ޓްރާންސްޕޭރެންސީ މޯލްޑިވްސްއިން އިލެކްޝަންސް ކޮމިޝަނަށް ތައުރީފްކޮށްފި

ރާއްޖޭގައި އިއްޔެ ބޭއްވި ރިޔާސީ އިންތިޚާބުގެ ވޯޓުލުމުގެ ހުރިހާ ކަމެއް ދިޔައީ ވަރަށް ރަނގަޅަށް އަދި އެހާމެ ފުރިހަމައަށް ކަމަށް ޓްރާންސްޕޭރެންސީ މޯލްޑިވްސް އިން ހާމަކޮށްފިއެވެ.

ޓްރޭޑާސް ހޮޓަލުގައި ރޭ ނޫސްވެރިނަށް މައުލޫމާތު ދެއްވަމުން އެތަނުނުގެ އެޑްވޮކަސީ އެންޑް ކޮމިއުނިކޭޝަން މެނޭޖަރ އައިމަން ރަޝީދު ވިދާޅުވީ ވޯޓުލުމުގެ ކަންކަން އިލެކްޝަންސް ކޮމިޝަނުން ކުރިއަށް ގެންގޮސްފައިވާ ފުރިހަމަ ކަމަށްޓަކައި އެކޮމިޝަނަށް ތައުރީފް ކުރައްވާ ކަމަށެވެ.

އޭނާ ވިދާޅުވީ ޓްރާންސްޕޭރެންސީ މޯލްޑިވްސް އިން އޮބްޒާވް ކުރި މަރުކަޒުތަކުގެ ތެރެއިން ތެރެއިން ވޯޓުނަގާފައިވާ މަރުކަޒުތަކުގެ ތެރެއިން 95 އިންސައްތަ މަރުކަޒުތަކުގެ މައުލޫމާތު އެތަންތަން ބަންދު ކުރުމުގެ 3 ގަޑިއިރު ކުރިން ލިބިފައިވާ ކަމަށެވެ. ވޯޓުނެގި މަޒުކަޒުތަކުގެ ތެރެއިން 99.5 އިންސައްތަ މަރުކަޒުތައް ހަވީރު 5 ގެ ކުރިން ބަންދު ކޮށްފައިވާ ކަމަށެވެ. ވޯޓުލެވޭ ބައެއް މީހުންގެ ނަންތައް ލިސްޓުގައި ނެތުމުގެ މައްސަލަ ކޮންމެވެސް ވަރަކަށް ދިމާވި ކަމަށް އޭނާ ވިދާޅުވިއެވެ. ނަމަވެސް އެއީ ނިސްބަތުން ވަރަށް މަދު އަދެއް ކަމަށް އޭނާ ވިދާޅުވިއެވެ. "އެއީ ސުމެއްޕޮއިންޓް ދޭއް ޕަސެންޓަށްވުރެ މަދު އަދަދެއް. ވޯޓު ނުލެވިގެން މަރުކަޒުގައި ޝަކުވާ ހުށަހަޅާފައިވަނީ ސުމެއްޕޮއިންޓް ސުމެއްފަހެއް ޕަސެންޓް،" ކަމަށް އޭނާ ވިދާޅުވިއެވެ. އައިމަން ވިދާޅުވީ ވޯޓުލީ މަރުކަޒުތަކުގެ ތެރެއިން 3.8 އިންސައްތަ ފޮށިތަކުގެ މެދުކަނޑާލަން ޖެހުނު ކަމަށް އޭނާ ވިދާޅުވިއެވެ. ވޯޓުލުން މެދުކަނޑާލަން ޖެހުނު ތަންތަނުގެ ތެރެއިން ދެބައިކުޅަ އެއްބައި ތަންތަނުގައި ވޯޓުލުން މެދުކަނޑާލަން ޖެހިފައިވަނީ ވޯޓުލި މަޒުކަޒުގެ ވެރިޔާގެ އެދުމުގެ މަތިން ކަމަށްވެސް އޭނާ ވިދާޅުވިއެވެ. "ދެހުރި ތަންތަނުގައި ވޯޓުލުން މެދުކަނޑާލަން ޖެހިފައިވަނީ ވޯޓުލާން ދިޔަމީހުން ހަމަނުޖެހުން ހިންގައިގެން ނުވަތަ ސިޔާސީ ޕާޓީތަކުގެ ސަބަބުން. ނަމަވެސް މިފަދަ މައްސަލަތައް ވަރަށް މަދުކަން ފާހަގަކުރަން،" އޭނާ ވިދާޅުވިއެވެ. 1.4 އިންސައްތަ މަރުކަޒުތަކުގައި މާރާމާރީ ހިންގާފައިވާ ކަމުގެ ރިޕޯޓު ލިބިފައިވާ ކަމަށްވެސް އޭނާ ވިދާޅުވިއެވެ. އެހެންނަމަވެސް މިއންިތިޚާބަކީ ނުހަނު ސުލްހަވެރިކަމާއެކު ކުރިއަށް ގެންގޮސްފައިވާ އިންތިޚާބެއް ކަމަށްވެސް އޭނާ ވިދާޅުވިއެވެ. މިމައަސަލަތައް މިހާރުވަނީ ކަމާ ބެހޭފަރާތްތަކަށް ހުށަހަޅާފައި ކަމަށްވެސް އޭނާ ވިދާޅުވިއެވެ. ހުށަހަޅާފައިވާ އެމައްސަލަތައް ކުރިއަށް ގެންދާގޮތުން އެޖަމިއްޔާއިން ބަލަމުން ގެންދާނެ ކަމަށްވެސް އޭނާ ވިދާޅުވިއެވެ.

