ޖުމްހޫރީ ގުޅުމުގެ ތާއީދު ކޮންމެހެން ބޭނުން:ޕީޕީއެމް

ރިޔާސީ އިންތިޚާބުގެ ދެވަނަ ބުރުގައި ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީން އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދާ ވާދަ ކުރައްވާއިރު ނަޝީދު ބަލި ކުރެއްވުމަށް ޖުމްހޫރީކޯލިޝަންގެ ތާއީދު ކޮންމެހެން ބޭނުންވާ ކަމަށް ޕީޕީއެމްގެ ތަރުޖަމާނު އަހުމަދު މަހުލޫފް ވިދާޅުވެއްޖެއެވެ.

މަހުލޫފް މިހެން ވިދާޅުވީ ޖުމްހޫރީ ގުޅުމުގެ މައިޖަގަހަ މ. ކުނޫޒުގައި ޖުމްހޫރީޕާޓީގެ އިސްވެރިންނާ އެކު ބޭއްވި ބައްދަލުވުމަކަށްފަހު ނޫސްވެރިންނަށް މައުލޫމާތު ދެއްވަމުންނެވެ.

މަހުލޫފު ވިދާޅުވީ ޖުމްހޫރީ ކޯލިޝަނުންވެސް ވަނީ ރަނގަޅު ނަތީޖާއެއް ހޯދައިފައި ކަމަށެވެ. އެހެންކަމުން އިންތިޚާބުގެ ދެވަނަ ބުރުގައި ރައީސް ނަޝީދު ބަލިކުރަން ބޭނުން ކަމަށްވާނަމަ ޖުމްހޫރީ ގުޅުމުގެ ތާއީދާއި އެއްބާރުލުން ކޮންމެހެންވެސް ބޭނުންވާ ކަމަށެވެ. އެގޮތުން ޖުމްހޫރީ ގުޅުމާއެކު ބޭއްވި ބައްދަލުވުމުގައި ދެކެވުނު ވާހަކަތައް "ވަރަށް ޕޮޒިޓިވް" ކަމަށްވެސް އޭނާ ވިދާޅުވިއެވެ. ނަމަވެސް ދެޕާޓީން މިއަދު ގޮތެއް ނިންމޭނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ.

މިބައްދަލު ވުމަށްފަހު ނޫސްވެރިންނަށް މައުލޫމާތު ދެއްވަމުން ޖުމްހޫރީ ގުޅުމުގެ ރިޔާސީ ކެންޑިޑޭޓް ގާސިމް އިބްރާހީމްގެ ރަސްމީ ތަރުޖަމާނު އިބްރާހީމް ޚަލީލް ވިދާޅުވީ ޖުމްހޫރީޕާޓީން ދެވަނަ ބުރުގައި ޔާމީނަށް "ތާއީދު" ކަމަށެވެ. ނަމަވެސް ޖުމްހޫރީ ގުޅުން އުފެދުނު ބޭނުން މިހާރު މިނިފައިވާ ކަމަށެވެ. އެހެން ކަމުން އެގުޅުމުގައި ހިމެނޭ އެހެން ޕާޓީތަކުގެ ކައުންސިލްގެ ބައްދަލުވުން ތަކަށްފަހު އެޕާޓީން ނިންމެވި ގޮތެއް މިއަދު ހިއްސާ ކުރައްވާނެ ކަމަށް އުންމީދު ކުރައްވާ ކަމަށެވެ. ޖުމްހޫރީ ގުޅުމުން ޔާމީނަށް ތާއިދު ކުރާނެތޯ ނުކުރާނެތޯ ނިންމޭނީ އެހިސާބުން ކަމަށްވެސް އޭނާ ވިދާޅުވިއެވެ.

ޚަލީލް ވިދާޅުވީ ރޭގެ ބައްދަލުވުމަށް ޕީޕީއެމްގެ އިސްބޭފުޅުން ވަޑައިގެންނެވީ އިންތިޚާބުގެ ފުރަތަމަ ބުރުގެ ނަތީޖާއަށްފަހު ޖުމްހޫރީ ގުޅުމުގެ ބައްދަލުވުމެއް ހިނގަމުންދަނިކޮށް ކަމަށެވެ. އެހެން ކަމުން އެއީ ޕީޕީއެމް އިން ކުރެއްވި އިހުތިރާމުގެ ޒިޔާރަތެއް ކަމަށެވެ.

މިބައްދަލުވުމުގައި، ޕީޕީއެމްގެ ކެންޑިޑޭޓް އަބްދުﷲ ޔާމީނާއި ޖުމްހުރީ ކޯލިޝަންގެ ކެންޑިޑޭޓް ގާސިމް އިބްރާހީމް ބައިވެރިވެ ވަޑައިގެންނެވިއެވެ. އަދި ޕީޕީއެމްގެ ކައުންސިލް މެންބަރު އަހްމަދު ފާރިޝް މައުމޫނާއި، މުހައްމަދު ހުސައިން ޝަރީފާއި، އަހުމަދު މަހުލޫފާއި ޔާމީންގެ ރަނިންމޭޓް ޑރ. މުހައްމަދު ޖަމީލް އަހުމަދާއި، ގާސިމްގެ ރަނިންމޭޓް ޑރ. ހަސަން ސައީދުގެ އިތުރަށް ދެޕާޓީގެ އިސް ބޭފުޅުން ބައިވެރިވެ ވަޑައިގެންނެވިއެވެ.