ފޭސްބުކް ބޭނުންކުރާ ކުދިންގެ މާކްސް ދަށްވޭ: ދިރާސާ
28 އޮކްޓޯބަރ 2013 4:14
މަޝްހޫރު ސޯޝަލް ނެޓްވޯރކް، "ފޭސްބުކް" ބޭނުންކުރާ ކިޔަވާކުދިންގެ މާކްސް ދަށްވާކަމަށް ދިރާތަކުން ދައްކާކަމުގައި ޓައިމް މެގަޒިންއިން އިން ހާމަކޮށްފިއެވެ.
ޓައިމް އިން މަޢުލޫމާތު ދީފައިވާ ގޮތުގައި ކެލިފޯނިއާ ސްޓޭޓް ޔުނިވަރސިޓީގެ ނަފްސާނީ ޢިލްމުގެ ޕްރޮފެސަރެއް ކަމުގައިވާ ޑރ. ލެރީ ރޯސެން ކޮށްފައިވާ ދިރާސާއަކުން ހާމަވެފައިވާ ގޮތުގައި ފޭސްބުކްގެ ސަބަބުން ކިޔަވާކުދިންގެ ކިޔެވުމަށް ބުރޫ އަރައި އެދަރިވަރުންގެ ތަޢުލީމީ ފެންވަރު، ފޭސްބުކް ބޭނުން ނުކުރާ ކުދިންނަށްވުރެ ދަށަށްދެއެވެ.
އެމެރިކަން ސައިކޮލޮޖިސްޓް އެސޯސިއޭޝަންގެ 119 ވަނަ އަހަރީ ބައްދަލުވުމުގައި ޑރ. ރޯސެން ހާމަކުރިގޮތުގައި އޭނާ ކުރި ދިރާސާއިން ދައްކާގޮތުގައި ފޭސްބުކް ބޭނުން ކުރާ ކިޔަވާކުދިންގެ ތަޢުލީމީ ފެންވަރު ދަށްވުމުގެ އިތުރުން، ފޭސްބުކް ބޭނުންކުރާ ކުދިންގެ ތެރޭގައި ނަފްސާނީ ބަލިތަކާއި، މުޖްތަމަޢުން އެކަހެރިވެއުޅުމާއި، އަދި ރުޅިގަދަވުން ފަދަކަންތައްތަކަށް މަގުފަހިވެގެންދެއެވެ.
ރޯސެންގެ ދިރާސާއިން އަދިވެސް ހާމަވެފައިވާ ގޮތުގައި، "ޓެކްނޮލޮޖީއާއި މީޑިއާ މާބޮޑަށް ބޭނުންކުރާ ކުދިންގެ ޞިއްޙަތަށް އޭގެ ސަބަބުން ނޭދެވޭ އަސަރުކޮށް، އެންޒައެޓީއާއި ޑިޕްރެޝަންފަދަ ނަފްސާނީ ބަލިތަކަށް އެކުދިން ހުށަހެޅިގެންދެއެވެ."
މީގެ އިތުރުން، އޮހާއޯ ސްޓޭޓް ޔުނިވަރސިޓީގެ ޕީއެޗްޑީ ދަރިވަރެއް ކަމުގައިވާ އޭރީން ކާރޕިންސްކީ ކުރި ދިރާސާއަކުން ހާމަވެފައިވާ ގޮތުގައި ފޭސްބުކް ބޭނުން ނުކުރާ ކުދިންނަށް ވުރެ ފޭސްބުކް ބޭނުންކުރާ ކުދިންގެ މާކްސް 20 އިން ސައްތަ ދަށަށްގޮސްފައިވެއެވެ.
ކިޔުންތެރިންގެ ހިޔާލު