ލޭކް ރެޓްބާ- ސެނެގާލްގެ ފިޔާތޮށި ފެންގަނޑު

ތިޔައިގެ ތެރެއިން ކޮންމެ ބޭފުޅަކީވެސް އިރެއްގައި ކުޑަކުއްޖެކެވެ. އަދި އެދުވަސްވަރު ވަރަށް ގިނަ ބޭފުޅުން ޝަރުބަތުގެ ކަނޑަކަށް ނުވަތަ ފެންގަނޑަކާ މެދު ހުވަފެން ބައްލަވާފައިވާނެކަން ޔަޤީނެވެ. އާދޭހެވެ. ދައްކަން މިއުޅެނީ ޝަރުބަތުގެ ފެންގަނޑެއްގެ ވާހަކައެއް ނޫނެވެ. ނަމަވެސް ސެނަގާލްގެ ލޭކް ރެޓްބާގެ ކުލައެއީ ހަމަ ޝަރުބަތުގައި ހުންނަ ގަދަ ފިޔާތޮށި ކުލައެވެ.

ސައިންސްވެރިން ބުނާގޮތުގައި އާދަޔާ ޚިލާފު މި ފެންގަނޑަށް ޝަރުބަތު ކުލަ އަރާފައިވަނީ އެފެންގަނޑުގެ ލޮނުގެ އަސަރު އާދަޔާ ޚިލާފަށް ގަދަވުމުންނެވެ. އަދި އެމީހުން ހާމަކުރާ ގޮތުގައި ލޭކް ރެޓްބާގެ ލޮނުގެ އަސަރު ޑެޑްސީގެ ލޮނުގެ އަސަރަށްވުރެ ހަތަރުބައި ކުޅަ އެއްބައި ގަދައެވެ. ނުވަތަ ގިނައެވެ. އަދި މީގެ ސަބަބުން އެފެންގަނޑަކީ ހަލޯބެކްޓީރިއަމް ނުވަތަ ލޮނަށް ދޯޅުވާ ޖަރާސީމުގެ ހާއްޔަކަށްވަނީ ވެފައެވެ. ސައިންސްވެރިން ބުނާގޮތުގައި މި ޖަރާސީމަކީ ފިޔާތޮށިކުލައިގައި ހުންނަ އެއްޗެކެވެ.

ލޭކް ރޯސް ނުވަތަ ލޭކް ރެޓްބާގެ ނަމުން މަޝްހޫރުވެފައިވާ މި އާދަޔާ ޚިލާފު ފެންގަނޑު އޮންނަނީ ސެނެގާލްގެ ޑާކަރގެ އުތުރަށް 35 ކިލީމީޓަރު ދުރުގައި އިން ކެޕް ވަރޓް ޕެނިންސޫލާގައެވެ.

މިފެންގަނޑުގައި އަހަރުގެ ގިނަދުވަސްތައް ބޭނުން ކުރެވެނީ ލޮނު އުފެއްދުމުގެ މަސައްކަތަށެވެ. މިފެންގަނޑުގެ އަޑިން ލޮނު ނެގުމުގެ މަސައްކަތް މިކަން ކުރާމީހުން ދުވާލަކު 10 ގަޑި އިރާއި 12 ގަޑިއިރު ވަންދެން މަސައްކަތްކުރާ ކަމުގައިވެއެވެ. އަދި މިކަން ކުރުމުގެ ކުރިން މުޅި ހަށިގަނޑުގައި ޝީނަޓްކިޔާ މަދެއްގެ ބަޓަރު އުނގުޅައެވެ. މައުލޫމާތު ލިބިފައިވާ ގޮތުގައި އެހާކަނީ މިފެންގަނޑުގައިވާ ލޮނުން ހަންގަނޑު ސަލާމަތްކޮށް ރައްކާތެރި ކުރުމަށެވެ.