ވޯތުގެ ނަތީޖާ ގަބޫލު ނުކުރާނެ ކަމަށްބުނެ ޖޭޕީން މުޒާހަރާ ފަށައިފި
8 ސެޕްޓެމްބަރ 2013 5:12
ރާއްޖޭގައި އިއްޔެ ބޭއްވި ރިޔާސީ އިންތިޚާބުގެ ނަތީޖާ ގަބޫލު ނުކުރާނެ ކަމަށް ބުނެ ޖުމްހޫރީ ގުޅުމުން ދަރުބާރުގެ ކައިރީގައި މުޒާހަރާ ކުރަން ފަށައިފިއެވެ.
ޖުމްހޫރީ ގުޅުމުން ވޯޓުގެ ނަތީޖާ ގަބޫލު ނުކުރަނީ އިލެކްޝަންސް ކޮމިޝަނުން ދެފަހަރު ދެގޮތަށް މައުލޫމާތު ދިނުމާއި، އިތުރު 10000 ވޯޓު ފޮށްޓަށްލާފައި ވާކަމަށް މީޑިއާގައި ފެތުރުނު ޚަބަރަކާ ގުޅިގެންނެވެ.
ޖުމްހޫރީގުޅުމުގެ ރިޔާސީ ކެންޑިޑޭޓް ޤާސިމް އިބްރާހީމްގެ ތަރުޖަމާނު އިބްރާހީމް ޚަލީލް ދާދި ދެންމެއަކު ވިދާޅުވީ އިލެކްޝަންސް ކޮމިޝަނުން ކަންކަން ކުރައްވަމުން އައިގޮތުން ވޯޓަރސް ރަޖިސްޓްރީގެ މައްސަލަ ކުރިމަތި ވެދާނެ ކަމަށެވެ. ނަމަވެސް އެތައް ފަހަރެއްގެ މަތިން އެކަން އިލެކްޝަންސް ކޮމިޝަނުގެ ސަމާލު ކަމަށް ގެނެސްފައި ވިޔަސް އެތަނުން އެކަށީގެންވާ ފިޔަވަޅު އަޅާފައިނުވާ ކަމަށެވެ.
"އަޅުގަނޑުމެން ބުނިން ވޯޓަރސް ރަޖިސްޓްރީގައި މައްސަލަ ޖެހޭނެކަމަށް. އެކަކަށް ގިނަ ވޯޓުތަކެއް ލުމުގެ ފުރުޞަތު ދެވޭގޮތަށް މަގުފަހިވާނެޔޭ. އެކަންކަން ރަނގަޅު ކުރުމަށް އެތައްފަހަރަކު ދެންނެވިން. އެކަން ރަނގަޅު ކުރައްވާނެ ކަމަށް އެބޭފުޅުން ވިދާޅުވި،" ޚަލީލް ވިދާޅުވިއެވެ.
ދަރުބާރުގެ ކައިރީގައި މުޒާހަރާ ކުރަމުންދާ މީހުން ގޮވަމުންދަނީ ނަތީޖާ ގަބޫލު ނުކުރާނެ ކަމަށާއި، އިލެކްޝަންސް ކޮމިޝަންގެ ރައީސް ފުވާދު ތައުފީގުގެ އިސްތިއުފާ ދިނުމަށެވެ.
މުޒާހަރާ ކުރަމުންދާ ސަރަހައްދުގައި ހަރަކާތްތެރި ވަމުންދާ ފުލުހުންގެ ސަފުތައް ފަޅާލާފައި ބައިވެރިން މިހާރުވަނީ ވަދެގަނެފައެވެ.
ކިޔުންތެރިންގެ ހިޔާލު