ސުނާމީގައި މަރުވި ކަމަށް ނިންމައިގެން ތިބި ކުއްޖަކު 10 އަހަރު ފަހުން ޢާއިލާއާ ބައްދަލުވެއްޖެ

2004 ވަނަ އަހަރުގެ ޑިސެމްބަރު 26 ވަނަ ދުވަހު އިންޑޮނޭޝިއާގެ ހުޅަނގު އަސޭ ޕްރޮވިންސަށް ގަދަފަދަ ސުނާ އެރިއިރު ރަނޫދަތުލް ޖައްނާގެ އުމުރަކީ އެންމެ ހަތަރު އަހަރެވެ.

ރަނޫދަތުލް ޖައްނާއާއި އޭނާގެ ހަތް އަހަރަށްދާ ބޭބެ، ސުނާމީގެ ބިޔަ ރާޅުތަކާ އެކު ދަމައިގަތެވެ. މަސްދުވަސް ވާންދެން އެކުދިން ހޯދުމަށް ޢާއިލާއާއި ކަމާބެހޭ ފަރާތްތަކުން ކުރި މަސައްކަތް ހުއްޓާލީ އެކުދިން ދިރިތިއްބާ ދެން ނުފެންނާނެ ކަމުގެ ނާއުއްމީދާ އެކުގައެވެ.

ނަމަވެސް މިއަދު، އެ އަންހެން ކުއްޖާގެ މަންމަ ޖަމީލާ އޭނާއަށް ލިބިފައިވާ އުފާވެރިކަން ސިފަކުރަނީ އޭނާގެ ދަރިފުޅުގެ އެނބުރި އައުން އެއީ 'އަޖައިބެއް" ކަމަށް ބުނަމުންނެވެ.

"ﷲ މިވަނީ އަހަރުމެންނަށް އަޖައިބެއް ދައްކަވާފައި،" ޖަމީލާ ބުންޏެވެ.

"އަހަންނާއި އަހަރެންގެ ފިރިމީހާ މިތިބީ ވަރަށް އުފަލުން. އަހަރެން ﷲ އަށް ޝުކުރުކޮށް ހަމްދުކުރަން. އަހަރަމެންގެ ދަރިފުޅު ވީނުވީއެއް ނޭނގި 10 އަހަރު ހޭދަވުމަށްފަހު މިއަދު ބައްދަލުވުމަށް މިންވަރުކުރެއްވީތީ."

ދިހަ އަހަރަށްފަހުން ޖަންނާއަށް އޭނާގެ ޢާއިލާއާ ބައްދަލު ކުރެވުނީ ހަމަ ކުއްލިއަކަށް ދިމާވި ކުޑަކުޑަ ކަމަކަށްފަހުގައެވެ. އެއީ އެއްދުވަހަކު ޖައްނާގެ ބޮޑުބޭބެއަށް ޖައްނާއާ ދިމާވި ދިމާވުމެވެ. އެކަން ހިނގީ އަންހެން ކުއްޖަކު ސުކޫލުން ނިމިގެން ގެއަށްދަނިކޮށް ބޮޑުބޭބެއަށް ފެނުނީއެވެ. ފުރަތަމަވެސް އެކުއްޖާ ފެނުނުއިރަށް ޖައްނާ އާ ވައްތަރު ސިފަތަކެއް ހުރިކަމަށް ބޮޑުބޭބެއަށް ފާހަގަކުރެވުނެވެ.

މަޢުލޫމާތު ސާފުކޮށް ބެލުމުން ބޮޑުބޭބެއަށް އެނގުނީ އެއީ ސުނާމީގެ އޮއިވަރުގައި ޖެހިގެން އަސޭ ޕްރޮވިންސްގެ ހުޅަނގު ދެކުނުގައި އޮންނަ ކުޑަކުޑަ ރަށަކަށް ލެއްގި ކުއްޖެއް ކަމަށެވެ. އެތަނުން ޖައްނާ ސަލާމަތްކުރީ މަސްވެރިއެކެވެ. އަދި އެ މަސްވެރިޔާ، ޖަންނާ ގެންދިޔައީ މައި ސަހަރަށެވެ. އެ ސަހަރުން އެކުއްޖާ ބަލައި ބޮޑުކުރީ މަސްވެރިޔާގެ މަންމައެވެ.

މިކަންކަން ސާފުވުމުން ޖަމީލާއާއި އޭނާގެ ފިރިމީހާ މިދިޔަ ޖޫންމަހު އެ އަންހެން ކުއްޖާއާއި ބައްދަލުކުރަން ދިޔައެވެ. އެ ބައްދަލުވުމުން އެމީހުންނަށް އެނގިގެންދިޔައީ އެ ކުއްޖާއަކީ ހަމަ ޙަޤީޤަތުގައިވެސް އެމީހުންގެ ގެއްލިފައިވާ ދަރިފުޅު ކަމެވެ."އެކުއްޖާ ފެނުމުން އަހަރެންގެ ހިތް ވަރަށް ބާރަށް ތެޅެންފެށި. އަހަރެން އެކުއްޖާ ގައިގާ ބައްދައިގަތިން. އެކުއްޖާވެސް އަހަރެންގެ ގައިގާ ބައްދައިގަތް. އެވަގުތު އަހަންނަށް އިހްސާސް ކުރެވިގެން ދިޔައީ ވަރަށް ބޮޑު ހިތްހަމަޖެހުމެއް." ޖަމީލާ ބުންޏެވެ.

2011 ވަނަ އަހަރުވެސްވަނީ މި ސުނާމީ ކާރިސާގައި ގެއްލުނު ކުއްޖަކު ހަތް އަހަރުފަހުން އޭނާގެ މައިންބަފައިނާ އަލުން ގުޅުމުގެ ނަސީބު ލިބިފައެވެ.

އުމުރުން 15 އަހަރުގެ އެ އަންހެންކުއްޖާ ބުނީ ސުނާމީ ކާރިސާގެ ދުވަސްކޮޅެއްފަހުން ކޮންމެވެސް އަންހެނަކު އޭނާ "އެޑޮޕްޓް" ކުރިކަމަށެވެ. އަދި މަޖުބޫރު ކުރުވައިގެން މަގުމައްޗަށް ސަލާންޖަހަން ނެރުނުކަމަށެވެ.2004 ވަނަ އަހަރު ކުރިމަތިވި ސުނާމީ ކާރިސާގައި 230000 މީހުން ދުނިޔޭގެ އެކި ހިސާބުތަކުން މަރުވެފައިވެއެވެ. އަދި އެތައް ބިލިޔަން ޕައުންޑްގެ ގެއްލުން ލިބިފައިވެއެވެ.

މި ސުނާމީ އުފެދިފައިވަނީ އިންޑޮނޭޝިއާގެ އަސޭ ޕްރޮވިންސް ކައިރީގައެވެ. އެއީ 9.1 މެގްނިޓިއުޓްގެ ވަރުގަދަ ބިންހެލުން އައި ސަރަޙައްދާ އެއްމެ ކައިރިއަށް އޮތް ސަރަޙައްދެވެ. އެ ހިސާބުން 30 ފޫޓްގެ ބިޔަ ރާޅުތައް އުފެދި އަސޭއާއި ދެކުނު އޭސިއާ އަދި ޕެސިފިކް ސަރަޙައްދަށް އެ ރާޅުތަކުގެ އަސަރު ކުރިއެވެ. މި ކާރިސާގައި އަސޭ ޕްރޮވިންސުން އެކަނިވެސް 170000 މީހުން މަރުވެފަވާކަމަށް ހިސާބުތަކުން ދައްކައެވެ.