ހެނދުނާ ހޭލާ މީހުން، ކާމިޔާބު ބަޔަކަށްވާ 8 ސަބަބު

ކުންފުނިތަކުގެ ސިއީއޯއިން، ކުޅިވަރު ކުޅުންތެރިން، މަސްވެރިން، ދަނޑުވެރިން، ކުރެހުންތެރިން އަދިވެސް އެތައްބަޔަކު، ކާމިޔާބު ބަޔަކަށް ވުމުގެ މައިގަނޑު ހަތިޔާރަކީ ހަމަ ކޮންމެ މީހަކަށްވެސް ވަރަށް ފަސޭހައިން ލިބެންހުރި، އެހެނަސް މަދު ބަޔަކު ނޫނީ އޭގެ ފައިދާ ނުހޯދާ ކަމެކެވެ. އެއީ ހެނދުނު ހެނދުނާ ނުވަތަ ފަތިސްފަތިހާ ނިދާތެދުވުމުގެ އާދަ ގެންގުޅުމެވެ.

އިނގިރޭސި ބަހުގެ މުހާވިރާއެއްގައި ބުނާފަދައިން 'ފަނިފަޚްސާ ލިބޭނީ ހެނދުނާ ހޭލާ ދޫންޏަށޭ' ބުނަނީ ހަމަ ރަނގަޅު ވާހަކައެކެވެ. އަހަރުމެންނަކީ ކާނާ ހޯދަން މަސައްކަތްކުރާ ދޫންޏެއް ނަމަ މި މުހާވިރާގައި އެބުނާ ވާހަކައިގެ ޙަޤީޤަތް ކިތައްމެހައިވެސް ބޮޑަށް އަންދާޒާ ކޮށްލެވޭނެއެވެ.

އެހެން ކަމުން ކާމިޔާބު މީހަކަށް ވުމަށް މަސައްކަތް ފަށަމާތޯއެވެ. ފަތިސްނަމާދު ކޮށްލައިގެން އިރުއަރާ މަންޒަރު ބަލައިލެވޭހައި ވަގުތު އޮއްވައި ހޭލަމާތޯއެވެ. އެއަށްފަހު މަސައްކަތަށް ފަށަމާތޯއެވެ. ފަތިހު ހޭލައި މަސައްކަތް ފަށަންވީ 8 ސަބަބެއް ހިއްސާކޮށްލާނަމެވެ.

1- ހެނދުނު ހޭލާއިރު ހަށިގަނޑުގައި ހަކަތައިގެ މިންވަރު ގިނައިން ހުރުމާއި ސިކުނޑި ތާޒާކޮށް ހުރުން

ނިދުމަށް ރަނގަޅު އާދަތަކެއް ގެންގުޅޭހައި ހިނދަކު، އަވަހަށް ނިދާ ހޭލުމުން މާބޯޑު މައްސަލަތަކެއް ކުރިމައްޗެއް ނުވާނެއެވެ. އަދި ދުވާލުގެ ގިނަ ވަގުތުގައި ފުރިހަމަ ބުންވަރަކާއިއެކު ރަނގަޅަށް ލޯ ހުޅުވި، ޝައުޤުވެރި ކަމާއެކު ކަންކަމުގައި މަސްޢޫލުވެ އުޅެވޭނެއެވެ.

މިއާ ޚިލާފަށް ލަހުން ނިދާހޭލާނަމަ ފެނިގެންދާނީ މީގެ އިދިކޮޅު ސިފަތަކެވެ. އެހެންކަމުން އަވަހާ ނިދާ ހޭލާށެވެ. އޭރުން ދުވާލު ގިނަ މަސައްކަތް ކޮށްލެވޭނެއެވެ. ކުރަންޖެހޭ ގިނަ ކަންކަން މާދަމައަށް ލަސްކޮށް ބޭއްވުމުގެ ސުންޕާ އާދައާ ދުރުވެވޭނެއެވެ. ހަވީރު ވާންވާއިރަށް ތިމާ ހުންނާނީ ވަރަށް ހުސްކޮށެވެ. އެއްވެސް ހާސްކަމެއް، ފިކުރުބޮޑުވުމެއް ނެތިއެވެ.