"މަދުންނަމަވެސް ހިނގާފައިވާ މާރާމާރީއާއި، ވޯޓުލުން ހުއްޓުމާއި، ވޯޓަރ ރަޖިސްޓްރީގައި ހުރި މައްސަލަތަކުގެ ސަބަބުން އިންތިޚަބުގެ ނަތީޖާއަށް އެއްވެސް ބަދަލެއް އަންނާނެ ކަމަށް މިޖަމިއްޔާއިން ނުދެކެން،" އޭނާ ވިދާޅުވިއެވެ.

އައިމަން ވިދާޅުވީ ވޯޓުލި މަރުކަޒުތަކަށް ފުލުހުން ވަދެފައިވަނީ 18.8 އިންސައްތަ މަދު މަރުކަޒުތަކަށް ކަމަށްވެސް އޭނާ ވިދާޅުވިއެވެ. އޭގެ ތެރެއިން 80 އިންސައްތަކަށް ފުލުހުން ވަދެފައިވަނީ ވޯޓުލި މަރުކަރުގެ ވެރިޔާގެ އެދުމުގެ މަތިން ކަމަށްވެސް އޭނާ ވިދާޅުވިއެވެ.

ވޯޓުލުމުގެ ހުރިހާމަރުހަލާއެއްގައި ރިޔާސީކެންޑިޑޭޓުން ތަމްސީލް ކުރެވިފައިވާ ކަމަށްވެސް އޭނާ ވިދާޅުވިއެވެ. މިކަންކަމުގެ ސަބަބުން އިންތިޚާބުގެ ހާމަކަން އިތުރުވި ކަމަށްވެސް އޭނާ ވިދާޅުވިއެވެ. އަދި އިތުބާރު ބޮޑުވެފައިވާ ކަމަށެވެ. ވޯޓް ގުނުމުގެ މަރުހަލާގައި 73.7 އިންސައްތަ މަރުކަޒުތަކުގައި ޖުމްހޫރީކޯލިޝަންގެ ރިޔާސީ ކެންޑިޑޭޓް ޤާސިމްގެ މަންދޫބުން ހާޒުރުވެ ތިބިކަމަށްވެސް ވިދާޅުވިއެވެ. އަދި ޑރ. ވަހީދު ފަރާތްޕުޅުން 29.6 އިންސައްތަ މީހުން މަރުކަޒުތަކުގައި ހާޒިރުވެ ތިއްބެވި ކަމަށެވެ. ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީންގެ ފަރާތްޕުޅުން 74.2 އިންސައްތަ މީހުން ހާޒިރުވެ ތިބި ކަމަށް އޭނާ ވިދާޅުވިއެވެ. 91.5 އިންސައްތަ މީހުން މުހައްމަދު ނަޝީދުގެ މަންދޫބުންގެ ގޮތުގައި ހާޒުރުވެ ތިއްބެވިއެވެ.

އައިމަނަ ވިދާޅުވީ 85.5 މަރުކަޒު ތަކުގައި ވޯޓުގުނާ ނިމިފައިވަނީ އެއްވެސް ދެބަސްވުނެތި ކަމަށްވެސް ވިދާޅުވިއެވެ. "އަމާން އިންތިޚާބެއް ކުރިއަށް ގެންދެވޭނެފަދަ މާހައުލެއް ގާއިމް ކޮށްދެއްވި ކަމަށްޓަކައި ކަމާބެހޭ ހުރިހާ ފަރާތްތަކަށް ޓްރާންސްޕޭރެންސީ މޯލްޑިވްސްއިން ޝުކުރު ދަންނަވަން،" އޭނާ ވިދާޅުވިއެވެ. އައިމަން ވިދާޅުވީ ވޯޓު ގުނުމުގައި 0.2 އިންސައްތަ ވޯޓު ކަރުދާހާ މެދު ކެންޑިޑޭޓުން ތަމްސީލްކުރި ފަރާތްތަކުންވަނީ ވޯޓު ގުނުމިގެ މަރުހަލާގައި ދެބަސްވެފައި ކަމަށެވެ. އޭނާވިދާޅުވީ 86.6 އިންސައްތަ މަރުކަޒުގައި އެހެން މީހެއްގެ އެހީގައި ވޯޓުލައިފައިވާ ކަމަށެވެ.

މިއިންތިޚާބުގެ ދެވަނަ ބުރުގައި އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދު ވާދަކުރާނެކަން ކަށަވަރު ވެފައިވާ ކަމަށް އޭނާ ވިދާޅުވިއެވެ. "ނަމަވެސް ދެވަނަ އަދި ތިންވަނަ ކެންޑިޑޭޓުންނަށް ލިބުނު ވޯޓުގެ ތަފާތު ކުޑަވުމުގެ ސަބަބުން ތަފާސް ހިސާބުގެ މައްޗަށް ބިނާކޮށް ދެވަނަ ބުރަށްދާނީ ކޮންކެންޑިޑޭޓެއް ކަންދަންނަވަން އުނދގޫ" ކަމަށްވެސް ވިދާޅުވިއެވެ. އެހެން ކަމުން މިކަން ޔަގީން ކުރެވޭނީ އިލެކްޝަންސް ކޮމިޝަންގެ ނަތީޖާ ހާމަކުރުމުން ކަމަށްވެސް ވިދާޅުވިއެވެ.