ގާސިމް ޕީޕީއެމްއަށް ތާއިދު ކުރެއްވީ މަޖުބޫރުވެގެން: ޑރ. ޑީޑީ

ޖުމްހޫރޫޕާޓީގެ ލީޑަރު ގާސިމް އިބްރާހީމް ރިޔާސީ އިންތިޚާބުގެ ދެވަނަބުރުގައި ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީން އަބްދުލް ގައްޔޫމަށް ތާއިދު ކުރަން ނިންމެވީ މަޖުބޫރުވެގެން ކަމަށް އެޕާޓީގެ ކުރީގެ ނާއިބު ލީޑަރު ޑރ. އިބްރާހީމް ދީދީ (ޑރ. ޑީޑީ) ވިދާޅުވެއްޖެއެވެ.

އޭނާ މިހެން ވިދާޅުވީ އެމްޑީޕީއަށް މިއަދު ސޮއިކުރުމަށްފަހު އެޕާޓީގެ ރިޔާސީ ކެންޑިޑޭތް މުހައްމަދު ނަޝީދާއެކު ބޭއްވި ޕްރެސްކޮންފަރެންސެއްގައެވެ.

ގާސިމް އިބްރާހީމްގެ މިނިންމެވުމަށް ތާއީދު ނުކުރެވުނީ އޭނާއަކީ އިސްލާހަށް މަސައްކަތް ކުރައްވާ ބޭފުޅަކަށް ވާތީކަމްވެސް ޑރ. ވިދާޅުވިއެވެ. އޭނާ ވިދާޅުވީ ރާއްޖޭގައި އޮތީ ދެފިކުރުކަމަށެވެ. އެއީ ގައުމު ރިފޯމްކުރުމުގެ ފިކުރާއި 30 އަހަރުގެ ޚުދުމުހުތާރު ވެރިކަމުގެ ފިކުރުކަމަށެވެ. އެމްޑީޕީއާއި އަލުން ގުޅިވަޑައިގެންނެވީ އެ 30 އަހަރުގެ އާއިލީ ވެރިކަމަކަށް ޖާގަނުދޭންކަމަށްވެސް ވިދާޅުވިއެވެ.

އެމްޑީޕީއަށް މިއަދު ސޮއިކުރެއްވުމަށްފަހު ރައީސް ނަޝީދުގެ ސަރުކާރުގައި އިސްލާމިކް މިނިސްޓަރަކަށް ހުންނެވި ޑރ. އަބްދުލް މަޖީދު ބާރީ ވިދާޅުވީ އެމަނިކުފާނަކީ އަދާލަތު ޕާޓީ އުފެއްދެވުމަށް އެންމެ އިސްކޮށް އުޅުއްވި އެކަކު ކަމަށެވެ. ނަމަވެސް އަދާލާތު ޕާޓީން ވަކިވެ އެމްޑީޕީއާ ގުޅިވަޑައިގެންނެވީ އެޕާޓީ މިހާރު ހިންގަމުންދާ ގޮތާމެދު ހިތްހަމަނުޖެހިގެން ކަމަށެވެ.

މިޕްރެސް ކޮންފެރެންސްގައި އެމްޑީޕީއަށް އަލަށް ގުޅިވަޑައިގެންނެވި މާލޭ ސިޓީ ކައުންސިލް މެންބަރު އަހުމަދު ހަމީދު ވިދާޅުވީ އާއިލީ ވެރިކަމަކަށް ތާއީދު ނުކުރެއްވޭނޭ ކަމަށެވެ. އެހެން ކަމުން އަބަދުވެސް އިސްލާހަށް ތާއީދު ކުރައްވެ ކަމަށެވެ.

ކުރީގެ ޓްރާންސްޕޯރޓް މިނިސްޓަރ ޑރ. ޝަމްހީދު އެމްޑީޕީއަށް ސޮއިކުރެއްވުމަށްފަހު ވިދާޅުވީ ގާސިމް އިބްރާހީމަށް މަޖުބޫރުވެގެން ޕީޕީއެމްއާ ގުޅިވަޑައިގެންނެވި ކަމަށްވިޔަސް އެމަނިކުފާނުގެ ހިތްއޮތީ އެމްޑީޕީއާ އެކުގައި ކަމަށެވެ. އޭނާ ވިދާޅުވީ މިފަހަރުގެ އިންތީޚާބުގެ ވޯޓުކަރުދާހުގައިވެސް އޮތީ 2008 ވަނަ އަހަރު އޮތް ރައީސް ނަޝީދާއި، މައުމޫން އަބްދުލް ޤައްޔޫމްގެ ނަންކަމަށެވެ.

އެމްޑީޕީއާ ގުޅިވަޑައިގެންނެވި މޫސާ ރަމީޒް މިއަދު ވިދާޅުވީ ރައީސް ނަޝީދަށް ތާއީދު ކުރެއްވީ އޭނާއާއި ގާސިމް އިބްރާހީމް އަދި އެތަކެއް ދިވެހިންނަށް ޖަލުގައި އަނިޔާ ލިބުނު އާއިލީ ވެރިކަން ތަކުރާރުވިޔަ ނުދިނުމަށް ކަމަށެވެ. އެސަބަބަށްޓަކައި ރައީސް ނަޝީދު ހޮވަން މަޖުބޫރުކަމަށް އޭނާ ވިދާޅުވިއެވެ. އެހެންކަމުން ދާން އުޅޭ އަސްލު މަންޒިލް ނޯޅޭ ކަމުގައިވެސް ވިދާޅުވިއެވެ.

މިއަދުގެ ޕްރެސްގައި ގާސިމާ ބެހޭ ގޮތުން ޑރ. ޝަމްހީދާއި، ޑރ.ޑީޑީ ދެއްކެވި ވާހަކަށް ގާސިމް މިއަދު ވަނީ ރައްދު ދެއްވާފައެވެ. ގާސިމް ވިދާޅުވީ އެބޭފުޅުން އެމްޑީޕީއަށް ބަދަލުވުމަކުން ހިތާމައެއް ނުކުރައްވާ ކަމަށެވެ. ނަވެސް އެދައްކަވާ ހަގީގަތާ ޚިލާފު ވާހަކަތަކާމެދު ކަންބޮޑުވެ ވަޑައި ގަންނަވާ ކަމަށެވެ. އެމަނިކުފާނު ވިދާޅުވީ ޑރ. ޑީޑީއަކީ އެމްޑީޕީގެ އެޖެންޓެއް ކަމަށެވެ. އަދި ޝަމްހީދާއި، މޫސަ ދިޔައީ ފައިސާއަށް ކަމަށްވެސް ވިދާޅުވިއެވެ.