2- ހޭބޯނާރައި އަވަސް އަރުވާލާފައި ދުވަސް ފެށުމަށް ވުރެން ވަކިން ދެރަކަމެއް ނޯންނާނެކަން ދަންނާށެވެ.

އަވަސް އަރުވާލާފައި "ލައިނުގަނެގެން" އުޅެން ޖެހުމަށްވުރެން ވަކިން ފޫހިކަމެއް އޮންނާނެހެއްޔެވެ؟ އެހެން އުޅެން ޖެހުމުން ކަންކަން ދާނީ ގޯހުން ގޯހަށެވެ.އެހެންކަމުން އަވަހަށް ހޭލައިގެން، ވަރަށް ހަމަޖެހިލައިގެން ދުވަހުގެ މަސައްކަތަށް ނުކުތުމަށް މަޑުމަޑުން ތައްޔާރުވާށެވެ. ހެނދުނު ހެނދުނާ ފައިމަގުގައި ބުރެއްޖަހާލަން ނުކުންނާށެވެ. މިހެން ދާދިއުމުގައި އިރުއަރާ މަންޒަރު ބަލައިލަންވެސް ދެވިދާނެއެވެ. ދުވަސް ފެށޭ ހިތްގައިމު ޤުދުރަތީ ރީތި މަންޒަރު ބަލައިލުމުން ހިތާއި ރޫޙަށް އިތުރު ހިތްވަރެއް ލިބިގެންދާނެއެވެ. ހިނގާލަން ދިއުމުގެ އިތުރުން ކޮންމެވެސް ކަސްރަތެއް ކޮށް، މޫދަށް އެރި ފަތާލުން އެއީ އަދި މާ ރަނގަޅު ކަމެކެވެ. ހެނދުނުގެ ނާސްތާ، މޭޒުދޮށުގައި ހަމަޖެހިލައިގެން އިނދެ ކުރާށެވެ. ނާސްތާކުރަމުން އޮންލައިން ނޫހެއް ނުވަތަ ދުވަހު ނޫސްކަރުދާހެއް ކިޔާލުމަށްވެސް އާދަކުރެވިދާނެއެވެ.

3- ތިމާގެ އަމިއްލަ ބައެއް ކަންކަން ކޮށްލުމަށް ހެނދުނުގެ ވަގުތަކީ ވަރަށް ރަނގަޅުވަގުތެކެވެ.

ތިމާ އެހެން މީހަކުލައްވައި ކުރަން ބޭނުންނުވާ ބައެއް ކަންކަން ކޮށްލުމަށް މިއީ ވަރަށް ފައްކާ ވަގުތެކެވެ. އެގޮތުން އީމެއިލް ޗެކްކޮށްލައި، އިޖްތިމާޢީ ވިއުގަތައް ބޭނުންކުރާނަމަ، ފޭސްބްކް، ޓްވިޓަރ، އަދި ވައިބަރ ޗެކްކޮށްލެވިދާނެއެވެ. ނުވަތަ ދޮންނަންޖެހޭ އަންނައުނު ހުރިނަމަ، ދޮންނަން މެޝިނަށް އަޅައިލެވިދާނެއެވެ. ގޭތެރެ ފޮޅާލައި، އެނދު ތަންމަތި އެޅުންފަދަ ކަންކަން ކޮށްލާފައި ބެހެއްޓުމުން ދުވާލުގެ ވަގުތުތަކުގައި އެކަމާ "ބޯގާނާކަށް" ނުޖެހޭނެއެވެ. އެހެން ނޫންނަމަ އަވަދިނެތިކޮށް އުޅޭ މައިން ނުވަތަ އޮފީހުގައި އަވަދިނެކޮށްއުޅޭ މީހުން ގެއަށް އަންނާނީ ކުރަން ހުރި މަސައްކަތްތައް ބޮލުގެ އިސްތައްޓަށްވުރެން ގިނައޭ ކިޔައި އަމިއްލަ އަމިއްލައަށް ކުދިކިޔަމުންކަން ޔަޤީނެވެ.

