ނަވާރަ ވަނަ ގަރުނުގައި އިނގިރޭސިވިލާތުގައި އެންމެ ފަހުން ވިހޭމީހާ މަރުވެއްޖެ

19 ވަނަ ގަރުނުގައި އިނގިރޭސިވިލާތުގައި އެންމެ ފަހުން އުފަންވި މީހާ އުމުރުން 113 އަހަރުގައި މަރުވެއްޖެއެވެ.

ދެކުނު ލަންޑަންގެ ބަރމޮންޑްސޭގެ ގްރޭސީ ޖޯންސް ނަމަކަށް ކިޔާ މީހާ ދުނިޔޭގެ އަލިކަން ދެކެފައިވަނީ 1899 ވަނަ އަހަރުގެ ޑިސެމްބަރު މަހުގެ 7 ވަނަ ދުވަހުއެވެ. އެއީ 1800 ގެ އަހަރުތަކުގައި އިނގިރޭސިވިލާތުގައި އެންމެ ފަހުން ވިހޭ މީހާއެވެ.

ދުވަހަކުވެސް މީހަކާ އިނދެފައި ނުވާ ގްރޭސް އަކީ މުޅި ދުނިޔޭގައި އޭރު ހުރި ހަވަނައަށް އެންމެ މުސްކުޅި މީހާއެވެ.

ގްރޭސް ކައިވެނިކުރަން އުޅުނު މީހާވަނީ ފުރަތަމަ ބޮޑު ހަނގުރާމައިގައި މަރުވެފައެވެ.

"މިއީ އަޅުގަނޑުމެންނަށް ވަރަށް ހިތާމަވެރި ދުވަހެއް. ގްރޭސްގެ ދިގު އުމުރުގެ ހަނދާންތައް ދުވަހަކުވެސް ނުފޮހެވޭނެ،" ގްރޭސްގެ ކަންތައްތައް ބަލަހައްޓަމުންދިޔަ ސައިމަން ހިއު ބުނެފައިވެއެވެ.