގައި އެންމެ ފަހުގެ ޚިދުމަތްތައް ކަސްޓަމަރުންނަށް ފޯރުކޮށްދޭން، އެއީ ކަސްޓަމަރުންނަށް ފޯރުކޮށްދެމުންދާ ޕެކޭޖުތަކާއި ކޯޕަރޭޓް ކުންފުނިތަކަށް ފޯރުކޮށްދޭ ހާއްސަ ސޮލިއުޝަންސް ކަމުގައި ވިޔަސް މިކަންތައްތަކަށް އުރީދޫއިން ބަލަން. މިއަދު، އަޅުގަނޑުމެން ފަހުރުވެރިވަން އެސްޓީއޯގެ ފާމަސީތަކުގައި ކަނެކްޓިވިޓީ ގާއިމު ކުރުމުގެ އަމާޒަށް ވާސިލުވެވުނީމާ. އަދި މިއެއްބަސްވުމުގެ ދަށުން، އެސްޓީއޯއަށް އެންމެ ފުރިހަމަ ސްޕީޑާއި، ކަނެކްޓިވިޓީ އަދި ކަވަރޭޖް މެދުވެރިކޮށް ފާމަސީތައް ގުޅުވާލާ އެންމެ ފުރިހަމަ ޚިދުމަތްތައް ރާއްޖޭގެ ރައްޔިތުންނަށް ދެވޭނެކަމުގެ ޔަޤީންކަންދެން" އުރީދޫގެ ސީއީއޯ، ވިކްރަމް ސިންހަ މިއަދު ވިދާޅުވިއެވެ.
ރާއްޖޭގައި މީހުން ދިރިއުޅޭ 196 ރަށެއްގައި އެސްޓީއޯގެ ބޭސްފިހާރަތައް ގާއިމް ކުރެވޭނެއެވެ.
އުރީދޫއަކީ ރާއްޖޭގެ އެންމެ ބޮޑު ސަރަޙައްދަކަށް ތްރީ ޖީ ޕްލަސް ކަވަރޭޖް ފޯރުކޮށްދެމުންގެންދާ އަދި ރާއްޖޭގެ ފުރަތަމަ އަދި ހަމައެކަނި 4 ޖީ ޚިދުމަތް ދެމުންގެންދާ ނެޓްވޯކެވެ.
ކުރިޔަށް އޮތްތަނުގައިވެސް އުރީދޫއިން އެސްޓީއޯއާއިއެކު ވަރުގަދަ ކޯޕަރޭޓް ގުޅުމެއް ބަދަހިކޮށް ކަސްޓަމަރުނަށް އެންމެ ފުރިހަމަ ޚިދުމަތްތައް ދިނުމަށް މަސައްކަތް ކުރާނެ ކަމަށްވެސް އެބަޔާނުގައި ބުނެފައިވެއެވެ.
ކިޔުންތެރިންގެ ހިޔާލު