އެހެންކަމުން ފަތިހާ ގޮވަންފަށާ ހާލާއި ކޮވެލި ކާޅުގެ އަޑާއިއެކު ހޭލާށެވެ. މަތިވެރިވެގެންވާ ރައްބުގެ ޙަޟްރަތަށް އަދާކުރަންޖެހޭ މަތިވެރި ދެ ރަކުޢަތުގެ ނަމާދު ޖަމާޢަތުގައި ކުރުމަށް އާދަކުރާށެވެ. އޭރުން ތިމާއަށް ހުރެވޭނީ މާތްﷲގެ ރަޙްމަތާއިއެކުގައި ރޫޙާނީ އުފާވެރިކަމެއްގެ ތެރޭގައެވެ. އޭރުން ތިމާއަށް ހުރެވޭނީ ފަތިހާގޮވާ ދޫނިތައް އެއިއްވާ ހިތްގައިމުގެ މޫޝީޤީ އަޑުތައްފަދައިން ހިތް އުފަލުން ފޮޅިފައެވެ.

4- ދުވަހުގެ ޙަރަކާތްތައް ފަސޭހައިން ރާވާލައި، ބަހާލައިގެން ކުރެވޭނެއެވެ.

ގިނަފަހަރަށް، އައު ދުވަހަކަށް އިރުއަރާއިރު އޮންނަނީ އަހަރުމެން ކުރަންޖެހޭ ކަންތައްތަކުގެ ލިސްޓް ވަރަށް ދިގުލައި ގޮސްފައެވެ. އިހަށް ކުރާނީ ކޮންކަމެއްކަން ނޭގޭ ހިސާބުގައެވެ. އެހެންކަމުން އަވަހާ ހޭލާނަމަ ހަމަ ގައިމުވެސް ދުވަހުގެ ވަގުތަށް މިނެޓްކޮޅެއްނަމަވެސް އިތުރުވެގެންދާނެއެވެ. އޭރުން ދުވާލަކު ސައުވީސްގަޑިއިރަށްވުރެން ގިނައިން އޮންނަ ނަމައޭ ހިތަށް އަރާކަށް ނުޖެހޭނެއެވެ. ދުވަސް ވެގެންދާނީ ވަރަށް އުފެއްދުންތެރި، ފައިދާހުރި، ނަތީޖާ ރަނގަޅު ދުވަހަކަށެވެ.

5- ޖުމުލަކޮށް ހުރިހައި ކަމަކަށްވެސް އެއްމެ އެކަށޭނަ ވަގުތަކީ ހެނދުނުގެ ވަގުތެވެ.

ކަންކަމަށް ތިމާގެ ސިކުނޑި ހުޅުވޭ މިންވަރު، ހެނދުގެ ވަގުތުގައި އިތުރުވާނެއެވެ. އޭރު މުޅި ދުނިޔެހެން އޮންނާނީ ނިދާ ހަމަހިމޭން ވެފައެވެ. ތިމާގެ ސަމާލުކަން އެހެން ދިމާއަކަށް ދިއުމުގެ ފުރުޞަތު ކުޑަވާނެއެވެ. އެހެންކަމުން މިއީ މަދަރުސާ ކުދިންނަށް ފޮތްކިޔައި ފިލާވަޅު ހެދުމަށްވެސް ވަރަށް އެކަށޭނަ ވަގުތެކެވެ.

6- ހެނދުނާ އަވަހާ މަސައްކަތް ފެށިއްޖެނަމަ އޭގެ މާނައަކީ އަވަހާ ދުވަހުގެ މަސައްކަތްތައް ނިންމާލެވުމެވެ.

