ރިޔާސީ އިންތިޚާބުގެ ވަގުތީ ނަތީޖާ ދައްކާ ގޮތުން ދެވަނަ ބުރަށް ދާންޖެހިއްޖެ

ކުރިއަށްއޮތް ފަސް އަހަރަށް ރާއްޖޭގެ ވެރިކަމުގައި ހުންނަވާނެ ބޭފުޅެއް އިންތިޚާބު ކުރުމަށް މިއަދު މުޅިރާއްޖޭގައި ނެގި ވޯޓުން އެއްވެސް ބޭފުޅަކަށް 50 އިން ސައްތައަށްވުރެ އިތުރަށް ވޯޓު ނުލިބުމުން ދެވަނަ ބުރަކަށް ދާންޖެހިޖެއެވެ

މިއަދު ހެނދުނު މުޅިރާއްޖެގައި ނެގި ވޯޓުގައި ކުރިހޯއްދަވާފައިވަނީ އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދެވެ. އެމަނިކުފާނަށް 93206 ވޯޓު ލިބިވަޑައިގެންފައިވެއެވެ. އެއީ 44.8 އިން ސައްތައެވެ. ދެވަނަގައި އުޅުއްވަނީ ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީން އަބްދުﷲ އެވެ. އެމަނިކުފާނުވަނީ 53320 ވޯޓު ހޯއްދަވާފައެވެ. އެއީ 25.7 އިންސައްތައެވެ. ތިންވަނަ ހޯއްދަވާފައިވަނީ ޖުމްހޫރީ ގުޅުމުގެ ރިޔާސީ ކެންޑިޑޭޓް ގާސިމް އިބްރާހީމެވެ. އެމަނިކުފާނުވަނީ 50006 ވޯޓު ހޯއްދަވާފައެވެ. އެއީ 24.1 އިންސައްތައެވެ. މިހާރުގެ ރައީސުލްޖުމްހޫރިއްޔާ ޑރ. މުހައްމަދު ވަހީދަށް ލިބިވަޑައިގެންފައިވަނީ 11297 ވޯޓެވެ. އެއީ 5.4 އިން ސައްތައެވެ.

ރައީސް ކަމަށް ހޮވޭނީ މަދުވެގެން 51 އިންސައްތަވޯޓު ހޯއްދަވައި ގެންނެވެ. މިއަދު ނެގި ވޯޓުން އެއްވެސް ކެންޑިޑޭޓަކަށް މިވަރަށް ވޯޓު ލިބިފައިނުވާތީ މިހާރު ވަނީ ދެވަނަ ބުރަކަށް ދާން ޖެހިފައެވެ. ދެވަނު ބުރުގެ ވޯޓުލުން އޮންނާނީ ސެޕްޓެމްބަރމަހުގެ 28 ވަނަ ދުވަހުއެވެ.

މިއަދުގެ ނަތީޖާ މިގޮތަށް ނިކުތުމުން ޕީޕީއެމްއިން މިހާރުވަނީ ދެވަނަ ބުރުގައި ކޯލިޝަން ހެދުމަށް އެހެން ޕާޓީތަކާ ވާހަކަ ދައްކަވަން ފަށައިފައެވެ. ނަސަންދުރަ ޕެލެސް ހޮޓަލުގައި އެޕާޓީން ގާއިމްކޮށްފައިވާ ފިޔުޝަން ސެންޓަރ ގައި މިރޭ ބޭއްވި ބައްދަލުވުމެއްގައި އެޕާޓީގެ ލީޑަރު މައުމޫން އަބްދުލް ގައްޔޫމް ވިދާޅުވީ ކޯލިޝަން ނުހަދައި ދެވަނަ ބުރުގައި ކާމިޔާބު ކުރެވޭނީ ކޯލިޝަނެއްގެ ތެރެއިން ކަމަށެވެ. އެހެން ކަމުން އެކަމާބެހޭ މަޝްވަރާތައް ފަށައިފައިވާ ކަމަށެވެ.

މިބައްދަލު ވުމުގައި އެޕާޓީގެ ރިޔާސީ ކެންޑިޑޭޓް ޔާމީން ވިދާޅުވީ ގިނައިން ވޯޓު ލިބޭނެ ކަމަށް ކުރިން ހީކުރި ބައެއް އަތޮޅުތަކުގެ ވޯޓު ބައިބައިވެގެން ގޮސްފައިވާތަން ފެނުނު ކަމަށެވެ.

މިބައްދަލު ވުމުގައި މައުމޫން ވިދާޅުވީ މިއަދުގެ ނަތީޖާއަކީ 2008 ވަނަ އަހަރުގެ ނަތީޖާ ކަމަށެވެ. އެކަމަކު އެނަތީޖާ މިހާރުވަނީ އިދިކޮޅަށް ބަދަލުވެފައި ކަމަށެވެ.

މުޅިރާއްޖޭގައި ވޯޓުލާން ފަށައިފައިވަނީ މިއަދު ހެނދުނު 7.30 ގެއެވެ. މިއިންތިޚާބުގައި ވޯޓުލުމަށްޓަކައި 470 ވޯޓުފޮށި ބެހެއްޓުނެވެ. މިފަހަރުގެ އިންތިޚާބުގައި 209851 މީހުން ވޯޓު ލާފައިވެއެވެ. ވޯޓު ލިބުމުގެ ހައްގު ލިބިފައިވާ މީހުންގެ އަދަދަކީ 239593 މީހުންނެވެ.