ޣައްޒާ "ފުނޑާލިއިރު" އަރަބިން އަތް އުރާލައިގެން

އިސްރާއީލުން ފަލަސްތީނުގެ ޣައްޒާ އަށް ޖުލައި 8 އިން ފެށިގެން ދެމުންދާ ލާއިންސާނީ އަނިޔާވެރި ޙަމަލާތަކުގައި، އެއްވެސް އިންސާނިއްޔަތު ކަމެއް ނެތި، މަޢުސޫމް ކުޑަކުދިންނާއި، ނިކަމެތި އަންހެނުން ޝަހީދު ކުރަމުންދާއިރު، ޣައްޒާ އެހީތެރިކަމަކަށް އެދި ގޮވާ ގޮވުމަށް، ޢަރަބި ބައެއް ޤައުމުތަކުން ދެނީ ބީރުކަންފަތެކޭ ބުނާ ވާހަކައަކީ އާ ވާހަކައަކަށް ނުވާނެ އެވެ.

ޣައްޒާގައި އިސްރާއީލުން ޤަތުލުޢާންމުތައް ހިންގައި އެތައް ސަތޭކަ ބަޔަކު ޝަހީދު ކުރަމުންދާއިރު، ޢަރަބި ޤައުމުތައް ތިބީ ދުރުގައި އަތް އުރާލައިގެން މަންޒަރު ބަލާށެވެ. މިއާ އެކު ހުޅަނގުގެ މީޑިއާއިން ދަނީ ޢަރަބި ޤައުމުތަކުން އިސްރާއީލާ އެއްކޮޅަށް ތިބިކަން ދެއްކުމަށް ކެނޑިނޭޅި މަސައްކަތްކުރަމުން ވެސް މެއެވެ. އަދި އިސްރާއީލުގެ މީޑިއާ އިން ވަނީ، ހަމާސްއާ ދެކޮޅަށް އިސްރާއީލަށް ބައިވެރިއަކު ލިބިފައިވާ ކަމަށާއި އެއީ މިސްރުގެ ރައީސް އަބްދުލް ފައްތާޙު އަލް ސީސީ ކަމަށް ބުނެފަ އެވެ.

ތާރީޚުގެ ޞަފުޙާތަކަށް ނަޒަރު ހިންގާލާއިރު ފެންނަން އޮތް ހަޤީޤަތަކީ، މުސްލިމުންގެ ބިމަކަށް ޔަހޫދީންގެ ބަޔަކު ޙަމަލާދޭ ކޮންމެ ފަހަރަކު، އަރަބީން އެއްގަލަކަށް އަރާ ޔަހޫދީންނާ ދެކޮޅަށް ހަނގުރާމަކޮށްފައިވާކަމެވެ. އެހެންނަމަވެސް މި ފަހަރު މި ކަންތައް ވެގެންދަނީ އެއާ މުޅިން ޙިލާފަށެވެ.

މިއަދު، ފަލަސްތީނުގެ ބިމުގައި ތުއްތު ކުދިންނާއި އަންހެނުން ކަތިލަމުންދާއިރު، ބައެއް އަރަބި ޤައުމުތަކުން އެކަމާ މެދު މާ ބޮޑު އެއްޗެއް ނުބުނެ ހަނު ތިބެނީ ކީއްވެގެންތޯ، މިއީ ގިނަ ބައެއްގެ ހިތުގައި އުފެދޭ ސުވާލެކެވެ.

އަރަބި އިސްލާމީ ޤައުމުތަކަށް ބަލާލާއިރު، ފަލަސްތީނުގެ މިނިވަންކަމަށް މަސައްކަތް ކުރާ ހަމާސް ޖަމާޢަތަށް އަސްކަރީ ގޮތުން އެންމެ ބޮޑަށް ވާގިވެރިވެދިން ދެ ޤައުމަކީ އިރާނާއި ސޫރިޔާ އެވެ. މިވަގުތު ސޫރިޔާގެ ޙާލަތަށް ބަލާއިރު، ޚުދު ސޫރިއާ ވެސް އެވަނީ ދާޚިލީ ހަނގުރާމައިގެ ވަޅުގަނޑެއްގެ ތެރޭގަ އެވެ. ސޫރިޔާ މިވަގުތު ވަނީ، އެހެން ޤައުމަކަށް އެހީވެރިވެވޭ ފަދަ ޙާލަތެއްގައެއް ނޫނެވެ. ދެން އިރާނަށް ބަލާލާއިރު، ހަނގުރާމައެއްގެ ދަތިކަން އިރާނަށް ތަޙައްމަލުކުރަން ޖެހިފައި ނުވި ނަމަވެސް، އީރާނުގެ އަދުގެ ސަރުކާރުން އެންމެ ބޮޑު އަހައްމިއްޔަތުކަމެއް ދީގެން މަސައްކަތް ކުރަމުން ދަނީ، ހުޅަނގުގެ ޤައުމުތަކާ އެކު މަޝްވަރާކޮށް، ހުޅަނގުގެ ޤައުމުތަކުން އީރާނާ މެދު އަޅާފައިވާ ދަތިކުރުމުގެ ފިޔަވަޅުތަކަށް ނިމުމެއް ގެނައުމަށެވެ.