އަޅުގަނޑުމެން ގިނަ މީހުންނަކީ ވަރަށް ޒިންމާދާރު ވަޒީފާގައި އުޅެމުންއަންނަ މީހުންނީމުއެވެ. ވަގުތު ހެޔޮގޮތުގައި ބަހާލައިގެން މަސައްކަތްކުރެވޭނަމަ އަޅުގަނޑުމެން އުޅެމުން ގެންދާނީ އުފާވެރި، ނަތީޖާ ނެރެވޭ ދިރިއުޅުމެކެވެ.ކޮންމެ ދުވަހަކު، ދުވަހުގެ ހުރިހައި ވަގުތެއް މަސައްކަތުގައި ހޭދަކުރުން އެއީ އަދި އެއްމެ ރަނގަޅުގޮތެއް ނޫނެވެ. އެހެންކަމުން، އަވަހަށް ހޭލައި، މަސައްކަތްތައް ބަހާލައިގެންކުރާނަމަ، މަސައްކަތުގެ މާހައުލާއިމެދު ހިތްހަމަ ނުޖެހި ހުންނާކަށް ނުޖެހޭނެއެވެ.

7- އަވަހާ ވަރުބަލިވެ، އަވަހާ ނިދަން އޮށޯންނަ ހިންޖެހި، ރޭގަނޑުގެ ނިދި ފުރިހަމައަށް ލިބޭނެއެވެ.

އަވަހަށް ނިދާތެދުވުމުން، އިރުއޮއްސި އަށެއް ނުވައެއް ޖަހާއިރު ހުންނީ ވަރުބަލިވެފައެވެ. ނިދަން އޮށޯންނަހިތް ޖެހިފައެވެ. އެނދުގައި އޮށޯވެ ހިންދީ ފިލްމުތަކުގައި އެކިޔާހެން 'ކަރުވަޓް ބަދަލް' ކޮށްކޮށް އޮންނާކަށް ނުޖެހޭނެއެވެ. އިސާހިތަކުން އަރާމު ނިންޖަކާއި ބައްދަލުވެވޭނެއެވެ. ފުރިހަމަ ނިންޖެއް ލިބޭނއެވެ. ގަޑިތަކެއް ސޯނާކޮށްފައި ނުބެހެއްޓިޔަސް އަމިއްލައަށް ފަތިހާ ހޭލެވޭނެއެވެ.

8- މީގެކުރިން ތަޖުރިބާ ކުރެވިފައިނުވާ 'ފަރާތެއް' ތިމާގެ ދިރިއުޅުމުން ފެންނާނެއެވެ.

އަވަހާ ހޭލުމުން މީގެ ކުރިން ނުފެންނަ އައު ކުލަތަކާއި، ތަޖްރިބާކުރެވިފައި ނުވާ ހިތްގައިމު މާހައުލެއް ތަޖުރިބާ ކުރެވޭނެއެވެ. ފަތިސްވަގުތު ދުނިޔެއަށް ވެރިވެފައި އޮންނަ ހިތްގައިމު ދަނބުކުލައާއި، އިރުގެ ދޯދިތައް ވިލާތައް ފަޅާލާފައި ނުކުމެ މުޅި ދުނިޔެއަށް 'ބާއްޖަވެރި ދުވަހެކޭ ބުނެ'، ރާޅުތަކާއި ދޫނި ސޫފާސޫފީގެ އެހީއާއިއެކު އެ އިއްވާ ނަޣުމާތައް ތަޖުރިބާކުރުމުގެ ނަސީބު ލިބިގެންދާނެއެވެ.

ޖުމުލަކޮށް ބަލާއިރު އަވަހާ ނިދިން ހޭލައި، އަވަހާ ނިދަން އޮށޯތުމަކީ އޭގެ ފައިދާތައް ގުނާ އަދަދު ނުކުރެވޭނެ ކަމެއްކަމަށްވެސް ބުނެވިދާނެއެވެ. ސިއްޙީ ފައިދާތަކާއި، ރޫޙާނީ އަދި މާއްދީ އެތައް ފައިދާ ތަކެކެވެ. އަވަހާ ނިދާހޭލުމުގެ ފޮނިމީރުކަން އެނގޭނީ އެކަން ތަޖުރިބާ ކޮށްލީމައެވެ. އެހެންކަމުން އިރުމެދު ޖެހެންދެން ނިދަން ތިބުމުގެ އާދަވެފައިވާ ފަރާތްތަކުން މިކަން މިއީ ތަޖުރިބާކޮށްލަން ރަނގަޅުކަމެކެވެ.