ދުނިޔޭގެ އެންމެ ބޮޑު ކަރުދާސް މަތިންދާބޯޓު އުދުއްސައިފި

ދުނިޔޭގެ އެންމެ ބޮޑު ކަރުދާސް މަތިންދާބޯޓު އެމެރިކާގެ އެރިޒޯނާގެ ޕިމާއެއަރ އެންޑް ސްޕޭސް މިއުޒިއަމްއިން އުދުއްސައިފިއެވެ.

ކޮޅުންފެށިގެން ނިގުލުގެ ކޮޅާ ހަމަޔަށް 13 މީޓަރު ހުންނަ، ބަރުދަނުގައި 352 ކިލޯގްރާމް ހުންނަ މިކަރުދާސް މަތިންދާބޯޓުގެ ފިޔައިގެ ފުޅާ މިނުގައި 7.3 މީޓަރު ހުރެއެވެ. އަދި މިމަތިންދާބޯޓުގެ އުދުހޭ ދުވެލި އަކީ ގަޑިއަކު 160 ކިލޯމީޓަރު ކަމުގައި މައުލޫމާތު ލިބެއެވެ.

ޚަބަރުތަކުން ބުނާގޮތުގައި 1500 މީޓަރު މަތިން ދޫކޮށްލުމަށް ކުރީގައި ނިންމާފައިވާ މިކަރުދާސް މަތިންދާބޯޓު ވައިގެ ބާރުމިން ހުރިގޮތުން ހެލިކޮޕްޓަރެއްގެ އެހީގައި ދޫކޮށްލައިފައިވަނީ 820 މީޓަރު މަތިންނެވެ.

ދިހަވަރަކަށް މިނެޓްވަންދެން އުދުހުމަށްފަހު މަތިންދާބޯޓުވަނީ ބިމަށްވެއްޓި އެއްކޮށް ހަލާކުވެފައެވެ.

"ނިމުން އެހާ ހިތްގައިމެއްނޫން. ހަމަ ކުނިއަށްވެ ނިމުނީ،" ޕިމާ އެއަރގެ ތަރުޖަމާނު ޓިމް ވިމާސްޓެޑްޓް ހާމަކުރިއެވެ.