އެހެންކަމުން މިފަދަ ދަނޑިވަޅެއްގައި އީރާނަށް އިސްރާޢީލާ ދެކޮޅު ހަދައި، ފަލަސްތީނުގެ މުޖާހިދުންނަށް އެހީތެރިވުމަކީ އެހާ ފަސޭހަ ކަމަކަށް ނުވުން އެކަށީގެންވެ އެވެ. މީގެ އިތުރުން އީރާނުގެ މިހާރުގެ ޒަޢާމަތުގެ ވިސްނުމާއި ސިޔާސަތުތައް ބައްޓަން ކޮށްފައިވަނީ ވެސް، ޢީރާނުގެ ނިއުކްލިއަ މައްސަލައާ ގުޅިގެން އުފެދިފައިވާ މައްސަލަތަކަށް ސުލްޙަވެރި ހައްލެއް ހޯދުމަށް ހުޅަނގާ އެކު ގުޅިގެން މަސަައްކަތް ކުރުމުގެ މައްޗަށެވެ.

ދެން އޮތީ މިސުރުގެ ވާހަކަ އެވެ. ޣައްޒާގެ ތަޅުދަނޑި އޮތީ މިސްރުގެ އަތުގަ އެވެ. މިސްރުގެ ކުރީގެ ރައީސް ހުސްނީ މުބާރަކަކީ ފަލަސްތީނާ މާ ގާތް ގުޅުމެއް ބޭއްވެވި ބޭފުޅަކަށް ނުވި ނަމަވެސް، އެ މަނިކުފާނަކީ ފަލަސްތީނާ ދުޝްމިން ބޭފުޅެއް ވެސް ނޫންނެވެ. އަދި ހުސްނީ މުބާރަކް އަކީ އިސްރާއީލު ޖަހާހާ ބެރަކަށް ނަށާ، އިސްރާއީލުން ބުނާހާ ކަމެއް ކޮށް އުޅުއްވި ބޭފުޅެއް ވެސް ނޫނެވެ.

ކަންމިހެން އޮއްވާ ހުސްނީ މުބާރަކުގެ ވެރިކަން ނިމުމަކަށް ގެނެސް، މިސްރުގައި ސިޔާސީ ހަލަބޮލިކަމެއް އުފެދި، އެންމެ ފަހުން، މިސްރުގެ ވެރިއެއްގެ ގޮތުގައި މިހާރު މި ހުންނެވީ، ޖެނެރަލް އަބްދުލް ފައްތާޙު އަލްސީސީ އެވެ. ޖެނެރަލް ސީސީ އަކީ ޢަރަބީންގެ މަސްލަޙަތަށް ވުރެ ހުޅަނގެ މަސްލަޙަތު އިސްކުރައްވާ ބޭފުޅެކެވެ.

ފަލަސްތީނުގެ ސުލްޙައަށް މަސައްކަތްކުރާ ހަމާސް ޖަމާޢަތަކީ ހުސްނީ މުބާރަކްގެ ވެރިކަން ވައްޓާލި އިޚްވާނުލް މުސްލިމީނާ އެއް ފިކުރެއްގެ ބަޔަކަށް ވާތީ، ހަމާސް އަށް ތާޢީދުކުރަން ސީސީ ބޭނުންފުޅެއް ނުވެ އެވެ. މީގެ އިތުރުން، މިސްރުން ވަނީ ހަމާސް އަކީ ޓެރަރިސްޓް ޖަމާޢަތެއް ކަމަށް އިޢުލާން ވެސް ކޮށްފަ އެވެ. މިދެންނެވި ސަބަބުތަކަށްޓަކައި، މިދަނޑިވަޅަކީ ފަލަސްތީނުގެ އަތް އެންމެ ބޮޑަށް ބަނދެވިފައިވާ ދުވަސްވަރޭ ދެންނެވިދާނެ އެވެ.

އިސްރާޢީލުގެ ހަރުކަށި ލީޑަރު ބެންޖެމަން ނަތަންޔާހޫގެ މޭސްތިރިކަމުގައި، ފަލަސްތީނުގެ ގާޒާއަށް މި ފަދަ ރަޙުމްކުޑަ ލާއިންސާނީ އަނިޔާތައް ދެމުންދާ ސަބަބަކީ ޢަރަބި ދުނިޔޭގެ މަޖުބޫރީ ޙާލަތު ކަމުގައިތޯ ސުވާލު އުފެދެ އެވެ.

ނޯޓް: މިއީ މިހާރު ކުރިއަށްދާ މީޑިއާތަކުގެ ޓެލެތޯންގައި ހުރިހާ މީޑިއާއެއްގައި ލިއަމުން ދާ މަޒުމޫނެކެވެ. މި ސިލްސިލާގެ އިތުރު މަޒުމޫނުތައް ޝާއިއު ކުރެވެމުންދާނެއެވެ.