ކަރަޔަކަށް ވަޅި ހަރައިގެން މީހަކު ހައްޔަރުކޮށްފި

މީހެއްގެ ގޭގެ މޭޒުމަތީގައި އޮތް ބޮޑު ކަރަޔަކަށް ވަޅިހެރި މީހަކު އެމެރިކާ ފުލުހުން ހައްޔަރު ކޮށްފިއެވެ.

މިމައްސަލާގައި ހައްޔަރު ކޮށްފައިވަނީ އެމެރިކާގެ ކޮނެކްޓިކަޓްގެ ކަރވެލިނޯ ނަމަކަށް ކިޔާ، 49 އަހަރުގެ މީހެކެވެ.

ގެއެއްގެ މޭޒުމަތީގައި އޮތް ބޮޑު ކަރައަކަށް ބޮޑު ވަޅި ހެރުމުން އެގޭ އަންހެން މީހާވަނީ ވަގުތުން އެކަން ފުލުހުންނަށް ރިޕޯޓު ކޮށްފައެވެ. އޭނާ ފުލުހުންނަށް ރިޕޯޓްކޮށްފައިވާ ގޮތުގައި މިއީ ކަރވެލިނޯ އޭނާ އަށް ބިރުދެއްކުމުގެ ގޮތުން ކުރިކަމެކެވެ. ކޮނެކްޓިކަޓްގެ ބަންޓަމް އަވަށުގައި ހިނގި މިހާދިސާގައި އެމީހާ ހައްޔަރު ކުރެވުނީ އާންމުންގެ ތެރޭގައި ބިރުވެރިކަން އުފެދޭގޮތަށް އަމަލުކުރުމުގެ ކުށުގައިކަމަށް ދަރެޖިސްޓަރ ސިޓިޒަން އޮފް ޓޮރިންގޓަންއިން ހާމަކޮށްފައިވެއެވެ.

ކަރވެލިނޯ ހައްޔަރު ކުރުމުން އޭނާވަނީ 500 އެމެރިކާ ޑޮލަރު ދެއްކުމަށްފަހު ކަފާލާތުގެ ދަށުން މިނިވަން ވެފައެވެ.

ކަރވެލިނޯއާއި ދެކޮޅަށް މައްސަލަ ހުށަހެޅި އަންހެން މީހާ މިމަހު 4 ވަނަ ދުވަހުވެސް ވަނީ އޭނާ މަސްތުވާތަކެތި ގެންގުޅޭކަމަށް ބުނެ ފުލުހުންނަށް ރިޕޯޓްކޮށްފައެވެ. ނަމަވެސް އެފަހަރު ފުލުހުން އޭނާ ހައްޔަރުކޮށްފައެއް ނުވެއެވެ.