ކާބޯތަކެތި އިސްރާފު ކުރުން ވަގުތުން ހުއްޓާލަންޖެހޭ

ޔޫރަޕިއަން ޔޫނިއަން (އީޔޫ) ގެ ގައުމަތަކުގައި އަހަރަކު ބޮލަކަށް 179 ކިލޯ ގްރާމު ކާބޯތަކެތި އުކާލައެވެ.

ސުވިޑްންގައި އެކަނިވެސް އަހަރެއްގެ މައްޗަށް އެއްމިލިއަން ޓަނުގެ ކާބޯތަކެތި އުކާލައެވެ. މި މިންގަނޑުތަކަށް ބަލައިގެން އީޔޫއިންވަނީ 2025 ވަނަ އަހަރުގެ ކުރިން ކާބޯތަކެތި އިސްރާފު ކުރާމިންވަރު ދަށްކުރުމުގެ މަސައްކަތް ފަށައިފައެވެ.

ސުވިޑްންގެ ތިމާވެށްޓާބެހޭ އެޖެންސީން ބުނެފައިވަނީ، އުކާލާ ކާބޯތަކެތީގެ 20 އިންސައްތަ ރީ ސައިކަލް ކުރެވުނުކަމުގައި ވިއަސް އަހަރެއްގެ މައްޗަށް 28 ބިލިއަން ސްވިޑްން ކްރޯނާ ސަލާމަތް ކުރެވޭނެ ކަމަށެވެ.

މިއީ އެތައް ފަގީރުންނަށް އެހީތެރިވެވިދާނެ ފައިސާއެވެ. ކާބޯތަކެތި އިސްރާފު ކުރަމުންދާއިރު ބަނޑުހައިހޫނު ކަންމަތީގައި ދުވާލެއްގެ މައްޗަށް އެތައް ބަޔަކު މަރުވަމުންދާކަން ހަނދާންކޮށް އެމީހުންގެ ހައްގުގައިވެސް އިސްރާފު ކުރުން ހުއްޓާލަމންޖެހެއެވެ.

ޕެކެޓުގައި ބަންދުކޮށްފައި ހުންނަ ގުދުރަތީ މޭވާ ފަދަ ތަކެތީގެ ތެރެއިނާ ކޮންމެ ތިން ޕެކެޓަކުން އެއް ޕަކެޓު އެއްލައިލަނީ މުއަދަތު ހަމަވެގެން ކަމަށް ސްވިޑްންގެ ލުންޑް ޔުނިވަރސިޓީން ކުރި ދިރާސާއަކުންވަނީ ފެނިފައެވެ.

"އަޅުގަނޑުމެން އެންމެން އަބަދު ވެސް ބަލަމުން ގެންދަނީ ކާތަކެތީގައި ޖަހާފައިވާ މުއްދަތު ހަމަވާތާރީޚަށް. އެ ތާރީޚު ހަމަވުމުން އެއްލާލަނީ. އެހެން ނަމަވެސް އެ ތާރީޚު ޖަހާފައި އެވަނީ އެ އެއްޗެއް ބަހައްޓަންޖެހޭ ފިނިހޫނުމިނުގައި ބަހައްޓައިފިނަމަ މުއްދަތުހަމަވާނެ ކަމަށް ބެލެވޭ ތާރީޚު. އެހެންކަމުން ހަމައެކަނި ތާރީޚަށް ބެލުމަށްފަހު ތަކެތި އުކާލުމަކުން ވެސް ކަމަކު ނުދާނެ،" ތައްޔާރީ ކާނާއާ ބެހޭ ގޮތުން އެ ޔުނިވާރސިޓީގެ ޕްރޮފެސަރ ފޯރ ޕެކިން ލޮޖިސްޓިކްސް ފްރެޑްރިކް ނެލްސަން ވިދާޅުވެފައިވެއެވެ.

ނެލްސަން އާއި އޭނާގެ ޓީމުން މިހާރު މަސައްކަތް ކުރަމުން ގެންދަނީ، "ޑައިނަމިކް ލޭބަލިން" ގެ ނަމުގައި މިހާރު ލޭބަލްކުރާ މިންވަރަށްވުރެ ހަރުދަނާ ލޭބަލް ކުރުމުގެ ނިޒާމެއް ތައާރަފް ކުރުމަށެވެ. "ޑައިނަމިކް ލޭބަލިންގެ ސަބަބުން ކާތަކެތީގެ މުއްދަތު ހަމަވާތާރީޚު ޖެހުމުގައި މިހާރަށްވުރެ ހަރުދަނާ ކުރެވޭނެ. އަދި މުއްދަތު އޮޅުވާލުމަށް ހުރަސް އެޅޭނެ،" ނެލްސަން ވިދާޅުވެފައިވެއެވެ.

ޑައިނަމިކް ލޭބަލިންގައި ކާތަކެތި ބަންދުކޮށްފައި ހުންނާނީ އެތަކެތި އަބަދުވެސް ސެންސަރ އެއްގެ އެހީގައި މޮނީޓަރ ކުރެވޭގޮތަށެވެ. މިގޮތަށް މޮނިޓަރ ކުރުމުން، ކާތަކެތި ކުނިވާނީ ކިހާ މިންވަރަކަށްކަން ދެނެގަނެވިދާނެ އެވެ.

"ގިނަފަހަރު އުކާލެވެނީ ކުނި ނުވާތަކެތި. ޑައިނަމިކް ލޭބަލުގެ ސަަބަބުން ކާތަކެތީގައި ބެކްޓީރިއާ އުފެދޭ މިންވަރު ދެނެގަނެ އެތަކެތި ހުންނަނީ އެކަށީގެންވާ ފިނިހޫނު މިނެއްގައިތޯ ސަޕްލައިކޮށްދޭ ފަރާތްތަކަށް ވެސް ދެނެގަނެވޭނެ. އަދި ކަސްޓަމަރުން (މިސާލަކަށް ސޮސެޖެއް) ގަންނައިރު އޭތި އޮތީ ކުނިވެފައިތޯ ނުވަތަ ނޫންތޯ ކަންބޮޑުވާކަށް ނުޖެހޭނެ،" ޑައިނަމިކް ލޭބަލާއި ގުޅޭގޮތުން ނެލްސަން ވިދާޅުވެފައިވެއެވެ.

މިފަދަ ރިސާޗެއް ރާއްޖޭގައި ކުރެވިފައެއްނުވެއެވެ. ނަމަވެސް، ދިވެހިންގެ އާންމު ދިރިއުޅުމުގައި ކާބޯތަކެތި އިސްރާފު ކުރުމަކީ ހަގީގަތެކެވެ. އިސްރާފު ކުރުމަކީ އިސްލާމް ދީނުގައި ވެސް ނަހީ ކުރައްވައިފައިވާ ކަމެކެވެ. އެހެންކަމުން އިސްރާފުކުރުމުން އެއްކިބާވާން އެބަޖެހެއެވެ.

މިއަދަކީ ދުނިޔޭގެ ތިމާވެށީގެ ދުވަހެވެ. ތިމާވެށީގެ ދުވަސް ފާހަގަކުރާއިރު ތިމާވެށި ހިމާޔަތް ކުރުމަށް މަސައްކަތް ކުރުމުގެ ގޮތުންވެސް ކާބޯތަކެތި އިސްރާފު ކުރުން ހުއްޓާލަން އެބަޖަހެއެވެ.